പുതുച്ചേരിയിൽ വാഹനം റജിസ്റ്റർ ചെയ്ത് നികുതി വെട്ടിപ്പ് നടത്തിയ കേസിൽ സുരേഷ് ഗോപി എംപിക്ക് ജാമ്യം. ഒരു ലക്ഷം രൂപ ബോണ്ട് കെട്ടിവയ്ക്കണമെന്ന് ഹൈക്കോടതി നിർദേശിച്ചു. ചോദ്യം ചെയ്യലിന് എല്ലാ ശനിയാഴ്ചയും അന്വേഷണ സംഘത്തിനു മുന്നിൽ ഹാജരാകണമെന്നും ചോദ്യം ചെയ്യലിൽ ഇടപെടരുതെന്നും ഹൈക്കോടതി നിർദേശിച്ചു.

2010 മുതലാണ് നികുതിവെട്ടിപ്പ് നടത്തിയിരിക്കുന്നത്. 80 ലക്ഷത്തോളം വിലവരുന്ന ഒഡിക്യൂ കാറാണ് സുരേഷ് ഗോപി പോണ്ടിച്ചേരിയില്‍ രജിസ്റ്റര്‍ ചെയ്തത്. അവിടുത്തെ ആര്‍ടി ഓഫീസിലെ രേഖകള്‍ പ്രകാരം ത്രി സിഎ കാര്‍ത്തിക് അപ്പാര്‍ട്‌മെന്റ്‌സ്, 100 ഫീറ്റ് റോഡ്, എല്ലെപിള്ളെച്ചാവടി, പോണ്ടിച്ചേരി എന്ന വിലാസമാണ് സുരേഷ്‌ഗോപി നല്‍കിയിരിക്കുന്നത്.

പക്ഷെ ഈ വിലാസത്തില്‍ താമസിക്കുന്നവര്‍ക്കോ ഈ ഫളാറ്റില്‍ താമസിക്കുന്നവര്‍ക്കോ സുരേഷ് ഗോപിയെ കണ്ടു പരിചയം പോലുമില്ല. ഈ വിലാസത്തില്‍ രജിസ്റ്റര്‍ ചെയ്ത് നികുതി വെട്ടിപ്പ് നടത്തിയ കാറാണ് എംപി എന്ന നിലയില്‍ തന്റെ ഔദ്യോഗിക വാഹമായി സുരേഷ് ഗോപി ഉപയോഗിക്കുന്നത്.

2013ല്‍ ഗതാഗത നിയമലംഘനത്തിനെതിരെയുള്ള പരസ്യത്തില്‍ അഭിനയിച്ചപ്പോഴും സുരേഷ് ഗോപി ഉപയോഗിച്ചിരുന്നത് നികുതി വെട്ടിപ്പ് നടത്തിയ അതേ ഓഡി കാറാണ്. റോഡില്‍ സുരക്ഷ ഉറപ്പുവരുത്തുക, ഒരു കാര്‍ ഓടിക്കുമ്പോള്‍ വേണ്ട മുന്‍കരുതലുകള്‍, സീറ്റ് ബെല്‍റ്റ്, മൊബൈല്‍ ഫോണ്‍ ഉപയോഗം, യെല്ലോ ലൈന്‍ തുടങ്ങിയവയെക്കുറിച്ച് സുരേഷ് ഗോപി പൊതുജനങ്ങള്‍ക്ക് ബോധവല്‍ക്കരണം നല്‍കുന്നതാണ് പരസ്യം. അന്നെങ്ങും താരം സ്വപ്‌നം പോലും കണ്ടിട്ടുണ്ടാവില്ല ഈ പരസ്യവും കാറും കുരിശായി തീരുമെന്ന്. ഹൈക്കോടതി ജാമ്യം നല്‍കിയത് കൊണ്ട് മാത്രമാണ് താരത്തെ ക്രൈംബ്രാഞ്ച് അറസ്റ്റ് ചെയ്യാത്തത്.

കേരളത്തില്‍ കാര്‍ രജിസ്റ്റര്‍ ചെയ്തിരുന്നുവെങ്കില്‍ 15 ലക്ഷത്തോളം രൂപ സംസ്ഥാന സര്‍ക്കാരിന് നികുതിയായി സുരേഷ് ഗോപി നല്‍കണമായിരുന്നു. പോണ്ടിച്ചേരിയില്‍ വാഹനം രജിസ്റ്റര്‍ ചെയ്തതിലൂടെ സംസ്ഥാന ഖജനാവിന് നഷ്ടം വരുത്തിയതായി ക്രൈംബ്രാഞ്ച് കണ്ടെത്തിയിരുന്നു. വ്യാജ രേഖയുണ്ടാക്കിയെന്ന് ക്രൈംബ്രാഞ്ച് കണ്ടെത്തിയ വാര്‍ത്ത പുറത്ത് വന്നതിന് ശേഷം സുരേഷ് ഗോപി മോട്ടോര്‍ വാഹനവകുപ്പിന് രേഖകള്‍ നല്‍കിയെങ്കിലും ഇത് തൃപ്തികരമല്ലെന്ന് ഐ.ജി അറിയിച്ചിരുന്നു.

അന്വേഷണവുമായി സുരേഷ് ഗോപി സഹകരിക്കുന്നില്ലെന്ന് സര്‍ക്കാര്‍ ഹൈക്കോടതിയെ അറിയിച്ചു. ഇതോടെ കൂടുതല്‍ വെട്ടിലായിരിക്കുകയാണ് സുരേഷ് ഗോപി. അതിനിടെയാണ് അഞ്ച് വര്‍ഷം മുമ്പ് ഗതാഗത ബോധവല്‍ക്കരണത്തിനായി താരം അഭിനയിച്ച പരസ്യം സ്വയം കുഴിച്ച കുഴിയായി തീരുന്നത്. സോഷ്യല്‍ മീഡിയയില്‍ ഈ പരസ്യം ഉപയോഗിച്ച് താരത്തെ ട്രോളുകയാണ്.