ചാണ്ടിയും ഫൈസലും... ജനജാഗ്രതാ യാത്ര മുന്നേറുമ്പോള് അണികള് അസംതൃപ്തരെന്ന് റിപ്പോര്ട്ട് ; കൊഴിഞ്ഞു പോക്കുണ്ടാകുമെന്ന സംശയത്താല് കരുതലോടെ നേതൃത്വം
ജനജാഗ്രതാ യാത്ര മുന്നേറുമ്പോള് സംസ്ഥാന ഭരണത്തില് അസ്വസ്ഥരായി സിപിഎം അണികള്. ദിലീപിന്റെ അറസ്റ്റോടെയും സോളാര് കേസോടെയും പൊതുവേ ഉയര്ന്നു നിന്ന സര്ക്കാരിന്റെ ഗ്രാഫ് പൊടുന്നനെയാണ് തകര്ന്നു വീണത്. എരിതീയില് എണ്ണ ഒഴിക്കുന്ന മട്ടിലുള്ള പ്രധാന ഘടക കക്ഷിയായ സി പി ഐ യുടെ നിലപാടുകള് കൂടിയായപ്പോള് സര്ക്കാര് വലിയ പ്രതിസന്ധിയിലായി.
തോമസ് ചാണ്ടിയും കാരാട്ട് ഫൈസലുമാണ് സര്ക്കാരിനെ പ്രതിസന്ധിയിലാക്കിയത്. തോമസ് ചാണ്ടി രാജിവയ്ക്കണമെന്നു തന്നെയാണ് സി പി എം അണികളില് ഒരു നല്ല ശതമാനവും വിശ്വസിക്കുന്നത്. അദ്ദേഹം കായല് കൈയേറി എന്ന് തന്നെ അണികള് വിശ്വാസിക്കുന്നത്. അദ്ദേഹം അസാമാന്യനാണെന്നും അവര്ക്കറിയാം. തോമസ് ചാണ്ടി വിരല് ഞ്ഞൊടിക്കുന്നതനുസരിച്ചാണ് സി പി എം നേതാക്കള് സഞ്ചരിക്കുന്നതെന്നും അണികള്ക്കറിയാം. വന് പ്രതിസന്ധികള് പാര്ട്ടി അനുഭവിച്ചിട്ടും തോമസ് ചാണ്ടിയെ പാര്ട്ടി സര്വാത്മനാ പിന്തുണക്കുന്നുണ്ടെങ്കില് അതിനു പിന്നില് എന്തെങ്കിലും ഉണ്ടെന്ന് അണികള് കരുതുന്നു.
പിണറായി വിജയന് തോമസ് ചാണ്ടിയെ പിന്തുണക്കില്ലെന്ന് കരുതുന്നവരാണ് ഏറെയും. എന്നാല് സംഭവിച്ചത് മറ്റൊന്നാണ്. സോളാര് കേസില് യാതൊരു ക്രെഡിബിലിറ്റിയും ഇല്ലാത്ത കത്തില് വരെ മുഖ്യമന്ത്രി കേസെടുത്തപ്പോള് മാധ്യമങ്ങള് തെളിവു സഹിതം മന്ത്രിയുടെ കൈയേറ്റങ്ങളുടെ പേരില് കേസെടുക്കുമെന്നു തന്നെ അണികള് പ്രതീക്ഷിച്ചു. എന്നാല് അതുണ്ടായില്ല.
അതേ സമയം സി പി ഐ ഗ്ലാമറിലേക്ക് കുതിക്കുകയാണ്. സി പി ഐ മന്ത്രി ചന്ദ്രശേഖരനാണ് കാനത്തിന്റെ അറിവോ സമ്മതമോ ഇല്ലാതെ വെടിമരുന്നിന് തീ കൊളുത്തിയത്. അത് ആളികത്തുമെന്ന് മന്ത്രിക്കറിയാമായിരുന്നു. ആദ്യം സി പി എമ്മുമായി നേരിട്ട് കൊമ്പുകോര്ക്കാതെ മാറി നിന്ന കാനത്തിന് മറ്റൊരു മാര്ഗവുമില്ലാതായി. അദ്ദേഹവും റവന്യം മന്ത്രിക്ക് പിന്തുണയുമായെത്തി. അഡ്വക്കേറ്റ് ജനറലിന്റെ നിലപാട് എന്തു തന്നെയായാലും സി പി എം നോമിനി എന്ന നിലയില് അദ്ദേഹത്തിന്റെ നിലപാടുകളെ സി പി എമ്മിന്റെ നിലപാടുകള് ആയി മാത്രമേ ജനം അംഗീകരിക്കുകയുള്ളു. ഇതും അണികളെ ക്ഷോഭിപ്പിക്കുന്നു.
കാരാട്ട് റസാഖിന്റെ വാഹനത്തില് കോടിയേരി കയറിയത് സംബന്ധിച്ചുണ്ടായ വിവാദങ്ങളുടെ പ്രഭവ കേന്ദ്രം സി പി എം തന്നെയാണ്. സംസ്ഥാനത്തെ മാധ്യമ പ്രവര്ത്തകര്ക്കറിയില്ല കാരാട്ട് റസാഖിന്റെ വണ്ടിയിലാണ് കോടിയേരി കയറിയത്. എന്നാല് അക്കാര്യം മാധ്യമ പ്രവര്ത്തകരെ അറിയിച്ചതും സി പി എം അണികള് തന്നെയാണ്. അണികള്ക്കിടയില് പ്രകടമായ അസംതൃപ്തി തന്നെയാണ് കാരണം.
ദിലീപിനെതിരെയും ഉമ്മന് ചാണ്ടിക്കെതിരെയും ഉണ്ടായ വിവാദങ്ങളില് യാതൊരു പുരോഗതിയുമില്ലാത്തത് കേസുകള് പറഞ്ഞു തീര്ത്തു എന്ന ചിന്തയിലേക്കാണ് അണികളെ കൊണ്ടെത്തിച്ചിരിക്കുന്നത്. ദിലീപിനെതിരായ കേസും സോളാര് കേസും കൊട്ടിഘോഷിച്ചാണ് കൊണ്ടുവന്നത്. ദിലീപ് നടിയെ ആക്രമിച്ച കേസില് ഒന്നാം പ്രതിയാണെന്ന് ആലുവയില് യോഗം ചേര്ന്ന ഉയര്ന്ന പോലീസ് ഉദ്യോഗസ്ഥര് മാധ്യമങ്ങള്ക്ക് ചോര്ത്തി നല്കി. എന്നിട്ടും ഒന്നും സംഭവിച്ചില്ല. സോളാര് മാനഭംഗം അന്വേഷിക്കാന് ഒരു പ്രത്യേക ടീമിനെ ചുമതലപ്പെടുത്തി. എന്നിട്ട് അതേ കേസില് സുപ്രീം കോടതി ജഡ്ജിയില് നിയമോപദേശം തേടി. ഇങ്ങനെ വേണ്ടിയിരുന്നെങ്കില് നേരത്തെ നിയമോപദേശം തേടി കൂടായിരുന്നോ എന്നാണ് അണികള് ചോദിക്കുന്നത്.
ചുരുക്കത്തില് സര്ക്കാര് കൊടിയ പ്രതിസന്ധികള് നേരിട്ട് എങ്ങനെ മുന്നോട്ടു പോകുമെന്ന അവസ്ഥയിലാണ്. കലക്കവെള്ളത്തില് മീന് പിടിക്കുന്ന സിപിഐ വല്യേട്ടന് ചമഞ്ഞ് സിപിഎമ്മിനെ വെട്ടിലാക്കി. ഇതെല്ലാം എവിടെ പോയി നില്ക്കുമെന്ന് കണ്ടറിയാം. നേരത്തെ പാര്ട്ടിയില് നിന്നും വന്തോതില് കൊഴിഞ്ഞു പോക്കുണ്ടായപ്പോഴും ഇതു തന്നെയായിരുന്നു അവസ്ഥ. കൊഴിഞ്ഞു പോകുന്ന സഖാക്കള് ചെന്നെത്തുന്നത് ബി ജെ പി യിലാണ്. പാര്ട്ടി പാവങ്ങളുടേതല്ലെന്ന തിരിച്ചറിവിലാണ് അണികള്.
https://www.facebook.com/Malayalivartha
