ശക്തമായ മഴയില്‍ സംസ്ഥാനത്ത് രണ്ടുദിവസത്തിനിടെ മരിച്ചവരുടെ എണ്ണം 16 ആയി. ഇന്നലെ ഏഴുപേര്‍ മരിച്ചു. കാറ്റിലും മഴയിലും 19 വീടുകള്‍ പൂര്‍ണമായും 408 വീടുകള്‍ ഭാഗികമായും തകര്‍ന്നു. തിരുവനന്തപുരം കാട്ടായിക്കോണം കീഴേവിളവീട്ടല്‍ എം. ശശിധരന്‍(75), അടിമാലി പറക്കുടി സിറ്റി കോമയില്‍ ബിജു (47) എന്നിവര്‍ ഷോക്കേറ്റു മരിച്ചു. ആലപ്പുഴ ചേര്‍ത്തല വയലാര്‍ കായലില്‍ കുളിക്കാനിറങ്ങിയ വിനു(42), ചെങ്ങന്നൂര്‍ പാണ്ടനാട് അച്ചന്‍കോവിലില്‍ മത്സ്യബന്ധനത്തിനു പോയ സുരേഷ് കുമാര്‍(41) എന്നിവര്‍ ഒഴുക്കില്‍പ്പെട്ടു മരിച്ചു. പത്തനംതിട്ട മല്ലപ്പള്ളി വില്ലേജില്‍ വിദ്യാര്‍ഥിനിയായ അക്ഷയ(8) തെങ്ങു വീണു മരിച്ചു. വയനാട് ബത്തേരി ചീരാല്‍ കുടുക്കിയില്‍ രണ്ടു കുട്ടികള്‍ കുളത്തില്‍ മുങ്ങി മരിച്ചു. എടക്കുടുക്കി കളരിക്കല്‍ വീട്ടില്‍ ഷിഹാബ്സാഹിറ ദമ്പതികളുടെ മകള്‍ സന ഫാത്തിമ (ആറ്), പാട്ടവയല്‍ തോട്ടത്തില്‍ ഫിറോസ്സാജിത ദമ്പതികളുടെ മകന്‍ മുഹമ്മദ് ഷാമില്‍ (ഒമ്പത്) എന്നിവരാണ് മരിച്ചത്.
രണ്ടു ദുരിതാശ്വാസ ക്യാമ്പുകളിലായി 118 പേരെ മാറ്റി പാര്‍പ്പിച്ചിട്ടുണ്ട്.

തിരുവനന്തപുരം കഠിനംകുളത്ത് 40 പേരെയും ആലപ്പുഴയില്‍ 78 പേരെയും ദുരിതാശ്വാസ ക്യാമ്പുകളിലേക്കു മാറ്റി. ഇടുക്കിയില്‍ ഉരുള്‍പ്പൊട്ടലില്‍ നിരവധി റോഡുകളും പാലങ്ങളും തകര്‍ന്നു. കൃഷിയിടങ്ങള്‍ക്കും വീടുകള്‍ക്കും നാശമുണ്ടായി. ജില്ലയില്‍ അഞ്ചു വീടുകള്‍ പൂര്‍ണമായും 56 വീടുകള്‍ ഭാഗികമായും തകര്‍ന്നു. മണ്ണിടിഞ്ഞും മരം വീണും വാഹന ഗതാഗതം തടസപ്പെട്ടു.
ജലനിരപ്പുയര്‍ന്നതിനെത്തുടര്‍ന്നു കല്ലാര്‍കുട്ടി, ലോവര്‍ പെരിയാര്‍ അണക്കെട്ടുകളുടെ ഷട്ടറുകള്‍ ഉയര്‍ത്തി. ഇടുക്കി അണക്കെട്ടിലെ ജലനിരപ്പ് 2323.46 അടിയായും മുല്ലപ്പെരിയാര്‍ അണക്കെട്ടിലെ ജലനിരപ്പ് 116.4 അടിയായും ഉയര്‍ന്നു. കണ്ണൂര്‍, കോഴിക്കോട്, തൃശൂര്‍, ഇടുക്കി ജില്ലകളിലാണ് കൂടുതല്‍ നാശനഷ്ടങ്ങള്‍ റിപ്പോര്‍ട്ട് ചെയ്തിരിക്കുന്നത്. നിരവധി കര്‍ഷകരുടെ റബറും വാഴയും തെങ്ങും നിലംപൊത്തി.

മരം വീണ് വാഹനങ്ങള്‍ നശിച്ചു. കോട്ടയം ജില്ലയില്‍ നൂറിലേറെ വീടുകള്‍ക്കു നാശമുണ്ടായി. കൊച്ചി പള്ളിയറക്കാവ് ഭഗവതി ക്ഷേത്രത്തിന്റെ മതില്‍ തകര്‍ന്നുവീണു. ആല്‍മരം കടപുഴകി വീണ് പറവൂര്‍ ചേന്ദമംഗലം കിഴക്കുംപുറം കൊറ്റാട്ടാല്‍ ഭഗവതി ക്ഷേത്രം തകര്‍ന്നു.