ഏറെ വിവാദമായ പാറ്റൂര്‍ ഭൂമിയിടപാടില്‍ 4.36 സെന്റ് ഭൂമി കൂടി തിരിച്ച് പിടിക്കാന്‍ ലോകായുക്ത ഉത്തരവ്. മുമ്പ് 12 സെന്റ് ഭൂമി തിരിച്ച് പിടിക്കാന്‍ മുമ്പ് ലോകായുക്ത ഉത്തരവിട്ടതനുസരിച്ച് സര്‍ക്കാര്‍ ഏറ്റെടുത്തിരുന്നു. ഫഌറ്റ് നില്‍ക്കുന്ന ഭൂമിയിലെ 4.36 സെന്റ് ഏറ്റെടുക്കാനാണ് ഇന്ന് രാവിലെ ഉത്തരവിട്ടത്. പൊതുസമൂഹത്തിന് വേണ്ടിയാണ് ഉത്തരവെന്ന് ലോകായുക്ത ജഡ്ജി അറിയിച്ചു. വിധിക്കെതിരെ ഹൈക്കോടതിയെ സമീപിക്കുമെന്ന് ഫഌറ്റ് ഉടമകളായ ആര്‍ടെക് അറിയിച്ചു.

നിലവില്‍ സര്‍ക്കാര്‍ തിരിച്ചു പിടിച്ച 12 സെന്റ് ഭൂമി കൂടാതെ മറ്റൊരു നാല് സെന്റിലധികം പുറമ്പോക്ക് ഭൂമി കൂടെ ഇവിടെ ഫ്‌ളാറ്റ് ഉടമകള്‍ കൈവശം വച്ചിട്ടുണ്ടെന്നാണ് ലോകായുക്തയില്‍ സര്‍ക്കാര്‍ അറിയിച്ചിരുന്നു. കെട്ടിട്ടം സ്ഥിതി ചെയ്യുന്ന നാല് സെന്റ് ഉള്‍പ്പെടെ സര്‍ക്കാര്‍ ഭൂമിയില്‍ ഉള്‍പ്പെടുമെന്നാണ് ജില്ലാ സര്‍വേ സൂപ്രണ്ട് ലോകായുക്തയില്‍ ബോധിപ്പിച്ചിരുന്നു.

ജില്ലാ കലക്ടര്‍ സ്ഥലമേറ്റെടുത്ത് റിപ്പോര്‍ട്ട് നല്‍കണമെന്നും പുറമ്പോക്ക് ഭൂമി മതില്‍കെട്ടി തിരിക്കണമെന്നും ലോകായുക്ത നിര്‍ദേശിച്ചു. ഭൂമി കൈയേറിയതാണെന്ന് അമിക്കസ് ക്യൂറിയും അഭിഭാഷക കമ്മിഷനും കണ്ടെത്തിയതിനെ തുടര്‍ന്നാണു നടപടി. വിവാദമായ പാറ്റൂര്‍ കേസില്‍ 30 സെന്റ് ഭൂമിയിലാണ് സ്വകാര്യവ്യക്തി കെട്ടിടം നിര്‍മിച്ചിട്ടുള്ളത്. ആദ്യം പിടിച്ചെടുത്ത 12 സെന്റ് ഭൂമിയെ സംബന്ധിച്ച് തര്‍ക്കമില്ലായിരുന്നു. തര്‍ക്കമുള്ള നാല് സെന്റ് ഭൂമി സംബന്ധിച്ചാണ് ഇന്ന് വാദം കേട്ടത്. ഭൂമി തിരിച്ച് പിടിക്കുന്നതിനുള്ള നടപടികളുമായി ഫ്‌ളാറ്റ് ഉടമകള്‍ സഹകരിക്കണമെന്ന് ലോകായുക്ത നിര്‍ദേശിച്ചു.

പാറ്റൂരില്‍ 16 സെന്റിലധികം പുറന്‌പോക്ക് ഭൂമി ഉണ്ടെന്നാണ് ലോകായുക്തയുടെ കണക്കുകൂട്ടല്‍. പാറ്റൂരില്‍ സര്‍വേ നടത്തിയ ഉദ്യോഗസ്ഥര്‍ പല തരത്തിലുള്ള റിപ്പോര്‍ട്ടുകളാണ് ലോകായുക്തയില്‍ സമര്‍പ്പിച്ചത്. ജലസേചന വകുപ്പിന്റെ കീഴിലുള്ള പാറ്റൂര്‍ വലിയതുറ മലിനജല പ്ലാന്റിന്റെ പൈപ്പ് ലൈന്‍ പോകുന്ന 50 മീറ്റര്‍ ദൂരമുള്ള 16.5 സെന്റ് ഭൂമി സ്വകാര്യ ഫ്‌ളാറ്റ് ഉടമ കൈയേറിയെന്നായിരുന്നു എറണാകുളം സ്വദേശി ജോയ് കൈതാരം ഫയല്‍ ചെയ്ത ഹര്‍ജിയിലെ ആരോപണം.