കണ്ണൂര്‍ ജില്ലാ സെക്രട്ടറിയും പ്രമുഖ സിപിഎം നേതാവുമായ പി. ജയരാജനെ വധിക്കാന്‍ ശ്രമമെന്ന പോലീസ് റിപ്പോര്‍ട്ട് ചൂടുപിടിക്കുകയാണ്. അതേസമയം ഇതിനെതിരെ ബിജെപി ശക്തമായി രംഗത്തെത്തി. ജില്ലയില്‍ കലാപമുണ്ടാക്കാനും സിപിഎം ജില്ലാ സെക്രട്ടറി പി.ജയരാജനെ മഹത്വവല്‍ക്കരിക്കാനും വേണ്ടിയാണ് പൊലീസും സിപിഎം ഉം ജയരാജനെ വധിക്കാന്‍ സംഘപരിവാര്‍ ക്വട്ടേഷന്‍ കൊടുത്തെന്ന വാര്‍ത്ത മെനഞ്ഞതെന്ന് ബിജെപി ജില്ലാ പ്രസിഡണ്ട് പി.സത്യപ്രകാശ്. പൊലീസ് റിപ്പോര്‍ട്ടിനെ കുറിച്ച് സിപിഎം ഇതുവരെ ഔദ്യോഗികമായി പ്രതികരിക്കുന്നുമില്ല. റിപ്പോര്‍ട്ടിനെ കുറിച്ച് അറിയില്ലെന്നാണ് സിപിഎം നിലപാട്. എന്നാല്‍ ജയരാജന് പിറകെ എന്നും സംഘപരിവാര്‍ ഉണ്ടെന്നും അവര്‍ സമ്മതിക്കുന്നു.

ഇതിനിടെയാണ് പൊലീസിനെ രൂക്ഷമായ ഭാഷയില്‍ വിമര്‍ശിച്ച് ബിജെപി രംഗത്ത് വന്നത്. ജില്ലയില്‍ ഇപ്പോള്‍ നില നില്‍ക്കുന്ന സമാധാനാന്തരീക്ഷം തകര്‍ക്കാന്‍ വേണ്ടി പൊലീസിലെ ഒരു വിഭാഗവും സിപിഎം നേതൃത്വവും തയ്യാറാക്കിയ പൊറാട്ട് നാടകമാണ് പി. ജയരാജനെ വധിക്കാന്‍ സംഘപരിവാര്‍ നീക്കമെന്ന ആരോപണം. ഇത്തരം കെട്ടുകഥകള്‍ രചിക്കുന്നതിന് പകരം നിഷ്പക്ഷമായി നീതി നടപ്പാക്കാനാണ് പൊലീസ് ശ്രമിക്കേണ്ടതെന്ന് സത്യപ്രകാശ് പറഞ്ഞു.

സിബി.ഐ. അന്വേഷണം വരുമ്പോഴൊക്കെ പനിവരാറുള്ള പി.ജയരാജന് ഷുഹൈബ് വധക്കേസില്‍ സിബിഐ അന്വേഷണം വരുമെന്ന പേടികാരണമാണ് പുതിയ രാഷ്ട്രീയ തന്ത്രവുമായി രംഗത്തിറങ്ങിയിട്ടുള്ളതെന്ന് സത്യപ്രകാശ് പറഞ്ഞു. ഒരു കൂട്ടം പൊലീസ് ഉദ്യോഗസ്ഥരും ഇതിന് കൂട്ടായിട്ടുണ്ട്. കീഴാറ്റൂരിലെ വയല്‍ പ്രശ്‌നത്തില്‍ മുഖം നഷ്ടപ്പെട്ട സിപിഎം നേതൃത്വത്തിന്റെ ജാള്യത മറക്കാന്‍ ഈ ഇല്ലാക്കഥ ഉപകരിക്കുമോ എന്ന പരീക്ഷണമാണ് പൊലീസുമായി ചേര്‍ന്ന് രചിച്ചിട്ടുള്ളത്. ഇത്തരം നുണകള്‍ സിപിഎം പടച്ചു വിടുന്നത് പതിവാണ്. സംഘപരിവാര്‍ പ്രവര്‍ത്തകരെ അക്രമിച്ചപ്പോഴും കൊലപ്പെടുത്തിയപ്പോഴും സിപിഎം കൈകഴുകയാണ് പതിവ്.

എതിരാളികളെ കൊലപ്പെടുത്തിയാല്‍ സദാചാര വിഷയം ഉയര്‍ത്തി കാട്ടി കൊല്ലപ്പെട്ടവരെ അപമാനിക്കുന്ന സിപിഎം പിന്നീട് പ്രതികളാവുന്ന അവസ്ഥയാണ് കണ്ണൂരില്‍ കാണപ്പെടുന്നത്. അണ്ടലൂരിലെ സന്തോഷ് വധത്തിലും ഷുഹൈബ് വധക്കേസിലുമെല്ലാം നുണകള്‍ പടച്ചു വിട്ടിട്ടും സിപിഎം കാരാണ് പ്രതികളാവുന്നത്. ഏറ്റവും ഒടുവില്‍ കീഴാറ്റൂരിലെ സമരക്കാരെ വധിക്കാന്‍ ആര്‍.എസ്. എസ് നേതൃത്വം തീരുമാനിച്ചുവെന്നായിരുന്നു പൊലീസും സിപിഎം ജില്ലാ സെക്രട്ടറിയും പ്രചരിപ്പിച്ചത്. ഈ വിവരം പൊലീസിനും സിപിഎംനും ലഭിച്ചത് എവിടെ നിന്നാണെന്ന് ഇനിയെങ്കിലും വ്യക്തമാക്കണമെന്ന് സത്യപ്രകാശ് ആവശ്യപ്പെട്ടു.

മറ്റുള്ളവര്‍ക്ക് നേരെ ആരോപണങ്ങളും നുണക്കഥകളും പടച്ചു വിടുമ്പോഴും സിപിഎം അക്രമവും കൊലപാതകവും പതിവുപോലെ നടപ്പാക്കുകയാണ്. സമീപകാലത്ത് ജില്ലയില്‍ നടന്ന എല്ലാ കൊലപാതകങ്ങളും സിപിഎം നടത്തിയതാണ്. ഓരോ സമാധാന കമ്മിറ്റി യോഗം കഴിയുമ്പോഴും അവര്‍ തന്നെ തീരുമാനം ലംഘിക്കുന്നു. രഹസ്യാന്വേഷണ വിഭാഗം പി. ജയരാജനു നേരെ അക്രമമുണ്ടാവാനിടയുണ്ടെന്ന് കഴിഞ്ഞ ദിവസം മുന്നറിയിപ്പ് നല്‍കിയിരുന്നു. ഇതനുസരിച്ചാണ് ജയരാജന് സുരക്ഷ ശക്തമാക്കാന്‍ ജില്ലാ പൊലീസ് മേധാവി നിര്‍ദ്ദേശം നല്‍കിയത്.

പാര്‍ട്ടി ഓഫീസുകള്‍ അക്രമിക്കപ്പെട്ട സ്ഥലങ്ങളിലും മറ്റും പോകുമ്പോഴും ജയരാജന് പൊലീസ് സുരക്ഷ കുറവാണെന്നും ഈ ഘട്ടത്തില്‍ അക്രമിക്കപ്പെടാന്‍ സാധ്യതയുണ്ടെന്നുമുള്ള വിവരമാണ് പൊലീസ് നല്‍കിയിട്ടുള്ളത്. അതിന്റെ ഭാഗമായി ജില്ലയിലെ രാഷ്ട്രീയ പാര്‍ട്ടികളിലുള്ള ക്രിമിനല്‍ സംഘങ്ങളെ പൊലീസ് പ്രത്യേകമായി നിരീക്ഷിക്കുന്നുമുണ്ട്.