അന്യസംസ്ഥാന തൊഴിലാളികളെ സപ്ളൈ ചെയ്ത് കമ്മിഷന് വാങ്ങുന്നവര്ക്കും നോക്കുകൂലിക്കാര്ക്കും പിടിവീഴുന്നു
നോക്കുകൂലിയും തൊഴിലാളികളെ സപ്ളൈ ചെയ്യുന്നതും തൊഴില്രംഗത്തെ മറ്റു ദുഷ്പ്രവണതകളും അവസാനിപ്പിക്കുമെന്ന് മുഖ്യമന്ത്രി പിണറായി വിജയന് നിയമസഭയില് പറഞ്ഞു. ഇക്കാര്യം ആലോചിക്കുന്നതിന് പ്രധാന ട്രേഡ് യൂണിയന് സംഘടനകളുടെ യോഗം ഉടനെ വിളിച്ചുചേര്ക്കുമെന്നും അദ്ദേഹം അറിയിച്ചു. നോക്കിനില്ക്കുന്നവര് കൂലി ചോദിക്കുന്ന സ്ഥിതി ഒരു ട്രേഡ് യൂണിയനും അംഗീകരിക്കുന്നില്ല. എന്നിട്ടും സംസ്ഥാനത്ത് ഈ പ്രവണത നിലനില്ക്കുകയാണ്.
തൊഴിലാളി സംഘടന തൊഴിലാളികളുടെ പ്രശ്നങ്ങള് കൈകാര്യം ചെയ്യാനുള്ളതാണ്. എന്നാല് ചില പ്രദേശങ്ങളില് പ്രവൃത്തിക്ക് തൊഴിലാളികളെ സപ്ലൈ ചെയ്യുന്ന ജോലി സംഘടനകള് ഏറ്റെടുക്കുന്നുണ്ട്. ഇതും അവസാനിപ്പിച്ചേ പറ്റൂ. ഈ നിയമവിരുദ്ധ പ്രവണത ഒരു ട്രേഡ് യൂണിയനും അംഗീകരിക്കുന്നില്ലെന്നും അദ്ദേഹം പറഞ്ഞു. സംസ്ഥാനത്ത് പലയിടങ്ങളിലും അന്യസംസ്ഥാന തൊഴിലാളികളെ വിവിധ തൊഴിലിടങ്ങളിലേക്ക് കരാറുകാരും ഇടനിലക്കാരും സപ്ളൈ ചെയ്യുന്നുണ്ട്. ഇവര് ഉടമയില് നിന്നും തൊഴിലാളികളില് നിന്നും കമ്മിഷന് കൈപ്പറ്റുന്നുണ്ട്. നിരവധി പരാതികള് ഉയര്ന്നിട്ടുണ്ടെങ്കിലും ഇതേക്കുറിച്ച് ഔദ്യോഗികമായി പ്രതികരിക്കുന്നത് ആദ്യമായാണ്.
വ്യവസായരംഗത്ത് ദുഷ്പേരുണ്ടാക്കുന്നത് നോക്കുകൂലിയും തൊഴിലാളികളെ സപ്ലൈ ചെയ്യുന്ന പ്രവണതയുമാണെന്നും മുഖ്യമന്ത്രി ചൂണ്ടിക്കാട്ടി. അല്ലാതെ തൊഴില്പ്രശ്നങ്ങളൊന്നും കേരളത്തില് ഒരു വ്യവസായത്തെയും ബാധിച്ചിട്ടില്ല. തൊഴില്പ്രശ്നങ്ങള്മൂലം ഒരു വ്യവസായവും മുടങ്ങിയിട്ടില്ല. തൊഴിലാളികളെക്കുറിച്ച് വ്യവസായികള്ക്കും പരാതിയില്ല. വ്യവസായ അന്തരീക്ഷം മെച്ചപ്പെടുത്തുന്നതിന് ഇത്തരം പ്രവണതകള് അവസാനിപ്പിക്കണം. പുനലൂരിലെ സുഗതന്റെ ആത്മഹത്യ സംബന്ധിച്ച് അടൂര്പ്രകാശ് നല്കിയ അടിയന്തരപ്രമേയ നോട്ടീസിന് മറുപടി പറയുമ്പോഴാണ് നോക്കുകൂലി അവസാനിപ്പിക്കുന്നതിനുള്ള നടപടികളെക്കുറിച്ച് മുഖ്യമന്ത്രി വിശദീകരിച്ചത്.
https://www.facebook.com/Malayalivartha
