സംസ്ഥാന ബിവറേജസ് കോര്‍പറേഷനിലെ മുഴുവന്‍ തൊഴില്‍ നിയമനങ്ങള്‍ക്കും സുപ്രീംകോടതി നിരോധനം ഏര്‍പ്പെടുത്തി. ഇതുവരെ കോര്‍പറേഷന്‍ നടത്തിയ പിന്‍വാതില്‍ നിയമനങ്ങളുടെ പട്ടിക സമര്‍പ്പിക്കാനും ജസ്റ്റിസ് മദന്‍ ബി.ലോക്കൂര്‍ അധ്യക്ഷനായ ബെഞ്ച് ഉത്തരവിട്ടു. 1996ല്‍ ചാരായനിരോധനത്തോടെ തൊഴില്‍ നഷ്ടപ്പെട്ട വയനാട് സുല്‍ത്താന്‍ ബത്തേരിയിലെ എം.കെ. ബാബു അഡ്വ. വി.കെ. ബിജു മുഖേന സമര്‍പ്പിച്ച ഹരജിയിലാണ് സുപ്രീംകോടതി ഇടപെടല്‍. 1996ലെ ചാരായനിരോധനത്തില്‍ തൊഴില്‍ നഷ്ടമായവരെ ബിവറേജസ് കോര്‍പറേഷനില്‍ ഘട്ടംഘട്ടമായി പുനരധിവസിപ്പിക്കാമെന്ന് കേരള സര്‍ക്കാര്‍ ഉറപ്പുനല്‍കിയതാണെന്ന് സുപ്രീംകോടതി ചൂണ്ടിക്കാട്ടി.

ബിവറേജസ് കോര്‍പറേഷനിലുണ്ടാകുന്ന ഒഴിവുകളില്‍ 25 ശതമാനം ചാരായ തൊഴിലാളികള്‍ക്ക് മാറ്റിവെക്കുമെന്ന് 2002ല്‍ കേരള സര്‍ക്കാര്‍ ഉത്തരവ് പുറപ്പെടുവിക്കുകയും ചെയ്തു. എന്നാല്‍, അതിനുശേഷവും ബിവറേജസില്‍ നിയമനം നല്‍കാന്‍ സര്‍ക്കാര്‍ തയ്യാറായില്ലെന്നും നിരവധിപേര്‍ ഇതിനകം ആത്മഹത്യ ചെയ്തുവെന്നും അഡ്വ. ബിജു വാദിച്ചു. ഒടുവില്‍ 2015 ഡിസംബറില്‍ പുറപ്പെടുവിച്ച വിധിയില്‍ ഉത്തരവ് നടപ്പാക്കാന്‍ കേരള ഹൈകോടതി കര്‍ശന നിര്‍ദേശം നല്‍കിയിട്ടും ഫലമുണ്ടായില്ല എന്ന് ബിജു തുടര്‍ന്നു. അതിനെതിരെ സംസ്ഥാനസര്‍ക്കാറും ബിവറേജസ് കോര്‍പറേഷനും സുപ്രീംകോടതിയെ തെറ്റിദ്ധരിപ്പിച്ച് സ്‌റ്റേ വാങ്ങുകയായിരുന്നു. ബിവറേജസ് കോര്‍പറേഷനില്‍ ഒഴിവുകളൊന്നുമില്ലാത്തതിനാല്‍ നിയമനം നടക്കുന്നില്ലെന്ന സര്‍ക്കാറിന്റെയും കോര്‍പറേഷന്റെയും വാദം കളവാണെന്നും 100ലേറെ പിന്‍വാതില്‍ നിയമനം നടന്നിട്ടുണ്ടെന്നും ബിജു ബോധിപ്പിച്ചു.
ഇതേത്തുടര്‍ന്നാണ് മുഴുവന്‍ നിയമനവും നിര്‍ത്തിവെക്കാന്‍ സുപ്രീംകോടതി നിര്‍ദേശിച്ചത്. ഇതുവരെ നടത്തിയ നിയമനങ്ങളുടെ പട്ടിക നല്‍കണം. ദിവസവേതനക്കാരെ നിയമിക്കാന്‍ അനുവദിക്കണമെന്ന ബിവറേജസ് കോര്‍പറേഷന്റെ അഭിഭാഷകന്‍ അഡ്വ. തോമസ് പി.ജോസഫിന്റെ ആവശ്യം സുപ്രീംകോടതി തള്ളി. ഒക്‌ടോബര്‍ എട്ടിന് കേസ് പരിഗണിക്കും മുമ്പ് ഇതുവരെ നടത്തിയ നിയമനങ്ങളുടെ പട്ടിക സമര്‍പ്പിക്കണമെന്നും സുപ്രീംകോടതി ഉത്തരവിട്ടു.