ലിഗയുടെ മൃതദേഹം കണ്ടത്തിയ പനത്തുറയിലെ സ്ഥലം മയക്ക് മരുന്ന്, മണൽ ,മണ്ണെണ്ണ മാഫിയകളുടെ താവളമെന്ന് റിപ്പോർട്ട്. തിരുവല്ലം പോലീസ് സ്റ്റേഷന് തൊട്ടടുത്തുള്ള സ്ഥലം പക്ഷേ പോലീസുകാരുടെ ശ്രദ്ധയിലുണ്ടെങ്കിലും അവർ കണ്ടതായി നടിക്കാറില്ല.

മയക്കുമരുന്നിന്റെ വിപണന കേന്ദ്രമാണ് പനത്തുറയിലെ വിജനമായ പ്രദേശം. ഇവിടങ്ങളിൽ ധൈര്യത്തോടെ പകൽവെളിച്ചത്തിൽ പോലും ആരും കടന്നു വരാറില്ല. നഗരത്തിലെ പ്രൊഫഷണൽ കോളേജിലുള്ള വിദ്യാർത്ഥികൾ പ നത്തുറയിലെത്താറുണ്ടെന്ന് പ്രദേശവാസികൾ പറയുന്നു.

വില ഉയർന്നതോടെ ബോട്ടുകളിൽ കൊണ്ടുവരുന്ന മണ്ണെണ്ണ പനത്തുറയിലെത്തിക്കാറുണ്ട്. ലക്ഷക്കണക്കിന് രൂപയുടെ മണ്ണെണ്ണയാണ് ഇത്തരത്തിൽ കടൽ മാർഗം ഇവിടെയെത്തിക്കുന്നത്. പനത്തുറയിൽ നിന്നും ഇത് വൻതോതിൽ റീട്ടെയിലർമാർക്ക് എത്തിക്കുന്നു.

മയക്കുമരുന്നുകൾ വൻതോതിൽ പനത്തുറയിലെത്തുന്നത് പോലീസിന്റെ ശ്രദ്ധയിൽ പെട്ടിട്ടുണ്ട്. എന്നാൽ മയക്കുമരുന്ന് പിടികൂടാനോ നിയന്ത്രിക്കാനോ ഉള്ള താത്പര്യം പോലീസ് കാണിക്കാറില്ല. ഉന്നത പോലീസുകാർക്ക് വരെ ഇത്തരം കാര്യങ്ങളിയാം. പനത്തുറയിൽ ഒരു പോലീസ് റെയ്ഡ് പോലും നടത്താറില്ല. പോലീസ് വന്നാൽ അവർക്ക് പനത്തുറയിൽ നിന്നും രക്ഷപ്പെടാൻ കഴിയില്ലെന്നും ചില പ്രദേശവാസികൾ മലയാളി വാർത്തയോട് പറഞ്ഞു.

അതേ സമയം പനത്തുറയിലെ മാഫിയ തലവൻമാർ പോലീസുകാരെ കാണേണ്ടതു പോലെ കാണുന്നതുകൊണ്ടാണ് കുറ്റക്കാർ പിടിക്കപ്പെടാത്തതെന്നും റിപ്പോർട്ടുണ്ട്. ഇതിനു സമീപത്തുള്ള വിഴിഞ്ഞം, തിരുവല്ലം സ്റ്റേഷനുകളിലെ പോലീസുകാർ പനത്തുറ മാഫിയയുടെ സഹായത്തോടെയാണ് കോടീശ്വരൻമാരായതെന്നും റിപ്പോർട്ടുണ്ട്. യഥാർത്ഥത്തിൽ മാഫിയയും പോലീസും പരസ്പര സഹായ സഹകരണ സംഘമായാണ് ഇവിടെ പ്രവർത്തിക്കുന്നത്. ജില്ലയിലെ ഉയർന്ന പോലീസ് ഉദ്യോഗസ്ഥർക്കും പങ്ക് ലഭിക്കുന്നുണ്ടത്രേ. അതു കൊണ്ടു തന്നെ ക്രൂരതകൾക്ക് നേരേ പോലീസിന്റെ കണ്ണടയ്ക്കും.

ലിഗയുടെ മരണം ആത്മഹത്യയല്ലെന്നുള്ള ധാരണ ഉണ്ടായത് ഇതുകൊണ്ടാണ്. ലിഗക്ക് ഒറ്റക്ക് പനത്തുറയിലെത്താൻ കഴിയില്ല. അവിടെ നിന്നും ലഭിച്ച ജാക്കറ്റ് ആരുടേതാണെന്ന് കണ്ടെത്തിയിട്ടില്ല. കഴിഞ്ഞ ഏതാനും മാസങ്ങൾക്ക് മുമ്പ് ഇവിടെ നിന്നും ഒരു അസ്ഥികൂടം കണ്ടെത്തിയിരുന്നു. ആത്മഹത്യ ചെയ്തയാളുടെതാണെന്ന് അനുമാനിക്കുന്നു. എന്നാൽ ഒരന്വേഷണവും ഉണ്ടായിട്ടില്ല.