ശശീന്ദ്രനെതിരെ ഹര്ജി നല്കിയ മഹാലക്ഷ്മി ആരെന്ന് കണ്ടെത്തി, സ്വമേധയാ ഹര്ജി നല്കിയതാണെന്ന് മഹാലക്ഷ്മിയുടെ മകള്
ഗതാഗതമന്ത്രി എ.കെ ശശീന്ദ്രനെതിരായ ഫോണ് കെണി കേസ് അവസാനിപ്പിക്കരുതെന്ന് കോടതിയില് ഹര്ജി നല്കിയത് മുന്മന്ത്രി തോമസ് ചാണ്ടിയുമായി അടുപ്പമുള്ള വൃത്തങ്ങളെന്ന് വ്യക്തമായി. തോമസ് ചാണ്ടിയുടെ പി.എ ശ്രീകുമാറിന്റെ കുട്ടികളെ നോക്കുന്ന തിരുവനന്തപുരം തൈക്കാട് സ്വദേശി മഹാലക്ഷ്മിയാണ് ഹര്ജിക്കാരിയെന്ന് കണ്ടെത്തി. അമ്മ സ്വന്തം നിലയ്ക്കാണ് ഹര്ജി നല്കിയതെന്ന് മഹാലക്ഷ്മിയുടെ മകള് മാധ്യമങ്ങളോട് പറഞ്ഞു. ചാനല് പ്രവര്ത്തകയോട് ശശീന്ദ്രന് ഫോണിലൂടെ അശ്ലീല സംഭാഷണം നടത്തിയ കേസില് പരാതിക്കാരി പിന്മാറിയിട്ടും മഹാലക്ഷ്മി പൊതുതാല്പര്യഹര്ജിയുമായി തിരുവനന്തപുരം സി.ജെ.എം കോടതിയെ സമീപിക്കുകയായിരുന്നു.
കോടതി മഹാലക്ഷ്മിയുടെ ഹര്ജി തള്ളിയാണ് ശശീന്ദ്രനെ കുറ്റവിമുക്തനാക്കിയത്. തുടര്ന്ന് ഇവര് ഹൈക്കോടതിയില് ഹര്ജി നല്കി. പരാതിക്കാരിയെ ഭീഷണിപ്പെടുത്തിയാണ് കേസ് പിന്വലിപ്പിച്ചതെന്നും സ്ത്രീകളുടെ സുരക്ഷയെ ബാധിക്കുന്ന പ്രശ്നമായതിനാല് ശശീന്ദ്രനെ കുറ്റവിമുക്തനാക്കിയ കീഴ്ക്കോടതി വിധി റദ്ദാക്കണമെന്നാണ് ഹൈക്കോടതിയില് നല്കിയ ഹര്ജിയില് ഇവര് ആവശ്യപ്പെടുന്നത്. തനിക്കെതിരെ ഹര്ജി നല്കിയതില് ദുരൂഹതയുണ്ടെന്ന് ശശീന്ദ്രന് വ്യക്തമാക്കിയിരുന്നു. അതിന് പിന്നില് തോമസ് ചാണ്ടിയാണെന്ന് ആക്ഷേപം ഉയര്ന്നിരുന്നു. അത് ശരിവയ്ക്കുന്ന രീതിയിലാണ് കാര്യങ്ങള് നീങ്ങുന്നത്.
മന്ത്രി ഔദ്യോഗികവസതിയില് വെച്ച് തന്നോട് അപമര്യാദയായി പെരുമാറിയെന്ന് ആരോപിച്ചാണ് മാധ്യമപ്രവര്ത്തക കോടതിയില് സത്യവാങ്മൂലം നല്കിയത്. അതിന് മുമ്പ് മന്ത്രിയുടെ അശ്ലീല സംഭാഷണമെന്ന പേരില് മംഗളം ചാനല് ശബ്ദ രേഖ പുറത്ത് വിട്ടിരുന്നു. അതോടെയാണ് കഴിഞ്ഞ മാര്ച്ചില് എ.കെ ശശീന്ദ്രന് രാജിവെച്ചത്. തുടര്ന്ന് എന്.സി.പിയില് നിന്ന് തോമസ് ചാണ്ടി മന്ത്രിയായി. കായല്കയ്യേറ്റത്തെ തുടര്ന്ന് ചാണ്ടി രാജിവെച്ചു. ഇതോടെ ആരാദ്യം കുറ്റവിമുക്തമാകും അവര്ക്ക് മന്ത്രിപദം എന്ന് പാര്ട്ടി തീരുമാനിച്ചു. ശശീന്ദ്രനെതിരായ കേസ് പിന്വലിക്കാന് മാധ്യമപ്രവര്ത്തക തീരുമാനിച്ചെങ്കിലും പിന്നീട് നിലപാട് മാറ്റിയിരുന്നു. അതിന് ശേഷമാണ് തന്നെ വിളിച്ചത് ശശീന്ദ്രനാണെന്ന് വ്യക്തമല്ലെന്ന് കോടതിയെ അറിയിച്ചത്. സംഭവത്തെ കുറിച്ച് അന്വേഷിച്ച ആന്റണി കമ്മിഷനും ശശീന്ദ്രനെ കുറ്റവിമുക്തനാക്കിയിരുന്നു. മാധ്യമപ്രവര്ത്തകയുടെ കേസിലും കുറ്റവിമുക്തനായതോടെ അദ്ദേഹം വീണ്ടും മന്ത്രിയായി. എന്നാല് മഹാലക്ഷ്മി ഹൈക്കോടതിയില് നല്കിയ ഹര്ജി ഡെമോക്ലീസിന്റെ വാള് പോലെ ശശീന്ദ്രന് മേല് നില്ക്കുന്നു.
https://www.facebook.com/Malayalivartha