മന്ത്രിമാരുടെയും, എം.എല്‍.എ.മാരുടെയും ശമ്പളം കുത്തനെ വര്‍ദ്ധിപ്പിച്ചെങ്കിലും എംഎല്‍എമാരുടെ അഡീഷണല്‍ സ്റ്റാഫുകള്‍ക്ക് പരിഗണനയില്ല. ലഭിക്കുന്ന വേതനത്തിന്റെ പകുതിയും യാത്രാചിലവിനും മറ്റുമായി ചിലവഴിക്കേണ്ടി വരുന്നു. സംസ്ഥാനത്തെ എംഎല്‍എമാരുടെ സ്റ്റാഫുകളില്‍ പലരും അമര്‍ഷത്തിലാണ്.

മന്ത്രിമാരുടെയും, എംഎല്‍എമാരുടെയും ശമ്പളവും, മറ്റ് ആനുകൂല്യങ്ങളും കുത്തനെ വര്‍ദ്ധിപ്പിച്ചെങ്കിലും തങ്ങളുടെ ശമ്പളത്തില്‍ വര്‍ദ്ധനവ് വരുത്താത്തതാണ് പ്രതിഷേധത്തിന് കാരണം. എം.എല്‍.എ മാരുടെ അഡീഷണല്‍ സ്റ്റാഫ്കള്‍ക്ക് ഇപ്പോള്‍ ലഭിക്കുന്നത് 20000 രൂപ മാത്രമാണ്. മറ്റൊരാനു കുല്യവുമില്ല. ഉമ്മന്‍ ചാണ്ടിയുടെ കാലത്ത് 7500 രൂപയായിരുന്നത് 12500 ആക്കി ഉയര്‍ത്തി. ഇപ്പോഴത്തെ സര്‍ക്കാരാണ് മൂന്ന് മാസത്തെ മുന്‍കാല പ്രാബല്യത്തോടെ ഇരുപതിനായിരമാക്കി ഉയര്‍ത്തിയത്.

മണ്ഡലത്തിലെ വിവിധ ആവശ്യങ്ങള്‍ക്കായുള്ള യാത്രാ ചിലവുകളും, മറ്റും വഹിക്കേണ്ടത് ഇതില്‍ നിന്ന് വേണം. മറ്റാനുകൂല്യങ്ങളൊന്നും ഇവര്‍ക്ക് ലഭിക്കുന്നില്ല. ഡെപ്യൂട്ടേഷനിലുള്ള പിഎ ഉള്‍പ്പെടെ 3 സ്റ്റാഫ്കളാണ് ഒരു എംഎല്‍എയ്ക്കുള്ളത്.

അഡീഷണല്‍ സ്റ്റാഫ് എന്ന തസ്തികയിലുള്ള രണ്ട് പേര്‍ക്ക് സര്‍ക്കാര്‍ ഇരുപതിനായിരം രൂപ വീതം നല്‍കുന്നുണ്ട്. ഇതില്‍ ഒരാളെ െ്രെഡവറായിട്ടാണ് പല എംഎല്‍എമാരും പരിഗണിക്കുന്നത്. അഡീഷണല്‍ സ്റ്റാഫ് കള്‍ക്കുള്ള വേതനം നേരിട്ട് കൈപ്പറ്റുന്ന എംഎല്‍എമാര്‍ നേരത്തെ ഉണ്ടായിരുന്നു. അടുപ്പക്കാരെ അഡീഷണല്‍ സ്റ്റാഫായി നിയമിക്കുകയും, വേതനം കുറച്ച് നല്‍കുകയും ചെയ്യുന്ന രീതിയും നിലനിന്നിരുന്നതായി ആക്ഷേപമുണ്ട്.
മന്ത്രിമാരുടെയും, എംഎല്‍എ മാരുടെയും ശമ്പളവും, ആനുകൂല്യങ്ങളും വര്‍ദ്ധിപ്പിച്ചപ്പോള്‍ ഇവരെയും പരിഗണിക്കുമെന്ന് കരുതിയെങ്കിലും അതുണ്ടായില്ല. മണ്ഡലത്തിലെ വിവിധ ആവശ്യങ്ങള്‍ക്കായിത്തന്നെ പകുതിയോളം വേതനം ചിലവഴിക്കേണ്ടി വരുന്നതായും പലരും പറയുന്നു. മന്ത്രിമാരുടെ സ്റ്റാഫുകള്‍ക്ക് കാര്യമായ പരാതി ഇല്ലെങ്കിലും, എംഎല്‍എമാരുടെ അഡീഷണല്‍ സ്റ്റാഫുകളില്‍ പലര്‍ക്കും പ്രതിഷേധമുണ്ട്.