മോഡിയുടെ കശ്മീര്‍ സന്ദര്‍ശനത്തിനിടെ പാക് പ്രകോപനം, അതിര്‍ത്തിയില്‍ വെടിവെയ്പ്
പ്രധാനമന്ത്രി നരേന്ദ്ര മോഡിയുടെ കാശ്മീര്‍ സന്ദര്‍ശനത്തിനെതിരെ അതിര്‍ത്തിയില്‍ വീണ്ടും പാക് പ്രകോപനം. രാംഘട്ടിലെ ബിഎസ്എഫ് പോസ്റ്റുകള്‍ക്കു നേരെയാണ് ദീപാവലി ദിനത്തില്‍ പാകിസ്താന്‍ ആക്രമണം നടത്തിയത്. ആര്‍ക്കും പരുക്കേറ്റിട്ടില്ലെന്ന് സൈന്യം വ്യക്തമാക്കി. മോഡി കശ്മീരില്‍ എത്തുന്നതിന് മണിക്കൂറുകള്‍ക്ക് മുന്‍പാണ് വെടിവയ്പ് നടന്നത്. രാംഘട്ടിലെ പോസ്റ്റുകള്‍ക്കു നേരെ
ഇന്നലെയും വെടിവയ്പ് നടന്നിരുന്നു. കഴിഞ്ഞമാസമുണ്ടായ പ്രളയത്തില്‍ ദുരിതമനുഭവിക്കുന്ന കശ്മീര്‍ ജനതയെ കാണുന്നതിനാണ് മോഡിയുടെ കശ്മീര്‍ സന്ദര്‍ശനം. നൂറുവര്‍ഷത്തിനിടെയുണ്ടായ ഏറ്റവും വലിയ പ്രകൃതി ദുരന്തമാണ് കശ്മീര്‍ നേരിട്ടിത്.
അതേസമയം, കശ്മീരില്‍ എത്തുന്നതിന് മുന്‍പ് മോഡി സിയാചിന്‍ മഞ്ഞുനിരകളിലെ സൈനിക ക്യാംപില്‍ സന്ദര്‍ശനം നടത്തുകയാണ്. ഇതിനായി മോഡി സിയാചിനില്‍ എത്തി. സൈനികര്‍ക്കൊപ്പം പ്രധാനമന്ത്രി ദീപാവലി ആഘോഷിക്കും. ഈആഘോഷ വേളയില്‍ ധീരസൈനികര്‍ക്കൊപ്പം സമയം ചെലവിടാന്‍ കഴിയുന്നത് തന്റെ ഭാഗ്യമാണെന്ന് മോഡി സിയാച്ചിനിലേക്ക് പുറപ്പെടും മുന്‍പ് ട്വീറ്റ് ചെയ്തു.
ലോകത്തിന്റെ നെറുകയില്‍ കടുത്ത എതിര്‍പ്പിനെ അവഗണിച്ച് രാജ്യത്തെ സംരക്ഷിക്കുന്ന സൈനികരോട് തന്റെ കൃതജ്ഞത അറിയിക്കുകയാണ്. ഏതു പ്രതികൂല സാഹചര്യവും അവരെ അലോസരപ്പെടുത്തുന്നില്ല. അവര്‍ ശരിക്കും അഭിമാനമുളവാക്കുന്നു. എല്ലാ പൗരന്മാരും സൈനികര്‍ക്കൊപ്പമുണ്ടെന്നും മോഡി ട്വിറ്ററില്‍ സന്ദേശമയച്ചു.
ദീപാവലി വേളയില്‍ അട്ടാരി അതിര്‍ത്തിയില്‍ പാക് സൈന്യത്തിന് മധുരം കൈമാറുന്ന വര്‍ഷങ്ങളായുള്ള പതിവ് ഇന്ത്യന്‍ സൈന്യം ഇത്തവണ ഉപേക്ഷിച്ചിട്ടുണ്ട്. ഈദ് ആഘോഷവേളയിലും മധുരം കൈമാറിയില്ലെന്നു മാത്രമല്ല, അതിര്‍ത്തയിലെ കവാടങ്ങള്‍ അടഞ്ഞുതന്നെ കിടന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
