സിപിഎം കണ്ണൂര്‍ ജില്ലാ സെക്രട്ടറി പി ജയരാജന് വധഭീഷണിയെന്നു പോലീസ് റിപ്പോര്‍ട്ട്. ജയരാജനെ വധിക്കാന്‍ ആര്‍എസ്എസ് പ്രൊഫഷണല്‍ ക്വട്ടേഷന്‍സംഘങ്ങളെ നിയോഗിച്ചതായി പൊലീസ് രഹസ്യാന്വേഷണവിഭാഗത്തിന് വിവരം ലഭിച്ചു. അതീവജാഗ്രത പുലര്‍ത്തണമെന്നാവശ്യപ്പെട്ട് കണ്ണൂര്‍ ജില്ലാ പൊലീസ് മേധാവി ജില്ലയിലെ ഡിവൈഎസ്പിമാര്‍ക്കും സ്‌റ്റേഷന്‍ ഹൗസ് ഓഫീസര്‍മാര്‍ക്കും അടിയന്തരസന്ദേശമയച്ചു. ജയരാജന്റെ സുരക്ഷ കര്‍ശനമാക്കി.

ബിജെപി ആര്‍എസ്എസ് പ്രവര്‍ത്തകന്‍ പ്രനൂബ് അടങ്ങുന്ന ബിജെപി ആര്‍എസ്എസ് സംഘമാണ് നീക്കത്തിന് പിന്നില്‍ എന്നും റിപ്പോര്‍ട്ടില്‍ പറയുന്നു. ഇത് സംബന്ധിച്ച അടിയന്തിര സന്ദേശം എല്ലാ സ്‌റ്റേഷനുകളിലേക്കും ജില്ലാ പൊലീസ് മേധാവി കൈമാറി. നിലവില്‍ വാളാങ്കിച്ചാല്‍ മോഹനന്‍ വധക്കേസില്‍ ഒളിവിലാണ് പ്രനൂബ്.

യാത്രയ്ക്കിടെ ആക്രമിച്ചുകൊല്ലാനാണ് പദ്ധതി എന്ന രഹസ്യവിവരമാണ് ലഭിച്ചതെന്നറിയുന്നു. പദ്ധതി നടപ്പായാല്‍, കേരളത്തിലുടനീളം അക്രമവും കലാപവും നടക്കുമെന്നും അതിന്റെ മറവില്‍ കേന്ദ്ര ഇടപെടലടക്കമുള്ള അജന്‍ഡ നടപ്പാക്കാനാകുമെന്നുമാണ് കണക്കൂകൂട്ടല്‍. ആവശ്യമായ പണവും വാഹനങ്ങളും ക്വട്ടേഷന്‍ സംഘങ്ങള്‍ക്ക് ലഭ്യമാക്കിയിട്ടുണ്ട്. 

ആര്‍എസ്എസ് നിയന്ത്രണത്തിലുള്ള പുത്തന്‍കണ്ടം ക്വട്ടേഷന്‍ സംഘത്തിലെ പ്രധാനിയും ചക്കരക്കല്‍, കടമ്ബൂര്‍ പൂങ്കാവ്, പാലയാട് സാമിക്കുന്നുമ്ബ്രം, മേലൂര്‍ പാലം, പൊന്ന്യം നായനാര്‍ റോഡ് പ്രദേശങ്ങളിലെ ക്രിമിനലുകളും സംഘത്തിലുണ്ടെന്നാണ് പൊലീസിനുലഭിച്ച വിവരം.

കതിരൂര്‍ മനോജ് വധം, രഞ്ജിത്ത് വധം തുടങ്ങിയ സംഭവങ്ങളുമായി ബന്ധപ്പെട്ട പകയാണ് പദ്ധതിക്ക് പിന്നിലെന്നും റിപ്പോര്‍ട്ടില്‍ പറയുന്നു. ക്വട്ടേഷന്‍ സംഘങ്ങള്‍ വഴി പണവും വാഹനവും ഇവര്‍ കണ്ടെത്തിയതായും റിപ്പോര്‍ട്ടില്‍ വ്യക്തമാക്കുന്നുണ്ട്. പ്രധാനപ്പെട്ട് പാര്‍ട്ടി ഓഫീസുകള്‍ ആക്രമിക്കാനും ഈ സംഘത്തിന് പദ്ധതിയുള്ളതായും റിപ്പോര്‍ട്ടില്‍ പറയുന്നു.

കണ്ണൂരിലെ എല്ലാ രാഷ്ട്രീയപാര്‍ട്ടികളിലും ഉള്‍പ്പെട്ട ക്രിമിനല്‍ സംഘങ്ങളെ പൊലീസ് പ്രത്യേകമായി നിരീക്ഷിക്കുന്നുണ്ട്. ഇതിന്റെ അടിസ്ഥാനത്തിലാണ് ജയരാജനെ വകവരുത്താനുള്ള നീക്കം കണ്ടെത്താന്‍ വഴിയൊരുങ്ങിയത്. കണ്ണൂര്‍ സിപിഎമ്മില്‍ പ്രധാനി ഇപ്പോള്‍ പി ജയരാജനാണ്. പാര്‍ട്ടി ജില്ലാ സെക്രട്ടറിക്ക് മറ്റ് നേതാക്കളേക്കാള്‍ അണികള്‍ക്കിടയില്‍ സ്വാധീനമുണ്ട്. മുഖ്യമന്ത്രി പിണറായി വിജയന്‍ വിചാരിച്ചിട്ട് പോലും ജയരാജനെ കണ്ണൂര്‍ ജില്ലാ സെക്രട്ടറി സ്ഥാനത്ത് നിന്ന് മാറ്റാന്‍ കഴിഞ്ഞില്ല. വ്യക്തിപൂജാ വിവാദമടക്കം ഉയര്‍ത്തിക്കൊണ്ടു വന്നതും ജയരാജനെ സ്ഥാനത്ത് നിന്ന് മാറ്റുകയെന്ന ലക്ഷ്യത്തോടെയാണ്. അതും അണികള്‍ പ്രതിരോധിച്ചു.

പാര്‍ട്ടിക്കാരുടെ പ്രിയ നേതാവായി ജയരാജന്‍ മാറികഴിഞ്ഞു. അതുകൊണ്ട് തന്നെ ജയരാജനെതിരെ എന്തെങ്കിലും സംഭവിച്ചാല്‍ പോലും അത് കണ്ണൂര്‍ രാഷ്ട്രീയത്തെ പിടിച്ചുലയ്ക്കും. വലിയ ക്രമസമാധാന പ്രശ്‌നമായി മാറുകയും ചെയ്യും. അണികള്‍ മാത്രമാണ് കൊല്ലപ്പെടുന്നതെന്നും നേതാക്കളെല്ലാം സുഹൃത്തുക്കളാണെന്നും സോഷ്യല്‍ മീഡിയയില്‍ കണ്ണൂരിലെ അക്രമവുമായി ബന്ധപ്പെട്ട് പ്രചരിക്കാറുണ്ട്.

ഈ സാഹചര്യത്തില്‍ കൂടിയാണ് ജയരാജനെ വധിക്കാനുള്ള ഗൂഢാലോചന നടക്കുന്നതെന്നാണ് സൂചന. ഈ സാഹചര്യത്തിലാണ് ജയരാജന് ചുറ്റും പൊലീസ് സുരക്ഷ കൂട്ടുന്നത്. 1999ല്‍ തിരുവോണ നാളിലാണ് പി. ജയരാജനെ ആര്‍എസ്എസ്. ആക്രമിച്ചത്. കൈകളിലും കാലുകളിലും ഗുരുതര പരുക്കുകളേറ്റ ജയരാജന് ഇന്നും അവശതകളുണ്ട്. രണ്ട് പൊലീസ് ഗണ്‍മാന്മാരുടെ സുരക്ഷയാണു ജയരാജന് ഇപ്പോഴുള്ളത്.