നാദാപുരം വളയത്ത് ബി.ജെ.പി. പ്രവര്‍ത്തകന്റെ വീടിന് നേരെ ബോംബേറ്. വളയം ചെക്കോറ്റയിലെ കാവേരിയില്‍ ബാലകൃഷ്ണന്റെ വീടിന് നേരെയാണ് തിങ്കളാഴ്ച രാത്രി എട്ടരയോടെ ബോംബേറ് നടന്നത്. വീടിനു നേരെ എറിഞ്ഞ ബോംബ് വീടിന്റെ ടെറസില്‍ തട്ടി പൊട്ടിത്തെറിക്കുകയായിരുന്നു. സ്‌ഫോടനത്തിന്റെ ആഘാതത്തില്‍ വീട്ടു മുറ്റത്ത് നിര്‍ത്തിയിട്ട കാറിന്റെ പിന്‍ ഭാഗത്തെ ചില്ല് തകര്‍ന്നു. വീടിനും കേടുപാടുകള്‍ പറ്റിയിട്ടുണ്ട്. ബാലകൃഷ്ണന്റെ മകന്‍ വിപിന്‍ ആര്‍.എസ്.എസ്.പ്രവര്‍ത്തകനാണ്.

രണ്ടു മാസങ്ങള്‍ക്ക് മുമ്പും വീടിനു നേരെ അക്രമം നടന്നിരുന്നു. ഇപ്പോള്‍ വളയം മേഖലയില്‍ സമാധാനാന്തരീക്ഷം നിലനില്‍ക്കുന്നതിനിടയിലാണ് വീണ്ടും വീടിനു നേരെ അക്രമം നടക്കുന്നത്. വളയം പൊലീസ് സ്ഥലത്തെത്തി പരിശോധന നടത്തിയെങ്കിലും ബോംബെറിഞ്ഞവരെ കണ്ടെത്താന്‍ കഴിഞ്ഞിട്ടില്ല.

സംഭവത്തില്‍ ബി.ജെ.പി.വളയം പഞ്ചായത്ത് കമ്മിറ്റി പ്രതിഷേധം രേഖപ്പെടുത്തി. അക്രമികളെ എത്രയും വേഗം പിടികൂടി നിയമത്തിനു മുമ്പില്‍ കൊണ്ടുവരണമെന്ന് യോഗം ആവശ്യപ്പെട്ടു.