ആള്‍ക്കൂട്ട ആക്രമണത്തില്‍ നിന്ന് തലനാരിഴയ്ക്ക് മൂന്നു സന്ന്യാസിമാര്‍ രക്ഷപ്പെട്ടു. പോലീസിന്റെയും സൈന്യത്തിന്റെയും സമയോചിതമായ ഇടപെടല്‍ മൂലമാണ് ആള്‍ക്കൂട്ട ആക്രമണത്തില്‍ നിന്ന് മൂന്നു സന്ന്യാസിമാരെ രക്ഷപ്പെടുത്തിയത്. അസമിലെ ദിമാ ഹസാവോയിലാണ് കുട്ടികളെ തട്ടിക്കൊണ്ടു പോകാനെത്തിയവര്‍ എന്നാരോപിച്ച്‌ നൂറിലധികം വരുന്ന ആള്‍ക്കൂട്ടം സന്ന്യാസിമാരെ തടഞ്ഞുവെച്ചത്.

മാഹൂര്‍ റെയിലവേ സ്‌റ്റേഷനില്‍വെച്ചാണ് മൂന്നു സന്ന്യാസിമാരെ ജനക്കൂട്ടം തടഞ്ഞുവെച്ചത്. കുട്ടികളെ തട്ടിക്കൊണ്ടുപോകാനെത്തിയവര്‍ എന്ന വ്യാജ പ്രചരണം കഴിഞ്ഞ ദിവസങ്ങളില്‍ ശക്തമായിരുന്നു. ഇതിന്റെ പശ്ചാത്തലത്തിലാണ് മൂവര്‍ സംഘത്തെ തടഞ്ഞുവെച്ചത്. തുടര്‍ന്ന് സന്ന്യാസിമാരുടെ രക്ഷയ്ക്കായ് സൈന്യവും, പോലീസും സംഭവസ്ഥലത്തേക്ക് പാഞ്ഞെത്തുകയായിരുന്നു. സംഭവത്തെ തുടര്‍ന്ന് ജില്ലാ ഭരണകൂടം അടിയന്തിരയോഗം വിളിച്ചു ചേര്‍ത്തു. വ്യാജ പ്രചരണങ്ങളുശട പേരില്‍ ആള്‍ക്കൂട്ടം ആക്രമാസക്തമാകുന്നത് തടയണമെന്ന് ദിമഹസാവോയിലെ ജനങ്ങള്‍ക്ക് അധികൃതര്‍ ആവശ്യപ്പെട്ടിട്ടുണ്ട്. സന്ന്യാസിമാരുടെ കൈവശമുണ്ടായിരുന്ന വസ്തുവകകള്‍ വിശദമായി പരിശോധിക്കുകയും ഇവയുടെ ദൃശ്യങ്ങള്‍ വീഡിയോയില്‍ പകര്‍ത്തുകയും പിന്നീട് സാമുഹികമാധ്യമങ്ങളില്‍ പോസ്റ്റ് ചെയ്യുകയും ചെയ്തു. പിന്നാലെ ഇവയൊക്കെ കൂട്ടിയിട്ട് കത്തിച്ചതായും റിപ്പോര്‍ട്ടുകളുണ്ട്.

കുട്ടികളെ തട്ടിക്കൊണ്ടുപോകാനെത്തുന്നവര്‍ എന്നാരോപിച്ച്‌ രണ്ടാഴ്ചയ്ക്കുള്ളില്‍ നിരവധി പേരാണ് അസമില്‍ ആള്‍ക്കൂട്ടത്തിന്റെ ആക്രമണങ്ങള്‍ക്ക് ഇരകളായത്. സമാനരീതിയിലുണ്ടായ സംഭവത്തില്‍ മഹാരാഷ്ട്രയില്‍ കഴിഞ്ഞ ആഴ്ച 23 ഗ്രാമീണര്‍ ചേര്‍ന്ന് അഞ്ചു പേരെ കൊലപ്പെടുത്തിയിരുന്നു.