കൊച്ചി നാവിക വിമാനത്താവളത്തില്‍ രാഷ്ട്രപതിയെ കാത്ത് അപ്രതീക്ഷിത അതിഥി. എടത്വ സ്വദേശി വലിയപറമ്പില്‍ റൂബന്‍ ജോര്‍ജായിരുന്നു അത്. തിരുവനന്തപുരത്തെ പ്രസംഗത്തില്‍ കഴിഞ്ഞദിവസം രാഷ്ട്രപതി രാംനാഥ് കോവിന്ദ് പരാമര്‍ശിച്ച മലയാളിയാണ് ജോര്‍ജ്.

കാണ്‍പൂരിലെ കല്യാണ്‍പൂരില്‍ രാഷ്ട്രപതിയുടെ വീട്ടിലെ വാടകക്കാരനാണ് മാനേജ്‌മെന്റ് കണ്‍സള്‍ട്ടന്റായ ജോര്‍ജ്. മലയാളികളുടെ നന്മയെയും സേവനമനോഭാവത്തെയും വാഴ്ത്തുന്നതിനിടയിലാണ് റൂബനെക്കുറിച്ചും രാഷ്ട്രപതി പരാമര്‍ശിക്കുകയുണ്ടായി. ആദിശങ്കരാചാര്യരുടെയും ശ്രീനാരായണഗുരുവിന്റെയും അയ്യങ്കാളിയുടെയും സാന്നിധ്യം കൊണ്ടു ധന്യമായ കേരളത്തില്‍ ജനിച്ചവര്‍ ഭാഗ്യം ചെയ്തവരാണെന്നും താന്‍ കാണ്‍പുരില്‍നിന്നുപോയ ശേഷം പത്തു വര്‍ഷമായി തന്റെ വീട്ടില്‍ താമസിക്കുന്നത് ജോര്‍ജ് എന്ന സത്യസന്ധനായ മലയാളിയാണെന്നുമായിരുന്നു രാഷ്ട്രപതി വാക്കുകള്‍. രാഷ്ട്രപതി കേരളത്തിലെത്തിയത് അറിഞ്ഞപ്പോള്‍ ഔദ്യോഗിക കാര്യങ്ങള്‍ക്കായി കഴിഞ്ഞ മേയ് മുതല്‍ നാട്ടിലുള്ള ഈ വാടകക്കാരന്‍ കൂടിക്കാഴ്ചയ്ക്ക് സമയം ചോദിക്കുകയായിരുന്നു.

ആളെ തിരിച്ചറിഞ്ഞതിനാല്‍ അദ്ദേഹത്തിന്റെ ഓഫീസ് ഇതിന് അനുമതി നല്‍കി. രാഷ്ട്രപതി തന്നെക്കുറിച്ച് പറഞ്ഞത് റൂബന്‍ അറിഞ്ഞതും അധികൃതരില്‍ നിന്നു തന്നെയാണ്. എടത്വ സ്വദേശിയെങ്കിലും ജനിച്ചതും വളര്‍ന്നതും കാണ്‍പുരിലാണ്. അവിടെ ജോലി ചെയ്തിരുന്ന മാതാപിതാക്കള്‍ വിരമിച്ച ശേഷം നാട്ടില്‍ തിരിച്ചെത്തിയെങ്കിലും ജനിച്ച നാട്ടിലാണു റൂബന്‍ താമസിക്കുന്നത്. രണ്ടു വര്‍ഷം മുമ്പാണ് രാംനാഥ് കോവിന്ദിനെ അവസാനമായി കണ്ടതെന്ന് റൂബന്‍ പറഞ്ഞു.

നാവിക സേനാവിമാനത്താവളത്തില്‍ വി.വി.ഐ.പി. ലോഞ്ചിലായിരുന്നു രാഷ്ട്രപതിയുമായുള്ള റൂബന്റെ കൂടിക്കാഴ്ച.