ഏറെ രാഷ്ട്രീ കോളിളക്കം സൃഷ്ടിച്ച സുനന്ദ പുഷ്‌ക്കര്‍ കേസ് ട്വിസ്റ്റിലേക്ക്. അതിവേഗ കോടതിയിലേക്ക് കാര്യങ്ങള്‍ എത്തിയതോടെ തരൂര്‍ സമ്മര്‍ദ്ദത്തിലെന്നും റിപ്പോര്‍ട്ടുകള്‍. ഡല്‍ഹിയിലെ ലീല ഹോട്ടലിലെ 345ാം നമ്പര്‍ മുറിയില്‍ 2014 ജനുവരി 17നാണ് സുനന്ദ പുഷ്‌കറിനെ മരിച്ച നിലയില്‍ കണ്ടെത്തിയത്.
സുനന്ദ പുഷ്‌കര്‍ ദുരുഹ സാഹചര്യത്തില്‍ മരിച്ച കേസില്‍ ശശി തരൂര്‍ എം.പിക്ക് ഡല്‍ഹി കോടതി ഇന്ന് സമന്‍സ് അയച്ചിരുന്നു. ജൂലൈ ഏഴിന് ഹാജരാകണമെന്ന് ആവശ്യപ്പെട്ടാണ് തരൂരിന് സമന്‍സ് അയച്ചത്. കേസില്‍ തരൂരിനെതിരായ കുറ്റപത്രം കോടതി ഫയലില്‍ സ്വീകരിച്ചു.
ആത്മഹത്യാ പ്രേരണ (ഐപിസി 306), ഗാര്‍ഹിക പീഡനം (498 എ) എന്നീ വകുപ്പുകളാണ് തരൂരിനെതിരെ ചുമത്തിയിരിക്കുന്നത്. കൊലപാതകമെന്ന നിഗമനത്തിലാണ് അന്വേഷണം തുടങ്ങിയതെങ്കിലും നാല് വര്‍ഷം നീണ്ട അന്വേഷണത്തിനൊടുവില്‍ സുനന്ദയുടെ മരണം ആത്മഹത്യയാണെന്ന നിഗമനത്തിലാണ് അന്വേഷണ സംഘം എത്തിയത്. എങ്കിലും തരൂരിന്റെ ഇടപെടലുകള്‍ ദുരൂഹമെന്നാണ് അന്വേഷണ സംഘത്തിന്റെ വാദം. എംപിയെന്ന നിലയിലുള്ള പരിഗണനയാണ് തരൂരിന് ഇപ്പോള്‍ ലഭിച്ചു കൊണ്ടിരിക്കുന്നത്. 
കേസില്‍ കഴിഞ്ഞ മാസമാണ് അന്വേഷണ സംഘം ഡല്‍ഹി മെട്രോപൊളിറ്റന്‍ കോടതിയില്‍ കുറ്റപത്രം സമര്‍പ്പിച്ചത്. വിഷാദ രോഗത്തിനുള്ള അല്‍പ്രാക്‌സ് എന്ന മരുന്ന് അമിത അളവില്‍ കഴിച്ചതിനെ തുടര്‍ന്ന് സുനന്ദ മരണപ്പെട്ടുവെന്നാണ് കുറ്റപത്രം. 10 വര്‍ഷം വരെ തടവും പിഴയും കിട്ടാവുന്ന വകുപ്പുകളാണ് തരൂരിനെതിരെ ചുമത്തിയിട്ടുള്ളത്.
കോടതി ശക്തമായി ഇടപെടുമെന്ന സൂചനയുടെ അടിസ്ഥാനത്തില്‍ രാഷ്ട്രീയ കേന്ദ്രങ്ങള്‍ ചര്‍ച്ചകള്‍ ശ്ക്തമാക്കി. ഉപതിരഞ്ഞെടുപ്പ് ഉണ്ടായാല്‍ വീജയത്തില്‍ കുറഞ്ഞൊന്നും ബിജെപി ആഗ്രഹിക്കുന്നില്ല. പാര്‍ലമെന്റ് തിരഞ്ഞെടുപ്പിനുള്ള ട്രയല്‍ റണ്ണായാണ് രാഷ്ട്രീയ കേരളം മത്സരത്തെ കാണുന്നത്. സിപിഎമ്മും അങ്കത്തിന് കച്ചമുറുക്കി കഴിഞ്ഞു. കോണ്‍ഗ്രസ് ആകട്ടെ കേസ് കെട്ടിച്ചമച്ചതെന്ന ആരോപണം ഉയര്‍ത്തിയാകും തിരിഞ്ഞെടുപ്പിനെ നേരിടുക. 
തരൂര്‍ രാജിവച്ചില്ലങ്കില്‍ ദേശീയ തലത്തില്‍ തന്നെ അത് പാര്‍ട്ടിക്ക് തിരിച്ചടിയാകുമെന്നതിനാല്‍ കോണ്‍ഗ്രസ്സ് ഹൈക്കമാന്റ് രാജി ആവശ്യപ്പെടുമെന്നാണ് സൂചന. കോടതി ഇടപെട്ടാല്‍ സ്വമേധയാ തരൂര്‍ രാജിക്ക് നിര്‍ബന്ധിതനാകും. അതേ സമയം സുനന്ദ പുഷ്‌കറിന്റെ മരണവുമായി ബന്ധപ്പെട്ട് തനിക്ക് നേരെ ഉയര്‍ന്ന ആരോപണങ്ങള്‍ തള്ളി ശശി തരൂര്‍ എം.പി രംഗത്ത്. സുനന്ദയുടെ മരണവുമായി ബന്ധപ്പെട്ട് തന്നെ അപകീര്‍ത്തിപ്പെടുത്താന്‍ ശ്രമം നടക്കുകയാണെന്നും അദ്ദേഹം ആരോപിച്ചു.