ജൂണ്‍ ഒന്നിന് മുൻപ് കാലവര്‍ഷം എത്തും; ഇന്ന് അതിശക്‌തമായ മഴയ്ക്ക് സാധ്യത... ഉരുള്‍പ്പൊട്ടല്‍ സാധ്യതയുള്ളതിനാല്‍ രാത്രി ഏഴുമുതല്‍ രാവിലെ ഏഴുവരെ മലയോര മേഖലയിലേക്കുള്ള യാത്ര ഒഴിവാക്കണം; സംസ്ഥാനത്ത് അടുത്ത ഒരാഴ്‌ച ശക്‌തമായ മഴയ്ക്ക് സാധ്യതയുണ്ടെന്ന് കാലാവസ്‌ഥ നിരീക്ഷണ കേന്ദ്രം
സംസ്ഥാനത്ത് 28 വരെ അതിശക്‌തമായ മഴയ്‌ക്കു സാധ്യതയെന്നു കേന്ദ്ര കാലാവസ്‌ഥാ വകുപ്പിന്റെ മുന്നറിയിപ്പ്. ഉയര്‍ന്ന തിരമാലകളുണ്ടാകാന്‍ സാധ്യതയുള്ളതിനാല്‍ 30 വരെ മത്സ്യത്തൊഴിലാളികള്‍ കടലില്‍ പോകരുത്‌. 21 സെന്റിമീറ്റര്‍ വരെ മഴയ്ക്ക് സാധ്യതയുണ്ട്‌. ഇന്ന് അതിശക്‌തമായ മഴയുണ്ടായേക്കും. എല്ലാ പോലീസ്‌ സ്‌റ്റേഷനുകളിലും അഗ്നിശമന സേനയ്‌ക്കും ജാഗ്രതാ നിര്‍ദേശം നല്‍കിയിട്ടുണ്ട്‌.
ഉരുള്‍പ്പൊട്ടല്‍ സാധ്യതയുള്ളതിനാല്‍ രാത്രി ഏഴുമുതല്‍ രാവിലെ ഏഴുവരെ മലയോര മേഖലയിലേക്കുള്ള യാത്ര പരിമിതപ്പെടുത്തണം. മുന്നറിയിപ്പിന്റെ അടിസ്‌ഥാനത്തില്‍ ജാഗ്രത പാലിക്കാനും മുന്‍കരുതല്‍ നടപടികള്‍ സ്വീകരിക്കാനും സംസ്ഥാന ദുരന്ത നിവാരണ അതോറിറ്റി നിര്‍ദേശിച്ചിട്ടുണ്ട്‌.
താലൂക്ക്‌ കണ്‍ട്രോള്‍ റൂമുകള്‍ പ്രവര്‍ത്തനമാരംഭിക്കാനും അവശ്യസാഹചര്യത്തില്‍ ദുരിതാശ്വാസ ക്യാമ്ബുകള്‍ തുറക്കാനും നിര്‍ദേശമുണ്ട്‌ വിനോദ സഞ്ചാരികള്‍ കടലില്‍ ഇറങ്ങാതിരിക്കാന്‍ നടപടി സ്വീകരിക്കണം. പുഴകളിലും ചാലുകളിലും വെള്ളക്കെട്ടിലും ജനങ്ങള്‍ ഇറങ്ങരുത്‌, മലയോര മേഖലയിലെ റോഡുകള്‍ക്ക്‌ കുറുകെയുള്ള ചെറിയ ചാലുകള്‍ക്കരികെ വാഹനങ്ങള്‍ നിര്‍ത്തരുത്‌, മരങ്ങള്‍ക്കു താഴെ വാഹനം പാര്‍ക്ക്‌ ചെയ്യരുത്‌ തുടങ്ങിയ മുന്നറിയിപ്പുകളും അതോറിറ്റി നല്‍കിയിട്ടുണ്ട്‌.
സംസ്ഥാനത്ത് അടുത്ത ഒരാഴ്‌ച ശക്‌തമായ മഴയ്‌ക്കു സാധ്യതയുണ്ടെന്നു കാലാവസ്‌ഥാ നിരീക്ഷണ കേന്ദ്രവും അറിയിച്ചു.
https://www.facebook.com/Malayalivartha
