ആര്യയുടെ വധുവിനെ കണ്ടെത്താന്‍ നടത്തിയ റിയാലിറ്റി ഷോ ആര്‌യ്ക്ക് പരിണയം അഥവാ എങ്ക വീടു മാപ്പിളൈയില്‍ വിവാദങ്ങള്‍ കത്തിപടരുകയാണ് ഇതിനിടയില്‍ നടന്‍ ആര്യയുടെ വധുവാകും എന്ന ആരാധകരും പ്രേക്ഷകരും ഉറപ്പിച്ച നടി അബര്‍നദി ചില കാര്യങ്ങള്‍ പറയുന്നു. ഷോയുടെ അവസാന ഘട്ടത്തിലായിരുന്നു അബര്‍നദി പുറത്താകുന്നത്. ഇവരുടെ ആരാധകര്‍ ഏറെ വിഷമിച്ചിരുന്നു.

ഇപ്പോള്‍ ആരാധകരെ നേരിട്ട് ആശ്വസിപ്പിക്കുകയാണ് അബര്‍നദി. തനിക്ക് ആരാധകരോടു ഒരുപാടു കാര്യങ്ങള്‍ പറയാനുണ്ട് എന്നും ഷോ അവസാനിച്ചാല്‍ ഉടന്‍ ലൈവ് ആയി വന്നു കാര്യങ്ങള്‍ പറയുമെന്നും അബര്‍നദി വ്യക്തമാക്കി. ഇപ്പോള്‍ പല കഥകളും കേള്‍ക്കുന്നുണ്ടാകും അതൊന്നും വിശ്വസിക്കരുത് എല്ലാം ഞാന്‍ തന്നെ പറയാം. അല്‍പ്പം കാത്തിരിക്കു എന്ന് അബര്‍നദി പറയുന്നു. യൂട്യൂബില്‍ പോസ്റ്റ് ചെയ്ത വീഡിയോയില്‍ അബര്‍നദി പറഞ്ഞത് ഇങ്ങനെ.

നിറയെ ആരാധകരായി, കുറേ ഫാന്‍സ് പേജുകളും ആര്‍മിയുമൊക്കെയായി. അതിലൊക്കെ എനിക്ക് അതിയായ സന്തോഷമുണ്ട്. എന്താണ് പറയേണ്ടതെന്ന് അറിയാത്ത അവസ്ഥയിലാണ് ഞാന്‍. ഷോയുമായി ബന്ധപ്പെട്ട് ചില നിയമങ്ങളും നിബന്ധനകളുമൊക്കെയുണ്ട്. അതുകൊണ്ട് എനിക്ക് വീഡിയോകളൊന്നും അപ്ലോഡ് ചെയ്യാനാവില്ല. എനിക്ക് നിങ്ങളോട് ഒരുപാട് കാര്യങ്ങള്‍ പറയാനുണ്ട്. എന്നാല്‍, അതിന് കുറച്ച് സമയമെടുക്കും. ദയവു ചെയ്ത് നിങ്ങള്‍ ഫൈനല്‍ വരെ കാത്തിരിക്കണം.

ഞാന്‍ ഇപ്പോള്‍ സുഖമായിരിക്കുന്നു. കൂടുതല്‍ കരുത്തയാണ്. ഫെയ്‌സ്ബുക്കിലും ഇന്‍സ്റ്റഗ്രാമിലുമെല്ലാം വരുന്ന അഭിപ്രായപ്രകടനങ്ങളും ആശംസകളുമെല്ലാം ഞാന്‍ കാണുന്നുണ്ട്. എല്ലാവരോടും ഞാന്‍ നന്ദി പറയുന്നു. ഇതിനൊക്കെ ഞാന്‍ ലൈവായി തന്നെ വന്ന് മറുപടി നല്‍കാം. എല്ലാറ്റിനും ഒരു കാരണമുണ്ട്. സത്യസന്ധമായാണ് ഞാന്‍ എല്ലാം പറഞ്ഞതും ചെയ്തതും. അതിന് ഒരു സ്‌ക്രിപ്റ്റില്ലായിരുന്നു. മനസ്സില്‍ തോന്നിയ കാര്യം മാത്രമാണ് ഞാന്‍ അവിടെ പറഞ്ഞത്. ഇതിനെക്കുറിച്ച് നിങ്ങള്‍ പലതും കേള്‍ക്കുന്നുണ്ടാകും. അതൊന്നും വിശ്വസിക്കരുത്.

ഞാന്‍ നേരിട്ട് തന്നെ വന്ന് നിങ്ങളോട് കാര്യങ്ങള്‍ പറയുന്നുണ്ട്. അതിനുവേണ്ടി അല്‍പ്പം കാത്തിരിക്കൂ. ഷോയില്‍ എന്റെ ഭാഗത്ത് നിന്ന് എന്തെങ്കിലും തെറ്റ് സംഭവിച്ചിട്ടുണ്ടെങ്കില്‍ അതിന് ഞാന്‍ ക്ഷമ ചോദിക്കുന്നുഅബര്‍നദി പറഞ്ഞു. ഫാഷന്‍ ഡിസൈനറായ അബര്‍നദി ഏപ്രില്‍ പത്തിന് നടന്ന റൗണ്ടിലാണ് ഷോയില്‍ നിന്ന് പുറത്തായത്. അബര്‍നദിയുടെ വീട്ടില്‍ ചെന്നുള്ള ആര്യയുടെ പെണ്ണുകാണലെല്ലാം വികാരനിര്‍ഭരമായ രംഗങ്ങള്‍ക്കാണ് സാക്ഷ്യംവഹിച്ചത്.