ഇന്ത്യക്കാര്‍ക്ക് ആവശ്യം ബുള്ളറ്റ് ട്രെയിനുകളല്ല, പകരം സുരക്ഷിതമായ റെയില്‍വെ സംവിധാനങ്ങളാണെന്ന് മെട്രോമാന്‍ ഇ ശ്രീധരന്‍ . ഉന്നത ശ്രേണിയിലുള്ളവര്‍ക്ക് മാത്രമേ ബുള്ളറ്റ് ട്രെയിനുകളെ ആശ്രയിക്കുകയുള്ളൂ. സാധാരണക്കാര്‍ക്ക് അധിക തുക ചിലവാക്കിയുള്ള ബുള്ളറ്റ് ട്രെയിന്‍ യാത്ര അപ്രാപ്യമാണെന്ന് അദ്ദേഹം പറഞ്ഞു.

സാധാരണക്കാരന്റെ രാജ്യമായ ഇന്ത്യയില്‍ കൃത്യസമയത്ത് ഓടുന്നതും, സുരക്ഷിതമായ ട്രെയിനുകളാണ് ആവശ്യം. യാത്രക്കാരുടെ സുരക്ഷയും വൃത്തിയുള്ള ട്രെയിനുകള്‍ക്കുമാണ് സര്‍ക്കാര്‍ ഇപ്പോള്‍ മുന്‍ഗണന നല്‍കേണ്ടത് ബുള്ളറ്റ് ട്രെയിനുകള്‍ക്കല്ല. സ്വാതന്ത്ര്യം കിട്ടി 70 വര്‍ഷം കഴിഞ്ഞിട്ടും മൊത്ത ജനസംഖ്യയുടെ മൂന്നിലൊന്നും ഇപ്പോഴും ദാരിദ്ര്യരേഖയ്ക്ക് താഴെയാണ്. അത് ഏറെ നിരാശപ്പെടുത്തുന്നതാണ്. ധാര്‍മ്മികതയുടെയും മൂല്യങ്ങളുടേയും തത്വങ്ങളുടെയും കാര്യത്തിലുള്ള പതനമാണ്. രാഷ്ട്രീയവും മതപരവുമായുള്ള ചിന്തകളാണ് നേതാക്കള്‍ പിന്‍തുടരുന്നത് ധാര്‍മിക മൂല്യങ്ങളെയല്ല. രാജ്യത്ത് സമഗ്രമായ ഒരു തിരുത്തല്‍ ആവശ്യമാണ് ശ്രീധരന്‍ വ്യക്തമാക്കി.

ഇന്ത്യയിലെ മെട്രോ റെയില്‍ സംവിധാനങ്ങളുടെ നിലവാരം ഉറപ്പുവരുത്തുന്നതിനായി മാനദണ്ഡങ്ങള്‍ നിശ്ചയിക്കാനുള്ള സമിതിയുടെ അധ്യക്ഷനായി ഇ ശ്രീധരനെ കഴിഞ്ഞ ദിവസമാണ് കേന്ദ്ര സര്‍ക്കാര്‍ നിയമിച്ചത്. മോദി സര്‍ക്കാര്‍ മുംബൈ അഹമ്മദാബാദ് ബുള്ളറ്റ് ട്രെയിന്‍ സ്വപ്ന പദ്ധതിയായി നടപ്പിലാക്കുമ്പോഴാണ് ശ്രീധരന്‍ അതിന്റെ ആവശ്യകതയില്‍ സംശയം ഉന്നയിച്ചിരിക്കുന്നത്.