കരുണ, കണ്ണൂര്‍ മെഡിക്കല്‍കോളജ് ബില്ലിനെ ചൊല്ലി കോണ്‍ഗ്രസില്‍ പോര് മുറുകുമ്പോള്‍ വി.ടി ബല്‍റാം ബില്ലിനെ അനൂകൂലിച്ച് വോട്ട് ചെയ്‌തെന്ന് സോഷ്യല്‍ മീഡിയയിലൂടെ വ്യാജപ്രചരണം നടത്തുന്നു. ഭരണപക്ഷവും പ്രതിപക്ഷവും ഒരേ സ്വരത്തില്‍ പാസാക്കിയ ബില്ലിനെ എതിര്‍ത്തത് വി.ടി ബല്‍റാം മാത്രമായിരുന്നു. ഇന്നലത്തെ സുപ്രീംകോടതി ബില്‍ റദ്ദാക്കിയതോടെ വി.ടി ബല്‍റാമിന് സോഷ്യല്‍മീഡിയയിലും മറ്റും ജനപിന്തുണയേറി. ഇതോടെയാണ് വ്യാജപ്രചരണവുമായി ഇരുമുന്നണികളിലെയും ചിലര്‍ എത്തിയത്. ഇതേടെ ബല്‍റാം വിശദീകരണവുമായി രംഗത്തെത്തി. സഭയില്‍ വോട്ടെടുപ്പിന് മുമ്പ് പാര്‍ലമെന്ററി പാര്‍ട്ടിനേതാവ് കൂടിയായ ചെന്നിത്തല വിപ്പ് നല്‍കിയിരുന്നില്ലെന്ന് വി.ടി ബല്‍റാമിന്റെ ഫെയിസ്ബുക്ക് പോസ്റ്റ് വ്യക്തമാക്കുന്നു.

നിമസഭയില്‍ സ്വാശ്രയ കോളേജ് പ്രവേശനവുമായി ബന്ധപ്പെട്ട നിയമത്തിന്റെ വോട്ടെടുപ്പില്‍ ഞാന്‍ പങ്കെടുത്തിരുന്നില്ല. ആ ബില്ലിന്റെ ഉള്ളടക്കത്തോടുള്ള വിയോജിപ്പ് കാരണമായിരുന്നു വോട്ടെടുപ്പ് വേളയില്‍ സഭയില്‍ നിന്ന് വിട്ടുനിന്നത്. ബില്ലിനോടുള്ള എന്റെ എതിരഭിപ്രായം ആദ്യം ക്രമപ്രശ്‌നമായും പിന്നീട് മറ്റൊരംഗത്തിന്റെ പ്രസംഗ മധ്യേ ഇടപെട്ടും സഭയില്‍ വ്യക്തമായി ഉന്നയിച്ചിരുന്നു. എന്നാല്‍ ആരോഗ്യമന്ത്രിയുടെ വിശദീകരണത്തേത്തുടര്‍ന്ന് സ്പീക്കര്‍ ക്രമപ്രശ്‌നം തള്ളുകയായിരുന്നു. തുടര്‍ന്നും ആ പ്രക്രിയയില്‍ പങ്കെടുക്കുന്നത് ഉചിതമായി തോന്നാതിരുന്നത് കൊണ്ട് ബില്‍ വകപ്പു തിരിച്ചുള്ള ചര്‍ച്ചയിലേക്ക് കടക്കുന്നതിന് മുന്‍പ് തന്നെ പുറത്തു പോവുകയാണ് ചെയ്തതെന്ന് എം.എല്‍.എ വ്യക്തമാക്കി.

നിയമനിര്‍മ്മാണ ചര്‍ച്ചകളില്‍ അംഗങ്ങള്‍ക്ക് പൂര്‍ണ്ണമായ അഭിപ്രായ സ്വാതന്ത്ര്യം അനുവദിക്കുന്നതാണ് നിയമസഭയുടേയും പാര്‍ലമെന്ററി രീതികളുടേയും പൊതുസ്വഭാവം. പിന്നീട് വോട്ടെടുപ്പ് വേളയില്‍ പാര്‍ട്ടി വിപ്പ് ഉണ്ടെങ്കില്‍ അതനുസരിച്ച് വോട്ട് ചെയ്യേണ്ടി വരും. എന്നാല്‍ ഇന്നലത്തെ നിയമത്തില്‍ അങ്ങനെ വോട്ട് ചെയ്യാനുള്ള വിപ്പ് ഒന്നും ഉണ്ടായിരുന്നില്ല. ആ സ്വാതന്ത്ര്യം ഉപയോഗപ്പെടുത്തിക്കൊണ്ടാണ് ശരിയെന്ന് ബോധ്യമുള്ള അഭിപ്രായം രേഖപ്പെടുത്തിയതും തുടര്‍ന്ന് വിട്ടുനിന്നതും. പറയാനുള്ളത് പറഞ്ഞു കഴിഞ്ഞ സാഹചര്യത്തില്‍ കൂടുതല്‍ എംബരാസ്‌മെന്റ് സൃഷ്ടിക്കുന്നത് പാര്‍ലമെന്ററി രീതികള്‍ക്ക് ഉചിതമല്ല എന്ന കാഴ്ചപ്പാടിന്റെ അടിസ്ഥാനത്തിലാണ് അങ്ങനെ ചെയ്തത്. ഹാജരായിരുന്ന അംഗങ്ങളെ വച്ച് ശബ്ദവോട്ടോടെയാണ് പിന്നീട് സഭ നിയമം പാസാക്കിയത്.