ജൂവലറി ജീവനക്കാരന് 16 ലക്ഷത്തിന്റെ സ്വര്ണം കവര്ന്നത് മാസങ്ങള് കഴിഞ്ഞിട്ടും ഉടമ അറിഞ്ഞില്ല
ജൂവലറിയില് നിന്ന് 16 ലക്ഷത്തിന്റെ സ്വര്ണം കവര്ന്ന ജീവനക്കാരനെ പൊലീസ് പിടിയിലായി. മെഡിക്കല് കോളേജ് ജംഗ്ഷനിലെ കുന്നില് ഗോള്ഡ് പാര്ക്കെന്ന സ്ഥാപനത്തിലെ ജീവനക്കാരനായ വടശേരിക്കര സ്വദേശി അരുണാണ് (27) പിടിയിലായത്. ഇയാളുടെ വീട്ടില് പൊലീസ് നടത്തിയ പരിശോധനയില് മോഷ്ടിച്ച സ്വര്ണത്തിന്റെ കുറച്ച് ഭാഗം കണ്ടെടുത്തു. കസ്റ്റഡിയിലായ പ്രതിയെ പൊലീസ് വിശദമായി ചോദ്യം ചെയ്തുവരികയാണ്.
കഴിഞ്ഞ ഒന്നരവര്ഷമായി ജുവലറിയിലെ ജീവനക്കാരനായി ജോലി നോക്കി വന്നയാളാണ് അരുണ്. ദിവസവും കട അടയ്ക്കുമ്പോള് സ്റ്റോക്ക് തിട്ടപ്പെടുത്തുന്ന ചുമതലയും ഇയാള്ക്കായിരുന്നു. കഴിഞ്ഞ ഏതാനും മാസങ്ങളായാണ് കവര്ച്ച നടത്തിയതെന്ന് പൊലീസ് പറഞ്ഞു. മെഷീനില് നിര്മ്മിച്ചെത്തിക്കുന്ന ആഭരണങ്ങള് റോളുകളായാണ് സൂക്ഷിക്കുന്നത്. ഇതില് നിന്ന് മാല, കൊലുസ്, അരഞ്ഞാണം തുടങ്ങിയവയുടെ ഒരുഭാഗം കട്ട് ചെയ്തെടുക്കുകയായിരുന്നുവെന്ന് പൊലീസ് പറഞ്ഞു.
കഴിഞ്ഞ ദിവസം മാലയുടെ റോളില് കാര്യമായ കുറവ് തോന്നിയതിനെ തുടര്ന്ന് കടയുടമ നടത്തിയ അന്വേഷണത്തിലാണ് സ്റ്റോക്കില് വന് കുറവ് വന്നതായി ബോദ്ധ്യപ്പെട്ടത്. തുടര്ന്ന് കടയുടമ പൊലീസില് പരാതി നല്കുകയായിരുന്നു. മെഡിക്കല് കോളേജ് സി.ഐയുടെ നേതൃത്വത്തില് പൊലീസ് ജീവനക്കാരെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് അരുണാണ് ആഭരണങ്ങള് കവര്ന്നതെന്ന് തെളിഞ്ഞത്.
കവര്ച്ച ചെയ്ത ആഭരണങ്ങളില് കുറച്ച് വില്ക്കുകയും പണയപ്പെടുത്തുകയും ചെയ്തതായി ഇയാള് പൊലീസിനോട് സമ്മതിച്ചിട്ടുണ്ട്. ഇയാളുടെ മൊഴിയുടെ അടിസ്ഥാനത്തില് വടശേരിക്കരയിലെ വീട്ടില് പൊലീസ് നടത്തിയ പരിശോധനയില് അവിടെ ഒളിപ്പിച്ചിരുന്ന സ്വര്ണാഭരണങ്ങളും പണയ രസീതുകളും കണ്ടെത്തിയിട്ടുണ്ട്. കടയുടെ സ്റ്റോക്ക് തിട്ടപ്പെടുത്തുന്ന ജോലിയും അരുണ്തന്നെ നോക്കിയതിനാലാണ് സ്റ്റോക്കിലുണ്ടായ കുറവ് യഥാസമയം ഉടമയ്ക്ക് ബോദ്ധ്യപ്പെടാനാകാതെ പോയത്. ഇയാളെ അറസ്റ്റ് രേഖപ്പെടുത്തിയശേഷം കോടതിയില് ഹാജരാക്കുമെന്ന് പൊലീസ് പറഞ്ഞു.
https://www.facebook.com/Malayalivartha
