നടിയെ ആക്രമിച്ച കേസില്‍ ട്രഷറര്‍ ദിലീപ് അറസ്റ്റിലായതിന് പിന്നാലെ താരസംഘടനയായ അമ്മയില്‍ ഉടലെടുത്ത ഭിന്നത രൂക്ഷമാകുന്നു. ഇനിയും സംഘടനയെ ചുമക്കാനില്ലെന്ന് പ്രസിഡന്റ് ഇന്നസെന്റ് വ്യക്തമാക്കിയതോടെയാണ് നേതൃത്വം പിടിച്ചെടുക്കാനുള്ള ചരട് വലി ശക്തമായത്. എല്ലാം രഹസ്യനീക്കങ്ങളിലൂടെയാണ് നടക്കുന്നത്. മാധ്യമങ്ങള്‍ക്ക് വാര്‍ത്ത ചോര്‍ത്തി കൊടുക്കരുതെന്ന് കര്‍ശന നിര്‍ദ്ദേശവും നല്‍കിയിട്ടുണ്ട്. മമ്മൂട്ടിയും ഇനി നേതൃസ്ഥാനത്തേക്കില്ലെന്ന് വ്യക്തമാക്കിയിട്ടുണ്ട്. ഗണേഷ്‌കുമാറും ഇടവേളബാബുവും അടങ്ങുന്ന സംഘം സംഘടനാ നേതൃസ്ഥാനത്തെത്താനുള്ള ശ്രമങ്ങള്‍ തുടങ്ങിയിട്ടുണ്ട്. മോഹന്‍ലാല്‍ ഉള്‍പ്പെടെയുള്ളവരുടെ പിന്തുണ ഗണേഷിനുണ്ട്. അതേസമയം നടി ആക്രമിക്കപ്പെട്ട സംഭവത്തില്‍ ദിലീപിന് പരസ്യപിന്തുണ നല്‍കിയ ഗണേഷ് കുമാറിനെ പ്രസിഡന്റ് സ്ഥാനത്തേക്ക് കൊണ്ടുവരരുതെന്ന് വിമന്‍ ഇന്‍ കളക്ടീവ് അംഗങ്ങളും യുവതാരങ്ങളും ആഗ്രഹിക്കുന്നു.

പൃഥ്വിരാജിനെ തലപ്പത്ത് കൊണ്ടുവരാനാണ് വിമന്‍ ഇന്‍ കളക്ടീവും യുവതാരങ്ങളും ആഗ്രഹിക്കുന്നത്. എന്നാല്‍ പൃഥ്വിരാജിന് തല്‍പര്യമില്ല. ബാലചന്ദ്രമേനോന് പ്രസിഡന്റ് സ്ഥാനം ഏറ്റെടുക്കണമെന്ന് ആഗ്രഹമുണ്ട്. മമ്മൂട്ടിക്ക് ഉള്‍പ്പെടെ അതിന് താല്‍പര്യവുമുണ്ട്. അതിനാല്‍ യുവതാരങ്ങളും വിമന്‍ ഇന്‍കളക്ടീവും ബാലചന്ദ്രമേനോനെ പിന്തുണയ്ക്കുമെന്നാണ് അറിയുന്നത്. ദീര്‍ഘകാലമായി ജനറല്‍ സെക്രട്ടറി, വൈസ് പ്രസിഡന്റ് പദവികള്‍ വഹിച്ച ഇടവേള ബാബു ഇത്തവണയും മല്‍സരത്തിനുണ്ടാകും. എന്നാല്‍ ഏത് പോസ്റ്റിലാണെന്ന് തീരുമാനമായിട്ടില്ല. ഗണേഷ് കുമാര്‍ നേതൃത്വം നല്‍കുന്ന പാനലിന് ചുക്കാന്‍ പിടിക്കുന്നത് ഇടവേള ബാബുവാണ്.

പ്രസിഡന്റായി നാലു തവണ തുടരുന്ന ഇന്നസെന്റ് നടിയെ ആക്രമിച്ച സംഭവത്തിന് പിന്നാലെ മാനസികമായി തളര്‍ന്നിരുന്നു. ഭക്ഷണം പോലും കഴിക്കാനാവാത്ത സാഹചര്യമുണ്ടായെന്ന് ഇന്നസെന്റ് വ്യക്തമാക്കിയിരുന്നു. ദിലീപിന് വിശ്വാസത്തിലെടുത്ത് ഇന്നസെന്റും മമ്മൂട്ടിയും അടക്കം വെട്ടിലായെന്നാണ് ആക്ഷേപം. അറസ്റ്റിലായ ശേഷം മമ്മൂട്ടി വേണ്ടവിധം സഹായിച്ചില്ലെന്നാണ് ദിലീപ് ആരോപിക്കുന്നത്. ജയില്‍ മോചിതനായ ശേഷം ദിലീപും മമ്മൂട്ടിയും ഇതുവരെ നേരില്‍ കണ്ടിട്ടില്ല എന്നത് തന്നെ അകല്‍ച്ചയുടെ ആഴം വ്യക്തമാക്കുന്നു. പൃഥ്വിരാജിനൊപ്പം നിന്ന് തന്നെ സംഘടനയില്‍ നിന്ന് പുറത്താക്കാന്‍ മമ്മൂട്ടിയും കൂട്ടുനിന്നെന്നാണ് ദിലീപിന്റെ ആക്ഷേപം. അതേസമയം തീരുമാനം കൂട്ടായി എടുത്തതാണെന്ന് മറ്റ് ഭാരവാഹികള്‍ വ്യക്തമാക്കുന്നു.

വിവാദങ്ങളുടെ പശ്ചാത്തലത്തില്‍ മുകേഷ് ഇത്തവണ നേരിട്ട് ഒന്നിലും ഇടപെടില്ല. പ്രശ്‌നങ്ങളുണ്ടാകാതിരിക്കാന്‍ ശ്രദ്ധിക്കണമെന്ന് സി.പി.എം ജില്ലാ കമ്മിറ്റി കര്‍ശന നിര്‍ദ്ദേശം നല്‍കിയിട്ടുണ്ട്. അതിന്റെ പശ്ചാത്തലത്തിലാണ് ദിലീപ് അറസ്റ്റിലായതിന് പിന്നാലെ മുകേഷ് നിലപാട് മാറ്റിയത്.
എന്നാല്‍ ഗണേഷ്‌കുമാറിന്റെ നേതൃത്വത്തില്‍ നടക്കുന്ന നീക്കങ്ങള്‍ക്ക് മുകേഷിന്റെ മാനസിക പിന്തുണയുണ്ട്. ജൂണിലാണ് തെരഞ്ഞെടുപ്പ്. ജൂലായില്‍ പുതിയ ഭരണസമിതി ചുമതലയേല്‍ക്കും.