രാജ്യതലസ്ഥാനത്ത് വായുമലിനീകരണം ആശങ്കാജനകമായി തുടരുന്നു. വ്യാഴാഴ്ച രാവിലെ രേഖപ്പെടുത്തിയ കണക്കുകൾ പ്രകാരം ഡൽഹിയിലെ ശരാശരി വായു ഗുണനിലവാര സൂചിക 229 ലെത്തി. ബുധനാഴ്ച രേഖപ്പെടുത്തിയ 228 നേക്കാൾ നേരിയ വർദ്ധനവാണിത്. കേന്ദ്ര മലിനീകരണ നിയന്ത്രണ ബോർഡിന്റെ വിവരപ്രകാരം നഗരത്തിലെ വായുനില നിലവിൽ 'മോശം' വിഭാഗത്തിൽ തന്നെയാണ്.

അതേസമയം, മഹാരാഷ്ട്രയിലെ മുംബൈയുടെ വിവിധ ഭാഗങ്ങളിലും കനത്ത പുകമഞ്ഞ് കാഴ്ചമറയ്ക്കുന്ന അവസ്ഥയുണ്ടാക്കി. ബാംദ്ര റെക്ലമേഷൻ ഉൾപ്പെടെയുള്ള പ്രദേശങ്ങളിൽ പുകമഞ്ഞ് പടർന്നുപിടിച്ച് നഗരത്തിന്റെ കാഴ്ചമറച്ചതായി ദൃശ്യങ്ങൾ വ്യക്തമാക്കുകയും ചെയ്യുന്നു,
ഡൽഹിയിലെ ഉത്തം നഗറിലാണ് ഏറ്റവും ഉയർന്ന മലിനീകരണം രേഖപ്പെടുത്തിയത്,

ഇവിടെ സൂചിക 339 ആണ്. മുൻഡ്ക (336), ദ്വാരക സെക്ടർ 8 (307) എന്നിവയാണ് തൊട്ടുപിന്നിൽ. സിആർആർഐ മഥുര റോഡ് (297), ജഹാംഗീർപുരി (294), പഞ്ചാബി ബാഗ് (286), വിവേക് വിഹാർ (277) എന്നിവിടങ്ങളിലും അന്തരീക്ഷ മലിനീകരണം അതിരൂക്ഷമാണ്. മറുഭാഗത്ത് ലോധീ റോഡിലാണ് ഡൽഹിയിൽ ഏറ്റവും കുറഞ്ഞ മലിനീകരണം രേഖപ്പെടുത്തിയത് (129). ഘോഗ (132), ഐഎംഡി ലോധീ റോഡ് (148) എന്നീ മേഖലകളിലും വായുനില 'മിതമായ' അവസ്ഥയിലാണ്. ഡൽഹിയോട് ചേർന്നുള്ള അയൽ നഗരങ്ങളിലും സ്ഥിതി വ്യത്യസ്തമല്ല.

നോയിഡയിൽ 235-ഉം, മനേസറിൽ 228-ഉം, ഗുരുഗ്രാമിൽ 227-ഉം എക്യുഐ രേഖപ്പെടുത്തി. ഗ്രേറ്റർ നോയിഡയിൽ 209 ആണ് സൂചിക. അതേസമയം ഗാസിയാബാദിലും (171) ഫരീദാബാദിലും (131) വായുനില 'മിതമായ' നിലയിലാണ് തുടരുന്നത്. നോയിഡ, മനേസർ, ഗുരുഗ്രാം, ഗ്രേറ്റർ നോയിഡ എന്നിവ 'മോശം' വിഭാഗത്തിൽ തന്നെയാണ്. രാജ്യത്തുടനീളമുള്ള വായു ഗുണനിലവാരത്തിൽ വൻ വ്യത്യാസങ്ങളാണ് രേഖപ്പെടുത്തിയിട്ടുള്ളത്.

സിപിസിബിയുടെ കണക്കെടുപ്പിലുള്ള 264 നഗരങ്ങളിൽ രാജസ്ഥാനിലെ ഭിവാഡിയിലാണ് രാജ്യത്ത് ഏറ്റവും ഉയർന്ന മലിനീകരണം രേഖപ്പെടുത്തിയത് (AQI 296).