ആലുവയില്‍ ഉസ്മാനെന്ന യുവാവിനെ പൊലീസ് മര്‍ദ്ദിച്ച സംഭവം അതീവ ക്രൂരവും, നിന്ദ്യവുമെന്ന് പ്രതിപക്ഷ നേതാവ് രമേശ് ചെന്നിത്തല. നോമ്പ് തുറക്കാന്‍ ഇരുചക്രവാഹനത്തില്‍ സാധനങ്ങളുമായി പോകുന്ന ഉസ്മാനെയാണ് മഫ്തിയിലെത്തിയ പൊലീസ് സംഘം റോഡില്‍ വച്ചും പിന്നീടും പൊലീസ് സ്റ്റേഷനില്‍ വച്ചും മാരകമായി തല്ലിച്ചതക്കുകയായിരുന്നു. പൊലീസ് സംഘത്തിന്റെ കാറുമായി ഉസ്മാന്റെ ഇരുചക്രവാഹനം കൂട്ടിമുട്ടിയതിനെ തുടര്‍ന്നുണ്ടായ വാക്കുതര്‍ക്കത്തെ തുടര്‍ന്നാണ് മര്‍ദ്ധനമെന്നാണ് പൊലീസ് ഭാഷ്യമെങ്കിലും ഇത്ര ക്രുരമായി മര്‍ദ്ധിക്കേണ്ട യാതൊരു പ്രകോപനവും ആ ചെറുപ്പക്കാരന്റെ ഭാഗത്ത് നിന്നുണ്ടായിരുന്നില്ല. പൊലീസ് മര്‍ദ്ദനത്തില്‍ യുവാവിന്റെ താടിയെല്ലിന് പൊട്ടിത്തകര്‍ന്നു. മുഖത്തും നട്ടെല്ലിനും, ശരീരമാസകലവും മര്‍ദ്ദനമേറ്റ ഉസ്മാനെ അത്യാഹിത വിഭാഗത്തില്‍ പ്രവേശിപ്പിച്ചിരിക്കുകയാണ്. ഇദ്ദേഹത്തിന്റെ കാഴ്ചക്ക് തകാരാറ് പറ്റിയെന്നും, അടിയന്തിര ശസ്ത്രക്രിയ ആവശ്യമാണെന്ന സൂചനയും ഡോക്ടര്‍മാര്‍ നല്‍കുന്നുണ്ട്. പൊലീസ് സംഘം ഗുണ്ടകളെപ്പോലെയാണ് ഉസ്മാനോട് പെരുമാറിയതെന്ന് ദൃക്‌സാക്ഷികള്‍ തന്നെ പറയുന്നു. പെരുന്നാള്‍ ആഘോഷത്തില്‍ പങ്കെടുക്കാന്‍ പോയ ജുനൈദിനെ ട്രെയിനില്‍ മൃഗീയമായി മര്‍ദ്ദിച്ച് കൊന്ന സംഭവത്തിന്റെ കേരള പതിപ്പാണ് ആലുവയില്‍ അരങ്ങേറിയത്.

പിണറായി വിജയന്റെ നേതൃത്വത്തില്‍ ഇടതുമുന്നണി അധികാരത്തില്‍ വന്ന നിമിഷം മുതല്‍ ജനങ്ങളുടെ നേര്‍ക്കുള്ള പൊലീസ് അതിക്രമം തുടങ്ങി. പൊലീസിനെ നിലക്ക് നിര്‍ത്താന്‍ പിണറായിക്ക് കഴിയുന്നില്ല. ശ്രീജിത്തിനെ ചവിട്ടിക്കൊല്ലുകയും, കെവിനെ കൊലയാളികളുടെ കയ്യിലേക്ക് വിട്ടുകൊടുക്കുകയും ചെയ്ത പൊലീസ് ആലുവയില്‍ പാവം ചെറുപ്പക്കാരെ മര്‍ദ്ദിച്ച് മൃത പ്രായനാക്കുകയായിരുന്നു. പൊലീസ് വകുപ്പ് ഭരിക്കാന്‍ ശേഷിയില്ലാത്ത മുഖ്യമന്ത്രിയാണ് താനെന്ന് ഓരോ നിമിഷവും പിണറായി തെളിയിച്ച് കൊണ്ടിരിക്കുകയാണെന്നും രമേശ് ചെന്നിത്തല പറഞ്ഞു.