നിര്‍മ്മല്‍ ചിട്ടി തട്ടിപ്പില്‍ മനോവിഷമത്തിലായിരുന്ന വേണുഗോപാലന്‍ നായര്‍ ആത്മഹത്യ ചെയ്തു.വീട്ടിലെ ഫാനില്‍ തൂങ്ങി മരിച്ച നിലയില്‍ കണ്ടെത്തുകയായിരുന്നു. ഉദിയന്‍കുളങ്ങര ന്യൂജ്യോതി പബ്ലിക് സ്‌കൂളിലെ സ്‌കൂള്‍ ബസ് െ്രെഡവറാണ് ഇയാള്‍. രണ്ടാമത്തെ മകളുടെ വിവാഹാവശ്യങ്ങള്‍ക്കായി വസ്തു വിറ്റുകിട്ടിയ തുകയായ 30 ലക്ഷം രൂപ രണ്ടുവര്‍ഷം മുന്‍പാണ് വേണുഗോപാല്‍ പളുകലില്‍ പ്രവര്‍ത്തിക്കുന്ന നിര്‍മ്മല്‍ കൃഷ്ണ ഫിനാന്‍സില്‍ നിക്ഷേപിച്ചത്. 

ബാങ്ക് പൂട്ടി ഉടമ മുങ്ങിയ വിവരം അറിഞ്ഞത് മുതല്‍ വേണുഗോപാലന്‍ നായര്‍ മനോവിഷമത്തിലായിരുന്നുവെന്ന് ബന്ധുക്കള്‍ പറഞ്ഞു. ഇളയ മകള്‍ വിദ്യയുടെ വിവാഹം വരുന്ന ഫെബ്രുവരി 7 ന് നടത്താന്‍ നിശ്ചയിച്ചിരുന്നതാണ്. എന്നാല്‍ വിവാഹത്തിനുള്ള പണം കണ്ടെത്താന്‍ കഴിയാതായതോടെ 4 മാസമായി ജോലിക്കും പോകുന്നില്ല.

കേന്ദമന്ത്രി പൊന്‍ രാധാകൃഷ്ണന്‍ നിക്ഷേപകരെ നേരിട്ട് കാണുന്നതിനായി പളുകല്‍ സ്‌കൂളില്‍ എത്തിയപ്പോള്‍ വേണുഗോപാലന്‍ നായര്‍ എത്തി മന്ത്രിക്ക് നേരിട്ട് പരാതി സമര്‍പ്പിച്ചിരുന്നു. മൂത്ത മകള്‍ ദിവ്യയും ഭര്‍ത്താവ് രഞ്ജിത്തും സമീപത്തെ മറ്റൊരു വീട്ടിലാണ് താമസം. ഇന്നലെ ഉച്ചയ്ക്ക് ശേഷം ഭാര്യ അടുത്തുള്ള മാര്‍ക്കറ്റിലേക്കും ഇളയ മകള്‍ പി.എസ്.സി കോച്ചിംഗ് ക്ലാസിനും പോയ സമയത്താണ് ആത്മഹത്യ ചെയ്തത്.

മകള്‍ ക്ലാസ് കഴിഞ്ഞ് വൈകിട്ട് 3ന് തിരിച്ചെത്തിയപ്പോള്‍ വീട്ടിലെ കതകുകള്‍ തുറന്ന് കിടന്ന നിലയിലായിരുന്നു. അകത്ത് കടന്ന മകള്‍ കാണുന്നത് അച്ഛന്‍ ഫാനില്‍ തൂങ്ങി നില്‍ക്കുന്നതാണ്. പൊലീസെത്തി നെയ്യാറ്റിന്‍കര ജനറല്‍ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു.