ഗുരുവായൂര്‍ ക്ഷേത്രത്തിലെ ഊട്ടുപുരയില്‍ ഹിന്ദുക്കളല്ലാത്തവര്‍ക്ക് പ്രവേശനം വിലക്കുന്ന ബോര്‍ഡ് നീക്കം ചെയ്യാന്‍ നിര്‍ദേശിച്ചതായി ദേവസ്വംമന്ത്രി കടകംപള്ളി സുരേന്ദ്രന്‍. തൃശൂരില്‍ കൊച്ചി ദേവസ്വം ബോര്‍ഡ് നടപ്പാക്കുന്ന പ്രസാദം പദ്ധതി ഉദ്ഘാടനത്തിനെത്തിയ മന്ത്രി മാധ്യമങ്ങളോടു സംസാരിക്കവേയാണ് ഇക്കാര്യം അറിയിച്ചത്. ഊട്ടുപുരയില്‍ പുരുഷന്‍മാര്‍ മേല്‍വസ്ത്രം ധരിച്ച് പ്രവേശിക്കരുതെന്ന നിബന്ധന ഒഴിവാക്കാന്‍ നടപടിയെടുക്കും. തന്ത്രിയും മേല്‍ശാന്തിയുമായി ചര്‍ച്ചചെയ്താകും ഇക്കാര്യം നടപ്പാക്കുക.

ഗുരുവായൂര്‍ ക്ഷേത്രത്തിലെ ഊട്ടുപുരയില്‍നിന്നു ജാതിമതഭേദമെന്യേ എല്ലാവര്‍ക്കും ഭക്ഷണം നല്‍കാന്‍ നടപടിയെടുക്കും. വിശക്കുന്ന ആര്‍ക്കും ഭക്ഷണം നല്‍കണമെന്നതാണു സര്‍ക്കാരിന്റെ കാഴ്ചപ്പാട് മന്ത്രി പറഞ്ഞു.
ഗുരുവായൂര്‍ ക്ഷേത്രത്തിലെ പ്രസാദമൂട്ടില്‍ അഹിന്ദുക്കളെയും പങ്കെടുപ്പിക്കാന്‍ ദേവസ്വം ഭരണസമിതി തീരുമാനിച്ചു. ക്ഷേത്രത്തിനു പുറത്തുള്ള അന്നലക്ഷ്മി ഹാളിലാണു പ്രസാദമൂട്ട്. ഷര്‍ട്ട്, ബനിയന്‍, പാദരക്ഷകള്‍ എന്നിവ ധരിച്ച് പ്രസാദമൂട്ടില്‍ പങ്കെടുക്കാം. ലുങ്കിയും മൊബൈല്‍ ഫോണും അനുവദിക്കില്ല.

രാവിലെ ഏഴുമുതല്‍ ഒമ്പതുവരെ പ്രഭാതഭക്ഷണവും 10.301.30 വരെ ഉച്ചഭക്ഷണവും ജാതിമതഭേദമന്യേ ആര്‍ക്കും കഴിക്കാം. രാത്രി ക്ഷേത്രത്തിലെ നിവേദ്യം കഴിഞ്ഞ് ഒരുമണിക്കൂര്‍ ഭക്ഷണവിതരണമുണ്ടാകും. വൈശാഖമാസം ആരംഭിച്ചതോടെ ക്ഷേത്രത്തിലെത്തുന്ന മുഴുവന്‍ ഭക്തര്‍ക്കും ഭക്ഷണം നല്‍കാനുള്ള ക്രമീകരണങ്ങള്‍ ഒരുക്കിയിട്ടുണ്ട്.

അന്നലക്ഷ്മി ഹാളിനോടു ചേര്‍ന്ന് താല്‍ക്കാലിക പന്തലില്‍ പുതുതായി 400 കസേരകൂടി ഉള്‍പ്പെടുത്തി. ഇതോടെ ഒരുപന്തിയില്‍ 816 പേര്‍ക്ക് ഭക്ഷണം കഴിക്കാം. ക്ഷേത്രത്തിനുള്ളില്‍ നടത്തിയിരുന്ന പ്രസാദമൂട്ട് 2015ലാണ് പുറത്തേക്കു മാറ്റിയത്.