തീവ്രവാദികളുടെ സാനിദ്യമുള്ള പ്രദേശത്ത് ഒഴിവു സമയങ്ങളില്‍ കൂട്ടുകാരുടെ മാനസീകപിരുമുറുക്കം മാറ്റായി മലയാളി ജവാന്‍ പാടിയ പാട്ടുകളാണ് ഇപ്പോള്‍ സോഷ്യല്‍ മീഡിയയില്‍ ഹിറ്റായിരിക്കുന്നത്. വിരസമായ ഇടവേളയില്‍ നിന്നും രക്ഷ നേടാന്‍ പാടിയ പാട്ട് ഇത്രകണ്ട് വൈറലാകുമെന്ന് അവനും പ്രതീക്ഷിച്ചിരുന്നില്ല. പാലക്കാട് കൊടുന്തിരപ്പുള്ളി അത്താലൂര്‍ തെക്കേപുര വി. സതീഷ് കുമാര്‍ എന്ന ജവാന്റെ പാട്ടിന്  ഇപ്പോള്‍ സോഷ്യല്‍ മീഡിയ യുടെ ആശംസാ പ്രവാഹമാണ്. നാഗാലാന്‍ഡ് തലസ്ഥാനമായ കൊഹിമയില്‍ സേവനമനുഷ്ഠിക്കുന്ന സതീഷ് ഡ്യൂട്ടിക്കു പോകാന്‍ ഒരുങ്ങുന്നതിന് മുമ്പുള്ള ഇടവേളയിലാണ് സുഹൃത്തുക്കളുടെ ആവശ്യപ്രകാരം പാട്ടുപാടിക്കൊടുക്കുന്നത്.

'പൂമരം പൂത്തുലഞ്ഞേ, പൂവാകയില്‍ പൂത്തുമ്പി പാറി വന്നേ...' എന്നീ നാടന്‍ പാട്ടുകളായിരുന്നു സതീഷ് മനോഹരമായി ആലപിച്ച് അനശ്വരമാക്കിയിരിക്കുന്നത്. തീവ്രവാദി സാന്നിധ്യത്തെക്കുറിച്ചുള്ള സംശയത്തെത്തുടര്‍ന്നു പട്രോളിങ്ങിന് ഇറങ്ങുന്നതിനു മുന്‍പ് സഹപ്രവര്‍ത്തകരുടെ മാനസിക പിരിമുറുക്കം മാറ്റാന്‍ കൂടിയാണ് പാട്ട് പാടിയതെന്നാണ് സതീഷ് പറയുന്നത്.

സഹപ്രവര്‍ത്തകന്റെ ഈ കഴിവ് പകര്‍ത്തി സമൂഹമാധ്യമത്തില്‍ പോസ്റ്റ് ചെയ്തതോടെ താരമായി മാറുകയായിരുന്നു സതീഷ്. ഒരു ലക്ഷത്തിലേറെ പേരാണു വിഡിയോ ഇതിനകം കണ്ടുകഴിഞ്ഞത്. രാജ്യത്തിന്റെ വിവിധയിടങ്ങളില്‍ നിന്ന് അഭിനന്ദനങ്ങളും സതീഷിനെ തേടിയെത്തുന്നുണ്ട്. നാഗാലാന്‍ഡിലുള്ളവര്‍ പോലും ഭാഷയറിയാതെ ഈ പാട്ടു പാടാന്‍ ശ്രമിച്ചു. ബറ്റാലിയന്‍ കമന്‍ഡാന്‍ഡ് സുരേന്ദ്ര സിങ്ങും സതീഷിന് ആശംസകളുമായെത്തി.