യുഎഇ ഫണ്ട് വിവാദത്തില്‍ മുഖ്യമന്ത്രി പിണറായി വിജയനെതിരെ കേന്ദ്രമന്ത്രി ബാബുല്‍ സുപ്രിയോ. യുഎഇ പ്രഖ്യാപിക്കാത്ത 700 കോടി രൂപയുടെ പേരില്‍ മുഖ്യമന്ത്രി പിണറായി വിജയനും സിപിഎമ്മും അനാവശ്യ വിവാദങ്ങളുണ്ടാക്കുകയാണ്. കേരളത്തിനു വേണ്ട എല്ലാ സഹായവും കേന്ദ്രസര്‍ക്കാര്‍ ഉറപ്പാക്കും. എന്നാല്‍ കേന്ദ്ര, സംസ്ഥാന ഏറ്റുമുട്ടലിലേക്കു കേരളം കാര്യങ്ങള്‍ കൊണ്ടുപോവുകയാണെന്നും ബാബുസല്‍ സുപ്രിയോ മാധ്യമങ്ങളോട് പറഞ്ഞു

കേരളത്തിലെ പ്രളയദുരന്തം നേരിടാന്‍ വിദേശസഹായം ആവശ്യമില്ലെന്ന് കേന്ദ്രസര്‍ക്കാര്‍ ആവര്‍ത്തിക്കുന്നതിനിടെ, 700 കോടി രൂപ തങ്ങള്‍ ഔദ്യോഗികമായി വാഗ്ദാനം ചെയ്തിട്ടില്ലെന്ന വിശദീകരണവുമായി യു.എ.ഇയും രംഗത്തെത്തിയിരുന്നു. ഇന്ത്യന്‍ എക്‌സ്പ്രസ് ദിനപത്രത്തിനു നല്കിയ അഭിമുഖത്തില്‍ യു.എ.ഇ. സ്ഥാനപതി അഹമ്മദ് അല്‍ബന്നയാണ് ഇക്കാര്യം അറിയിച്ചത്.

സ്ഥാനപതിയുടെ വെളിപ്പെടുത്തലോടെ രാഷ്ട്രീയ ചേരിപ്പോര് രൂക്ഷമായി. യു.എ.ഇ. സഹായം നിഷേധിക്കുന്ന നിലപാടിന്റെ പേരില്‍ സംസ്ഥാനത്ത് പ്രതിരോധത്തിലായിരുന്ന ബി.ജെ.പി. സംസ്ഥാനസര്‍ക്കാരിനും സി.പി.എമ്മിനുമെതിരേ രംഗത്തെത്തി. കേന്ദ്രസര്‍ക്കാരിനെ അപമാനിക്കാനുള്ള ഗൂഢാലോചനയാണിതെന്ന് ബി.ജെ.പി. വക്താവ് സുധാംശു ത്രിവേദി ആരോപിച്ചു.

700 കോടി രൂപ നല്‍കുമെന്ന് യു.എ.ഇ. പ്രഖ്യാപിച്ചിട്ടില്ലായെന്നാണോ ഉദ്ദേശിക്കുന്നതെന്ന ചോദ്യത്തിന് ''അതെ, അന്തിമതീരുമാനം കൈക്കൊണ്ടിട്ടില്ല, തീരുമാനം പ്രഖ്യാപിച്ചിട്ടില്ല'' എന്നായിരുന്നു സ്ഥാനപതിയുടെ മറുപടി.

***

'യു.എ.ഇ. 700 കോടി രൂപ വാഗ്ദാനം നല്‍കിയെന്ന വ്യാജ അറിയിപ്പ് എവിടെ നിന്നു വന്നുവെന്ന് അന്വേഷിക്കണം. സത്യമാണോ എന്നറിയാതെ മാധ്യമങ്ങള്‍ അതേറ്റെടുത്തത് ശരിയല്ല. ഈ വ്യാജ സന്ദേശം നല്‍കിയവര്‍ക്കെതിരേ ദേശീയ സുരക്ഷാചട്ടം അനുസരിച്ച് നടപടിയെടുക്കണം'

അല്‍ഫോന്‍സ് കണ്ണന്താനം, കേന്ദ്രമന്ത്രി

***

'യു.എ.ഇ.സര്‍ക്കാര്‍ 700 കോടി വാഗ്ദാനം ചെയ്ത കാര്യം എം.എ. യൂസഫലിയാണ് എന്നെ അറിയിച്ചത്. ബക്രീദ് ആശംസ അറിയിക്കാന്‍ രാജാവിനെ സന്ദര്‍ശിച്ച വേളയില്‍ അവര്‍ യൂസഫലിയോട് സഹായവാഗ്ദാന വിവരം അറിയിക്കുകയായിരുന്നു. ഇതു ജനങ്ങളോട് പറയാമോ എന്ന് യുസഫലിയോട് ആരാഞ്ഞിരുന്നു. അദ്ദേഹം ഉറപ്പിച്ചുപറയുകയും ചെയ്തു. അതനുസരിച്ചാണ് മാധ്യമങ്ങളോട് പറഞ്ഞത്. പ്രധാനമന്ത്രിയുടെ ട്വീറ്റ് നിങ്ങള്‍ കണ്ടതാണല്ലോ'

പിണറായി വിജയന്‍, മുഖ്യമന്ത്രി


ജനങ്ങള്‍ വലിയ ദുരിതമനുഭവിച്ചുകൊണ്ടിരിക്കുമ്പോള്‍ കേരള മുഖ്യമന്ത്രി പിണറായി വിജയനും സീതാറാം യച്ചൂരിയടക്കം സിപിഎമ്മിന്റെ മുതിര്‍ന്ന നേതാക്കളും അനാവശ്യ വിവാദങ്ങളുണ്ടാക്കുകയും തരംതാണ രാഷ്ട്രീയം കളിക്കുകയുമാണെന്ന് ബാബുല്‍ സുപ്രിയോ കുറ്റപ്പെടുത്തുന്നു. അനാവശ്യ വിവാദങ്ങളുണ്ടാക്കി യുഎഇയെക്കൂടി വിഷമവൃത്തത്തിലാക്കി. 700 കോടി രൂപ പ്രഖ്യാപിച്ചതിനു മുഖ്യമന്ത്രിയുടെ കയ്യില്‍ എന്ത് ഔദ്യോഗിക രേഖയാണുള്ളതെന്നും അദ്ദേഹം ചോദിച്ചു.