തലമുറമാറ്റം ചിലര്‍ക്ക് നേരെ മാത്രം തിരിയുന്നതിന് പിന്നിലും ഗ്രൂപ്പ് താല്‍പര്യങ്ങളുണ്ടെന്ന് കെ.പി.സി.സി വക്താവായിരുന്ന രാജ്‌മോഹന്‍ ഉണ്ണിത്താന്‍ ആരോപിച്ചു. അതുകൊണ്ടാണ് പി.ജെ കുര്യനെതിരെ മാത്രം തിരിയുന്നത്. വര്‍ഷങ്ങളായി പല സ്ഥാനങ്ങളും കയ്യടിക്കിവച്ചിരിക്കുന്ന മറ്റ് പല നേതാക്കള്‍ക്കെതിരെയും യുവനേതാക്കള്‍ ഒന്നും പറയുന്നില്ല. കാരണം ഇവരെല്ലാം അവരുടെ തണലിലാണ് ഇപ്പോഴും രാഷ്ട്രീയപ്രവര്‍ത്തനം നടത്തുന്നത്. കെ.കരുണാകരന്റെയും ആന്റണിയുടെയും കാലത്തും പാര്‍ട്ടിയില്‍ ഗ്രൂപ്പുകള്‍ ഉണ്ടായിരുന്നു. എന്നാല്‍ അവര്‍ അക്കാലത്ത് പാര്‍ട്ടി ഭാരവാഹികളാക്കുന്നത് ജനങ്ങളുമായി ബന്ധമുള്ളവരെയായിരുന്നെന്നും രാജ്‌മോഹന്‍ ഉണ്ണിത്താന്‍ ചൂണ്ടിക്കാണിച്ചു. 

ഇന്ന് പാദസേവകര്‍, വിടുപണിക്കാര്‍, പെട്ടിയെടുക്കുന്നവര്‍ ഒക്കെയാണ് പാര്‍ട്ടിയില്‍ ഭാരവാഹികളാകുന്നത്. ജനങ്ങളുമായി ബന്ധമില്ലാത്ത ഇക്കൂട്ടര്‍ ഗ്രൂപ്പ് നേതാക്കള്‍ പറയുന്നത് അനുസരിച്ചാണ് നടക്കുന്നത്. അല്ലാതെ പാര്‍ട്ടിയുടെയോ ജനങ്ങളുടെയോ വികാരത്തിന് അനുസരിച്ചല്ല പ്രവര്‍ത്തിക്കുന്നത്. പലപ്പോഴും സ്ഥാനമാനങ്ങള്‍ വീതംവെച്ചെടുക്കുകയാണ്. അത് പാര്‍ട്ടിയിലായാലും പാര്‍ലമെന്ററി രംഗത്തായാലും. ഇതൊക്കെ ചൂണ്ടിക്കാട്ടുന്നവരെ ഒറ്റപ്പെടുത്തി ആക്രമിക്കുകയാണ് പതിവെന്നും ഇത് മാറാതെ പാര്‍ട്ടിയെ ശക്തിപ്പെടുത്താനാവില്ലെന്നും ഉണ്ണിത്താന്‍ ചൂണ്ടിക്കാട്ടി. 

തനിക്കെതിരെ ഗ്രൂപ്പ് മാനേജര്‍മാരുടെ നേതൃത്വത്തില്‍ ആക്രമണം നടന്നിട്ടുണ്ടെന്നും മുന്‍കാല അനുഭവങ്ങള്‍ ചൂണ്ടിക്കാട്ടി രാ്ജമോഹന്‍ ഉണ്ണിത്താന്‍ ആഞ്ഞടിച്ചു. തലമുറമാറ്റം ചിലരുടെ പേരില്‍ മാത്രം ആരോപിക്കപ്പെടുന്നതിനു പിന്നിലും ഇത്തരം ഗ്രൂപ്പ് മാനേജര്‍മാര്‍ ആണ്. പാര്‍ട്ടിയില്‍ പരാജയപ്പെടുന്നരും പാര്‍ട്ടിയെ ഈ അവസ്ഥയിലാക്കിയവരും തമ്മിലുള്ള പോര് രൂക്ഷമാണ്. അത് അവസാനിപ്പിക്കാന്‍ ഹൈക്കമാന്‍ഡ് ഇടപെടണമെന്നും രാജ്‌മോഹന്‍ ഉണ്ണിത്താന്‍ ആവശ്യപ്പെട്ടു.