കൊല്ലം കോട്ടമുക്ക് ട്രിനിറ്റി ലൈസിയം സ്‌കൂളിലെ പത്താംക്ലാസ് വിദ്യാര്‍ത്ഥിനി ഗൗരി നേഹയ്ക്ക് ചികിത്സ നിഷേധിക്കപ്പെട്ടെന്ന് പോലീസ്. അദ്ധ്യാപികമാരുടെ ശകാരത്തെ തുടര്‍ന്ന് കെട്ടിടത്തിന്റെ മൂന്നാം നിലയില്‍ നിന്ന് ഗൗരി ചാടുകയായിരുന്നു.

ഗുരുതരമായി പരിക്കേറ്റ കൊല്ലം ബെന്‍സിഗര്‍ ആശുപത്രിയില്‍ നാലു മണിക്കൂറോളം ചികിത്സ ലഭിക്കാതെ പോയെന്നാണ് അന്വേഷണത്തില്‍ കണ്ടെത്തിയത്. ആശുപത്രിക്കെതിരെ പൊലീസ് അന്വേഷണം തുടങ്ങി. ആശുപത്രിയിലെ രേഖകളും പൊലീസ് പരിശോധിക്കുന്നുണ്ട്. നില ഗുരുതരമായതിനെ തുടര്‍ന്ന് തിരുവനന്തപുരത്തെ സ്വകാര്യ ആശുപത്രിയില്‍ പ്രവേശിപ്പിച്ച ഗൗരി ഇന്നലെ പുലര്‍ച്ചെയോടെ മരിക്കുകയായിരുന്നു.

ആശുപത്രിയില്‍ പ്രവേശിപ്പിക്കപ്പെട്ട ഗൗരിയ്ക്ക് തലയ്ക്കും നട്ടെല്ലിനും പരിക്കുണ്ടായിരുന്നു. എങ്കിലും കുട്ടി ബോധാവസ്ഥയില്‍ ആയിരുന്നു. സംസാരിക്കാനും കഴിയുന്ന അവസ്ഥയിലായിരുന്നു. സ്‌കൂള്‍ അധികൃതര്‍ അറിയിച്ചതനുസരിച്ച് പൊലീസ് ആശുപത്രിയിലെത്തിയെങ്കിലും കുട്ടിയെ കാണാനോ മൊഴിയെടുക്കാനോ ഡോക്ടര്‍മാര്‍ അനുവദിച്ചില്ല.

ആശങ്കപ്പെടാനില്ലെന്നും തിരുവനന്തപുരത്തെ ആശുപത്രിയിലേക്ക് കൊണ്ടുപോകേണ്ടതില്ലെന്നും ഡോക്ടര്‍മാര്‍ പറഞ്ഞതായാണ് പൊലീസ് നല്‍കുന്ന വിവരം. കുട്ടിയെ വിദഗ്ദ്ധ പരിശോധനയ്ക്ക് വിധേയമാക്കാന്‍ തയ്യാറാവാതിരുന്ന ഡോക്ടര്‍മാര്‍ സ്‌കാനിംഗ് നടത്താനും തയ്യാറായില്ല. മതിയായ ചികിത്സ ലഭിക്കാതിരുന്നതാണ് ഗൗരിയുടെ നില കൂടുതല്‍ വഷളാക്കിയതെന്നും പൊലീസ് പറഞ്ഞു. ആശുപത്രി അധികൃതര്‍ക്കെതിരെ കൂടുതല്‍ നടപടിയെടുക്കുമെന്നാണ് അറിയുന്നത്.

സിന്ധു, ക്രസന്റ് എന്നീ അധ്യാപികമാര്‍ക്കെതിരെ ആത്മഹത്യ പ്രേരണ കുറ്റത്തിന് കേസെടുത്തിരുന്നു. ഇവരുടെ മാനസിക പീഡനം മൂലമാണ് കുട്ടി ആത്മഹത്യ ചെയ്തതെന്നാണ് പരാതി. കൊല്ലം ട്രിനിറ്റി ലെസി സ്‌കൂളിലെ പത്താം ക്ലാസ് വിദ്യാര്‍ത്ഥിനി ഗൗരിയാണ് മരിച്ചത്. തിരുവനന്തപുരത്ത് സ്വകാര്യ ആശുപത്രിയില്‍ ചികിത്സയിലായിരുന്നു. പെണ്‍കുട്ടിയുടെ മാതാപിതാക്കളുടെ മൊഴിയുടെ അടിസ്ഥാനത്തിലാണ് അധ്യാപികമാര്‍ക്കെതിരെ കേസെടുത്തത്.

രണ്ട് ദിവസം മുമ്പ് പെണ്‍കുട്ടിയും സഹപാഠിയും തമ്മില്‍ വാക്ക് തര്‍ക്കമുണ്ടായിരുന്നു. ഇത് ചോദ്യം ചെയ്ത അധ്യാപിക ഇന്നലെ കുട്ടിയെ സ്റ്റാഫ് റൂമിലേക്ക് വിളിപ്പിക്കുകയും എല്ലാവരുടെയും മുന്നില്‍ വച്ച് ശകാരിക്കുകയും ചെയ്തിരുന്നു. ഇതേത്തുടര്‍ന്നുണ്ടായ മാനസിക സംഘര്‍ഷത്തില്‍ കുട്ടി എല്‍പി ബ്ലോക്കിന് മുകളില്‍ കയറി താഴേക്ക് ചാടിയെന്നാണ് പോലീസിന്റെ വിശദീകരണം.