തിരഞ്ഞെടുപ്പിന്റെ മുന്നോടിയായി ബി.ജെ.പിക്ക് സംഭാവന നല്‍കണമെന്ന ആവശ്യവുമായി പ്രധാനമന്ത്രി നരേന്ദ്രമോദി രംഗത്ത്. നരേന്ദ്ര മോദി ആപ്പ് വഴി 5 രൂപ മുതല്‍ 1000 രൂപ വരെ നല്‍കാനാണ് മോദി ആവശ്യപ്പെട്ടിരിക്കുന്നത്.

1000 രൂപ തന്റെ പേരില്‍ ആപ്പ് വഴി ബി.ജെ.പിക്ക് സംഭാവന നല്‍കിക്കൊണ്ടാണ് മോദി പ്രവര്‍ത്തകരോട് സംഭാവന ആവശ്യപ്പെട്ട് രംഗത്തെത്തിയത്. ഈ സന്ദേശം എല്ലാവരിലും എത്തിക്കണമെന്നും മോദി പ്രവര്‍ത്തകരോട് ആവശ്യപ്പെടുകയും ചെയ്തു.

''5 രൂപ മുതല്‍ 1000 രൂപ വരെയുള്ള ഏത് സംഖ്യയും നരേന്ദ്ര മോദി മൊബൈല്‍ ആപ്പ് വഴി നിങ്ങള്‍ക്ക് സംഭാവനയായി നല്‍കാം. നിങ്ങളുടെ പിന്തുണയും സംഭാവനയും രാജ്യത്തെ സേവിക്കാനുള്ള ബി.ജെ.പിയുടെ ശ്രമങ്ങള്‍ക്ക് മുതല്‍ക്കൂട്ടാവും” മോദി പറഞ്ഞു.

ആം ആദ്മി പാര്‍ട്ടി തെരഞ്ഞെടുപ്പിന് മുന്നോടിയായി ധനസമാഹരണ പരിപാടികളുമായി രംഗത്തെത്തിയതിന് തൊട്ടു പിന്നാലെയാണ് ബി.ജെ.പിയുടെ ഈ നടപടി.

2016-17 വര്‍ഷത്തില്‍ബി.ജെ.പി നടത്തിയ ധനസമാഹരണ പരിപാടിയിൽ 532.27 കോടി സംഭാവന ഇനത്തില്‍ മാത്രം ലഭിച്ചു. മുന്‍ വര്‍ഷത്തെ അപേക്ഷിച്ച് 76.85 കോടി രൂപയുടെ വർധനവാണ് ബി.ജെ.പിക്ക് ലഭിച്ച സംഭാവനയില്‍ ലഭിച്ചത്.

പ്രളയക്കെടുതിയില്‍ വലയുന്ന കേരളത്തിന്റെ പുനര്‍നിര്‍മാണത്തിനായി വിദേശമലയാളികളുടെ സഹായം തേടിയ മുഖ്യമന്ത്രി പിണറായി വിജയന്റെ നടപടിയെ കേന്ദ്ര സർക്കാർ വലിയ രീതിയില്‍ വിമര്‍ശിച്ചിരുന്നു.

മുഖ്യമന്ത്രി യാചിക്കാനായി പോയിരിക്കുകയാണെന്നായിരുന്നു ബി.ജെ.പിയുടെ പരിഹാസം. പ്രളയത്തില്‍ എല്ലാം നഷ്ടപ്പെട്ട ഒരു ജനതയെ കൈപിടിച്ചുയര്‍ത്താനുള്ള ഭരണകൂടത്തിന്റെ ശ്രമങ്ങളെ വിമര്‍ശിച്ചവരാണ് സ്വന്തം പാര്‍ട്ടിക്ക് വേണ്ടി കൈനീട്ടി ഇറങ്ങിയിരിക്കുന്നത് എന്ന ആക്ഷേപമാണ് ഇപ്പോള്‍ സാമൂഹ്യമാധ്യമ ങ്ങളിൽ ഉയരുന്നത്.