കേന്ദ്ര സർക്കാർ ജീവനക്കാരുടെയും പെൻഷനേഴ്സിന്റെയും ക്ഷാമബത്ത (ഡിഎ), ക്ഷാമാശ്വാസം (ഡിആർ) എന്നിവ മൂന്ന് ശതമാനം വർദ്ധിപ്പിക്കാൻ കേന്ദ്ര മന്ത്രിസഭ അംഗീകാരം നൽകി. പ്രധാനമന്ത്രി നരേന്ദ്ര മോദിയുടെ അദ്ധ്യക്ഷതയിൽ ചേർന്ന മന്ത്രിസഭാ യോഗത്തിലാണ് തീരുമാനം.

മന്ത്രി അശ്വിനി വൈഷ്ണവാണ് വർദ്ധനവ് പ്രഖ്യാപിച്ചത്. ഏഴാം ശമ്പള കമ്മീഷന്റെ ശുപാർശകളുടെ അടിസ്ഥാനത്തിലാണ് ഈ തീരുമാനം. ഇതോടെ നിലവിലുള്ള 60 ശതമാനത്തിൽ നിന്ന് ഡിഎ 63 ശതമാനമായി ഉയർന്നു. 2026 ജൂലായ് ഒന്നുമുതൽ മുൻകാല പ്രാബല്യത്തോടെയാണ് വർദ്ധന നടപ്പാക്കുക. ഇതോടെ ജീവനക്കാർക്കും പെൻഷൻകാർക്കും ജൂലായ് മുതലുള്ള കുടിശ്ശികയ്ക്കും അർഹതയുണ്ടാകും.

 കേന്ദ്ര സർക്കാരിന്റെ തീരുമാനത്തിലൂടെ ഏകദേശം 48 ലക്ഷം ജീവനക്കാർക്കും 68 ലക്ഷം പെൻഷൻകാർക്കും പ്രയോജനം ലഭിക്കുമെന്നാണ് റിപ്പോർട്ട്.

ക്ഷാമബത്ത വർദ്ധിപ്പിക്കുന്നതിനായി പ്രതിവർഷം ഏകദേശം 10,016 കോടി രൂപയുടെ അധിക സാമ്പത്തിക ബാദ്ധ്യതയുണ്ടാകും. ജീവനക്കാരുടെയും പെൻഷൻകാരുടെയും ക്ഷാമബത്തയും ക്ഷാമാശ്വാസവും സാധാരണയായി വർഷത്തിൽ രണ്ടുതവണയാണ് കേന്ദ്ര സർക്കാർ പരിഷ്കരിക്കുന്നത്. ജനുവരി, ജൂലായ് മാസങ്ങളിലെ പ്രാബല്യത്തോടെയാണ് സാധാരണയായി ഈ പരിഷ്കരണങ്ങൾ നടപ്പാക്കുന്നത്.