ചെങ്ങന്നൂര് ഉപതെരഞ്ഞെടുപ്പും അടുത്ത ലോക്സഭാ തെരഞ്ഞെടുപ്പും ലക്ഷ്യമാക്കി മുന്നണികള് കെ.എം മാണിയെ സ്വന്തം കൂടാരത്തിലെത്തിക്കാന് ചരട് വലി തുടങ്ങി
ബാര്ക്കോഴക്കേസില് മൂന്നാം തവണയും വിജിലന്സ് കെ.എം മാണിയെ കുറ്റവിമുക്തനാക്കി റിപ്പോര്ട്ട് നല്കിയതോടെ കേരള രാഷ്ട്രീയത്തില് അദ്ദേഹത്തിന്റെ സ്വീകാര്യത വര്ദ്ധിക്കുന്നു. പ്രത്യേകിച്ച് ത്രിപുര നിയമസഭാ തെരഞ്ഞെടുപ്പില് സി.പി.എമ്മിനും കോണ്ഗ്രസിനും കിട്ടിയ കനത്ത പരാജയവും ബി.ജെ.പിയുടെ വിജയവും പുതിയ രാഷ്ട്രീയ അന്തരീക്ഷമാണ് കേരളത്തില് സൃഷ്ടിച്ചിരിക്കുന്നത്. കേരളാ കോണ്ഗ്രസിനെ കൂടെ കൂട്ടി ചെങ്ങന്നൂര് ഉപതെരഞ്ഞെടുപ്പ് വിജയിക്കാനാണ് എല്.ഡി.എഫും യു.ഡി.എഫും എന്.ഡി.എയും നോക്കുന്നത്. മുമ്പ് കേരളാ കോണ്ഗ്രസിന്റെ സീറ്റായിരുന്നു ചെങ്ങന്നൂര്. ക്രിസ്ത്യന് വോട്ടുകള് നിര്ണായകമായ മണ്ഡലത്തില് സി.പി.എം സജി ചെറിയാനെ കളത്തിലിറക്കിയത് വെറുതെയല്ല.
യു.ഡി.എഫ് സ്ഥാനാര്ത്ഥിയായി പി.സി വിഷ്ണുനാഥ് മല്സരിക്കാനില്ലെന്ന് വ്യക്തമാക്കിയതോടെ കേരളാ കോണ്ഗ്രസിന്റെ സഹായം കൂടിയേ തീരൂ എന്ന നിലപാടിലാണ് കോണ്ഗ്രസ്. ഉമ്മന്ചാണ്ടിയും മറ്റും ഇക്കാര്യം പാര്ട്ടിനേതൃത്വത്തെ അറിയിച്ചിട്ടുണ്ട്. ഉപതെരഞ്ഞെടുപ്പിന് ശേഷം അടുത്ത വര്ഷം പാര്ലമെന്റ് ഇലക്ഷന് വരുന്നുണ്ട്. മധ്യതിരുവിതാംകൂറില് ഏറെ സ്വാധീനമുള്ള കേരളാ കോണ്ഗ്രസിനെ ഒപ്പം കൂട്ടിയാലേ രക്ഷയുള്ളൂ എന്ന് യു.ഡി.എഫും എല്.ഡി.എഫും കരുതുന്നു. പാര്ലമെന്റ് തെരഞ്ഞെടുപ്പില് സ്വന്തം സ്ഥാനാര്ത്ഥിയെ എങ്ങനെയും ജയിപ്പിക്കാനുള്ള ശ്രമമാണ് ബി.ജെ.പി നടത്തുന്നത്. മുമ്പ് പി.സി തോമസിനെ എന്.ഡി.എ സ്ഥാനാര്ത്ഥിയാക്കി ജയിപ്പിച്ചെങ്കിലും കേരളത്തില് താമര വിരിഞ്ഞില്ലെന്ന ആക്ഷേപം അന്നുയര്ന്നിരുന്നു.
എന്.ഡി.എയില് നിന്ന് അകന്ന് പോകാനിരുന്ന ബി.ഡി.ജെ.എസിനെ കുമ്മനവും കൂട്ടരും അനുനയിപ്പിച്ച് നിര്ത്തിയിരിക്കുകയാണ്. കൂട്ടത്തില് കേരളാ കോണ്ഗ്രസിനെ കൂടെ കിട്ടിയില് മധ്യതിരുവിതാംകൂറിലെ ലോക്സഭാ സീറ്റുകളും അടുത്തനിയമസഭാ തെരഞ്ഞെടുപ്പില് നിയമസഭാ സീറ്റുകളും നേടാനാവുമെന്ന് ബി.ജെ.പി കേരള ഘടകത്തിനറിയാം. അതിനാല് ജോസ് കെ. മാണിയെ മന്ത്രിയാക്കാമെന്ന് അടക്കമുള്ള വാഗ്ദാനങ്ങള് ബി.ജെ.പി മുന്നോട്ട് വയ്ക്കുന്നുണ്ട്. മതേതരകക്ഷികളുമായി ചേര്ന്ന് മുന്നോട്ട് പോകാനാണ് കേരളാ കോണ്ഗ്രസിന്റെ തീരുമാനം. എന്.ഡി.എയ്ക്ക് ഒപ്പം പോകാനായിരുന്നെങ്കില് നേരത്തെ ആകാമായിരുന്നെന്നാണ് കേരളാ കോണ്ഗ്രസ് വൃത്തങ്ങള് പറയുന്നത്.
https://www.facebook.com/Malayalivartha
