എപ്പോഴും തന്റെ പിന്നാലെ നടന്നതിന്, സഹോദരി കുഞ്ഞനിയനെ കൊന്ന് ബാഗിലാക്കി വീടിന് പുറത്ത് കളഞ്ഞു!
പഞ്ചാബ് ലുധിയാനയിലുള്ള അമര്ജിത്ത് കോളനിയില് അനുജനെ കൊന്ന് ബാഗിലാക്കിയ പത്തൊമ്പതുകാരി പിടിയില്. ആന്ഷ് കനോജിയ എന്ന അഞ്ച് വയസുകാരനാണ് കൊല്ലപ്പെട്ടത്. സംഭവത്തില് സഹോദരി രേണു(19)നെ പൊലീസ് അറസ്റ്റ് ചെയ്തു. എവിടെ പേയാലും അനുജനും കൂടെ വരുന്നതിലുളള പക കൊണ്ടാണ് രേണു കൃത്യം ചെയ്തതത്രേ.
ഇക്കഴിഞ്ഞ ഒക്ടോബര് ആറിനാണ് സംഭവം നടന്നത്. ആശുപത്രിയില് ചികിത്സയിലായിരുന്ന ബന്ധുവിനെ കാണാന് അമ്മ പുറത്ത് പോയിരുന്ന സമയത്തായിരുന്നു സംഭവം. അമ്മയോടൊപ്പം പോകാനിരുന്ന ആന്ഷിനെ ചോക്ലേറ്റ് നല്കി വീടിനകത്ത് കൊണ്ടുപോയി കഴുത്ത് ഞെരിച്ച് കൊല്ലുകയായിരുന്നു.
തുടര്ന്ന് കുട്ടിയുടെ വസ്ത്രങ്ങള് അഴിച്ച് മാറ്റി മൃതദേഹം ബാഗിലാക്കി വീടിന് പുറത്ത് കളഞ്ഞു. മാതാപിതാക്കള് തിരികെ എത്തിയപ്പോള് കുട്ടിയെ കാണാനില്ലെന്ന് രേണു അറിയിച്ചു. തുടര്ന്ന് ഇവരുടെ പരാതിയുടെ അടിസ്ഥാനത്തില് പൊലീസ് നടത്തിയ അന്വേഷണത്തില് മൃതദേഹമടങ്ങിയ ബാഗ് കണ്ടെത്തുകയായിരുന്നു.
മാതാപിതാക്കളുടെ മുന്നില് വെച്ച് തന്നെ രേണു കുറ്റം സമ്മതിച്ചതായി പൊലീസ് അറിയിച്ചു. താന് എവിടെ പേയാലും ആന്ഷ് പിന്തുടരുമെന്നും ഒരിടത്തും തനിക്ക് സ്വസ്ഥത ലഭിക്കുന്നില്ലെന്നും അതിനാലാണ് അനുജനെ കൊലപ്പെടുത്തിയതെന്നും രേണു പറഞ്ഞു. കൊല നടത്തിയതില് തനിക്ക് യാതൊരു കുറ്റബോധവും ഇല്ലെന്നും പെണ്കുട്ടി വ്യക്തമാക്കി.
അതേസമയം, രേണു ഒരു യുവാവുമായി പ്രണയത്തിലാണെന്നും ഇയാള്ക്ക് കൊലയില് എന്തെങ്കിലും തരത്തിലുള്ള ബന്ധമുണ്ടോ എന്ന് പരിശോധിച്ച് വരുന്നതായും പൊലീസ് അറിയിച്ചു. ഐപിസി 302 പ്രകാരം കൊലപാതകം, 365 പ്രകാരം തട്ടിക്കൊണ്ടുപോകല് എന്നിവയ്ക്കാണ് പൊലീസ് കേസെടുത്തിരിക്കുന്നത്. രേണുവിന് രണ്ട് സഹോദരിമാര് കൂടിയുണ്ട്.
https://www.facebook.com/Malayalivartha