പുല്വാമയിലെ ഏറ്റുമുട്ടലില് പരിക്കേറ്റവരെ ശുശ്രൂഷിക്കുന്നതിനിടെ ഡോക്ടറിന് കാണേണ്ടി വന്നത് സ്വന്തം മകന്റെ മൃതദേഹം
പുല്വാമയില് സുരക്ഷസേനയുമായുണ്ടായ ഏറ്റുമുട്ടലില് പരിക്കേറ്റവരെ ശുശ്രൂഷിക്കുന്നതിനിടെ ഡോക്ടര് അവസാനം കണ്ടത് മകന്റെ മൃതദേഹം. ഡോ. അബ്ദുല് ഗനി ഖാന്റെ 15കാരനായ മകന് ഫൈസാന് അഹ്മദ് ഖാനാണ് മരിച്ചത്. പ്രതിഷേധക്കാരും സുരക്ഷസേനയുമായുള്ള ഏറ്റുമുട്ടലിനിടെയുണ്ടായ കല്ലേറിലാണ് പത്താംക്ലാസുകാരനായ ഫൈസാന് പരിക്കേറ്റത്. ഏറ്റുമുട്ടലില് തന്റെ മകന് ഉള്ളതായി അദ്ദേഹം അറിഞ്ഞിരുന്നില്ല. പരിക്കേറ്റ നിരവധി പേര്ക്കൊപ്പമാണ് മകനെയും ഡോ. അബ്ദുല് ഗനി ഖാന് ജോലി ചെയ്ത പുല്വാമ ജില്ല ആശുപത്രിയിലെത്തിച്ചത്. അതിനു മുമ്പ് രാജ്പോര ആശുപത്രിയില് എത്തിച്ചെങ്കിലും ജില്ല ആശുപത്രിയിലേക്ക് മാറ്റി.
പരിക്കേറ്റവരെ ചികിത്സിച്ച് വീട്ടിലെത്തിയതായിരുന്നു ഡോ. ഖാന്. അതിനു പിന്നാലെ ഉടന് തന്നെ ആശുപത്രിയിലെത്താന് ഫോണ് വിളിയെത്തി. അവിടെവെച്ചാണ് അദ്ദേഹം മകന്റെ മരണവാര്ത്തയറിഞ്ഞത്. ''വെടിയേറ്റ ഫൈസാനെ ആശുപത്രിയില് എത്തിക്കുമ്പോള് തന്നെ ഗുരുതരമായി പരിക്കേറ്റിരുന്നു. സഹപ്രവര്ത്തകര് സജീവമായി രക്ഷാപ്രവര്ത്തനം നടത്തിയെങ്കിലും മരിച്ചു. സഹപ്രവര്ത്തകര്ക്കൊപ്പം അത്യാഹിത വിഭാഗത്തില്വെച്ചാണ് അദ്ദേഹം മൃതദേഹം കണ്ടത്. ആ കാഴ്ച സഹിക്കാന് കഴിയുന്നതിനുമപ്പുറമായിരുന്നു'' ജില്ല ആശുപത്രി സൂപ്രണ്ട് പറഞ്ഞു. ഫൈസാന്റെ മൃതദേഹം സ്വദേശമായ ലാഡൂവിലേക്ക് കൊണ്ടുപോയി.
https://www.facebook.com/Malayalivartha
