കണ്ണൂരിലും മാഹിയിലും നടന്ന കൊലപാതകങ്ങളെക്കുറിച്ച്‌​ താന്‍ പറഞ്ഞത്​ മാധ്യമങ്ങള്‍ വളച്ചൊടിച്ചെന്ന് മന്ത്രി എ.കെ. ബാലന്‍. ചെങ്ങന്നൂര്‍ ഉപതെരഞ്ഞെടുപ്പ് പ്രചാരണത്തിനിടെ 'പകരത്തിന് പകര'മെന്ന തരത്തില്‍ താന്‍ പറഞ്ഞെന്നാണ് വാര്‍ത്ത വന്നത്. സമൂഹമാധ്യമങ്ങളിലും ഇത് വ്യാപകമാ‍യി പ്രചരിച്ചു. ഇത്തരത്തിലൊരു പ്രസ്താവന താന്‍ നടത്തിയിട്ടില്ല. ആക്രമണമുണ്ടാകുന്നു, അതിന് പ്രതിരോധവുമുണ്ടാകുന്നു എന്നാണ് താന്‍ പറഞ്ഞത്. പ്രയോഗത്തില്‍ ആരെയും പരാമര്‍ശിച്ചിട്ടില്ല. അക്രമം സര്‍ക്കാര്‍ വെച്ചുപൊറുപ്പിക്കില്ലെന്നും കര്‍ശന നടപടിയെടുക്കുമെന്നും മന്ത്രി പറഞ്ഞു.

വിവാദങ്ങള്‍ക്ക്​ പിന്നാലെ പോകാനും മറുപടി പറയാനും സര്‍ക്കാറില്ല. പ്രകടന പത്രികയില്‍ നല്‍കിയ വാഗ്ദാനങ്ങള്‍ പാലിക്കാനാണ് ശ്രമിക്കുന്നത്. ഒറ്റപ്പെട്ട സംഭവങ്ങള്‍ എല്ലാ കാലത്തുമുണ്ടാകാറുണ്ട്. ഇത്തരം സംഭവങ്ങളില്‍ കര്‍ശന നടപടിയാണ് ഇൗ സര്‍ക്കാര്‍ സ്വീകരിക്കുന്നത്. സര്‍ക്കാര്‍ വാര്‍ഷികാഘോഷം യു.ഡി.എഫ് ബഹിഷ്കരിക്കുന്നത്​ എന്തിനെന്ന്​ മനസ്സിലാകുന്നില്ല.

നേതാക്കള്‍ ബഹിഷ്കരിച്ചാലും ജനപങ്കാളിത്തം വേണ്ടുവോളമുണ്ടാകുമെന്നും പല കാര്യങ്ങളിലും കേരളം രാജ്യത്തിന് മാതൃകയാകുകയാണെന്നും മന്ത്രി പറഞ്ഞു.