മലപ്പുറത്ത് സിനിമാ തിയേറ്ററില്‍ വച്ച് പത്ത് വയസ്സുകാരിയെ പീഡിപ്പിച്ച സംഭവത്തില്‍ പരാതി കിട്ടിയിട്ടും നടപടി വൈകിപ്പിച്ച ചങ്ങരംകുളം എസ്.ഐ ബേബിയെ അന്വേഷണ വിധേയമായി സസ്‌പെന്‍ഡ് ചെയ്തു. ഏപ്രില്‍ 18നാണ് മനസാക്ഷിയെ മരവിപ്പിക്കുന്ന ക്രൂരത അരങ്ങേറിയത്. സംഭവത്തിന്റെ ദൃശ്യങ്ങള്‍ സഹിതം ഏപ്രില്‍ 26ന് തന്നെ പരാതി നല്‍കിയെങ്കിലും പൊലീസ് നടപടിയെടുത്തിരുന്നില്ല. എസ്.ഐയുടെ ഭാഗത്ത് നിന്നും ഗുരുതര വീഴ്ചയുണ്ടായതായി എസ്.പി നല്‍കിയ റിപ്പോര്‍ട്ടിനെ തുടര്‍ന്നാണ് നടപടി. 

ഏകദേശം നാല്‍പ്പത് വയസുള്ള സ്ത്രീ, പത്ത് വയസ് തോന്നിക്കുന്ന കുട്ടിയുമായി പ്രതിയുടെ കെ.എല്‍. 46 ജി 240 നമ്ബര്‍ ബെന്‍സ് കാറിലാണ് തിയേറ്ററിലെത്തിയത്. ഇത് കുട്ടിയുടെ അമ്മയാണെന്ന് തിരിച്ചറിഞ്ഞിട്ടുണ്ട്. ഫസ്റ്റ് ഷോയ്ക്ക് മുന്‍നിരയില്‍ ബാലികയ്ക്കും അമ്മയ്ക്കും നടുവിലിരുന്ന പ്രതി കുട്ടിയുടെ രഹസ്യഭാഗത്ത് സ്പര്‍ശിച്ചു. എന്താണ് സംഭവിക്കുന്നതെന്ന് പോലും തിരിച്ചറിയാനാവാതെ നിസഹായയായി ഇരിക്കുന്ന കുട്ടി പലപ്പോഴും പ്രതിയുടെ കൈ തട്ടിമാറ്റുന്നുണ്ട്. ഇതിനിടയില്‍ അമ്മയെയും പ്രതി ലൈംഗികമായി ഉപയോഗിച്ചു.

അമ്മയുടെ രഹസ്യഭാഗങ്ങളില്‍ സ്പര്‍ശിക്കുന്ന പ്രതി കൂടുതല്‍ സമയവും കുട്ടിയെയാണ് പീഡിപ്പിച്ചത്. കുട്ടിയെ ഇയാള്‍ പീഡിപ്പിക്കുന്നത് മനസിലായിട്ടും സ്ത്രീ പ്രതികരിക്കുന്നില്ലെന്നതും ദൃശ്യങ്ങളില്‍ വ്യക്തമാണ്.