റാഫേല് അഴിമതി അന്വേഷിക്കാന് അലോക് വര്മ ആഗ്രഹിച്ചിരുന്നു; കേസ് അട്ടിമറിക്കുന്നതിന്റെ ഭാഗമായാണ് കേന്ദ്രം അലോക് വര്മയെ മാറ്റിയതെന്ന വെളിപ്പെടുത്തലുമായി സുപ്രീം കോടതി അഭിഭാഷകന് പ്രശാന്ത് ഭൂഷണ്
സി.ബി.ഐ ഡയറക്ടര് സ്ഥാനത്ത് നിന്ന് മാറ്റിയതിനെതിരെ സുപ്രീം കോടതിയില് ഹര്ജിയുമായി അലോക് കുമാര് വര്മ. അലോക് വര്മയുടെ ഹര്ജി കോടതി മറ്റന്നാള് പരിഗണിക്കും. പ്രധാന കേസുകള് അന്വേഷിക്കുന്നവരെ കേന്ദ്രം തല്സ്ഥാനത്ത് നിന്ന് നീക്കുന്നുവെന്ന് അലോക് വര്മയുടെ അഭിഭാഷകന് ഹര്ജിയില് ചൂണ്ടിക്കാട്ടി. സി.ബി.ഐയിലെ അധികാരപ്പോര് രൂക്ഷമായതിന് പിന്നാലെ ഡയറക്ടര് അലോക് കുമാര് വര്മയെ തത്സ്ഥാനത്ത് ഇന്നലെയാണ് നീക്കിയത്.
അഴിമതി കേസില് പ്രതിയായ സി.ബി.ഐ സ്പെഷ്യല് ഡയറക്ടര് രാകേഷ് അസ്താനയോട് നിര്ബന്ധിത അവധിയില് പോകാനും സര്ക്കാര് നിര്ദ്ദേിശിച്ചു. ഇന്നലെ പ്രധാനമന്ത്രി നരേന്ദ്ര മോദിയുടെ നേതൃത്വത്തില് ചേര്ന്ന യോഗത്തിലാണ് ഈ തീരുമാനങ്ങള് ഉണ്ടായത്. അലോക് വര്മയ്ക്ക് പകരം നാഗേശ്വര് റാവുവിന് ഡയറക്ടറുടെ താല്ക്കാലിക ചുമതല നല്കി. ഒഡിഷ കേഡറില് നിന്നുള്ള 1986 ബാച്ചിലെ ഐ.പി.എസ് ഉദ്യോഗസ്ഥനാണ് റാവു. റാവുവിനോട് അടിയന്തരമായി ചുമതല ഏറ്റെടുക്കാന് പ്രധാനമന്ത്രി നിര്ദ്ദേശിച്ചിട്ടുണ്ട്.
രണ്ട് കോടി രൂപ കൈക്കൂലി നല്കിയെന്ന വ്യവസായിയുടെ പരാതിയിലാണ് അസ്താനയ്ക്കെതിരെ സി.ബി.ഐ കേസെടുത്തത്. വ്യവസായി മോയിന് ഖുറേഷിയുമായി ബന്ധപ്പെട്ട അഴിമതിക്കേസ് അസ്താനയുടെ നേതൃത്വത്തിലുള്ള പ്രത്യേക സംഘം അന്വേഷിക്കവെ കൈക്കൂലി വാങ്ങിയെന്ന പരാതിയിലാണ് കേസ്. എന്നാല് കേസ് റദ്ദാക്കണമെന്ന് ആവശ്യപ്പെട്ട് അസ്താന ഇന്നലെ ഡല്ഹിയെ ഹൈക്കോടതിയെ സമീപിച്ചു. അസ്താനയെയെ തിങ്കളാഴ്ചവരെ അറസ്റ്റ് ചെയ്യരുതെന്ന് ഉത്തരവിട്ട ഡല്ഹി ഹൈക്കോടതി,? കേസില് അന്വേഷണം തുടരുന്നതിന് തടസമില്ലെന്നും വ്യക്തമാക്കി. കേസിലെ മൊബൈല് ഫോണ് ഉള്പ്പടെയുള്ള ഇലക്ട്രോണിക് രേഖകള് സംരക്ഷിക്കണമെന്നും കോടതി പറഞ്ഞു. ലോക് കുമാര് വര്മ്മയില് നിന്നും ജോയിന്റ് ഡയറക്ടര് എ.കെ ശര്മ്മയില് നിന്നും ഹൈക്കോടതി പ്രതികരണം തേടിയിട്ടുണ്ട്. ഹര്ജി തിങ്കളാഴ്ച വീണ്ടും കോടതി പരിഗണിക്കും.
അതേ സമയം സി.ബി.ഐ ഡയറക്ടര് സ്ഥാനത്ത് നിന്ന് അലോക് കുമാര് വര്മയെ മാറ്റിയതില് ആരോപണവുമായി സുപ്രീം കോടതി അഭിഭാഷകന് പ്രശാന്ത് ഭൂഷണ് രംഗത്തെത്തി. റാഫേല് അഴിമതി അന്വേഷിക്കാന് അലോക് വര്മ ആഗ്രഹിച്ചിരുന്നതായി പ്രശാന്ത് ഭൂഷണ് ആരോപിച്ചു. കേസ് അട്ടിമറിക്കുന്നതിന്റെ ഭാഗമായാണ് കേന്ദ്രം അലോക് വര്മയെ മാറ്റിയതെന്നും അദ്ദേഹം ആരോപിച്ചു.
https://www.facebook.com/Malayalivartha
