ശബരിമലയില്‍ പ്രായഭേദമന്യേ സ്ത്രീകള്‍ക്ക് പ്രവേശനം നല്‍കാനുള്ള സുപ്രീം കോടതി വിധി നടപ്പാക്കുന്നതിനെതിരെ നടക്കുന്ന ശക്തമായ പ്രതിഷേധങ്ങളെ പറ്റിയുള്ള ചോദ്യങ്ങള്‍ക്ക് മറുപടിയായി. ചോര പുരണ്ട സാനിറ്ററി നാപ്കിനുമായി നിങ്ങള്‍ സുഹൃത്തിന്റെ വീട്ടിലേയ്ക്ക് പോകുമോ എന്നാണ് ശബരിമല പ്രശ്നത്തില്‍ കേന്ദ്രമന്ത്രിയും ബിജെപി നേതാവുമായ സ്മൃതി ഇറാനി ചോദിച്ചത്. എന്നാല്‍ സ്മൃതി ഇറാനിയുടെ അഭിപ്രായത്തോട് പ്രതികരിച്ചുകൊണ്ട് അധ്യാപികയും, പ്രവാസി സാംസ്‌കാരിക പ്രവര്‍ത്തകയുമായ ശ്രീകല പ്രകാശന്‍ ഫേസ്ബുക്കില്‍ പ്രസിദ്ധീകരിച്ച കുറിപ്പ് വൈറലാവുകയാണ്.

ശ്രീകല പ്രകാശന്റെ ഫേസ്ബുക്ക് പോസ്റ്റ് ഇങ്ങനെ.

'ആര്‍ത്തവ രക്തം നിറഞ്ഞ നാപ്കിനുമായി സുഹൃത്തിന്റെ വീട്ടിലേക്കു പോകുമോ'? സ്മൃതി ഇറാനി.

മാഡം, നിങ്ങളുടെ മാസമുറ സമയത്ത് പാര്‍ലമെന്റില്‍ നിങ്ങള്‍ പോകാറില്ലേ? നിങ്ങള്‍ക്ക് വാസ്തവത്തില്‍ അവിടെ എന്താണ് പണി? ഇന്ത്യന്‍ സ്ത്രീ ദിവസം തോറും അനുഭവിക്കുന്ന എന്തെങ്കിലും പ്രശ്‌നത്തെ നിങ്ങള്‍ ഇതേവരെ അഡ്രെസ്സ് ചെയ്തിട്ടുണ്ടോ? നിങ്ങള്‍ക്കു അറിയാമോ എത്ര സ്ത്രീകള്‍ ആണ് ദിനം പ്രതി ട്രാഫിക്കിങ്ങില്‍ പെടുന്നതെന്ന്? മയക്കു മരുന്ന് കടത്താനും സെക്‌സിനും അവയവങ്ങള്‍ മോഷ്ടിക്കാനും ആയി ഇന്ത്യന്‍ സ്ത്രീകള്‍ പുറത്തേക്കു അയക്കപ്പെടുന്നുണ്ട്. അവര്‍ക്കും ആര്‍ത്തവം ഉണ്ട് നാപ്കിനും ഉണ്ട്. എത്ര സ്ത്രീകള്‍ സ്ത്രീധനം കൊടുക്കാന്‍ ഇല്ലാത്തതിനാല്‍ മരണപ്പെടുന്നുണ്ട് എന്ന് നിങ്ങള്‍ക്ക് അറിയാമോ? എത്ര സ്ത്രീകള്‍ വര്‍ഷം തോറും ഡിപ്രഷനും മറ്റും ബാധിച്ചു ആത്മഹത്യ ചെയ്യപ്പെടുന്നുണ്ട് എന്ന് അറിയാമോ?

എത്ര പെണ്‍കുഞ്ഞുങ്ങള്‍ ആണ് ഭ്രൂണാവസ്ഥയില്‍ കൊല്ലപ്പെടുന്നതെന്ന് നിങ്ങള്‍ അന്വേഷിച്ചിട്ടുണ്ടോ? ഗ്രാമങ്ങളില്‍ ഇപ്പോഴും മിത്തുകളുടെയും വിശ്വാസങ്ങളുടെയും പേരില്‍ ജനിക്കുമ്പോള്‍ തന്നെ മുഖത്തേക്ക് തലയിണ അമര്‍ന്നും തൊണ്ടയില്‍ നെന്മണി കുരുങ്ങിയും പെണ്‍കുഞ്ഞുങ്ങള്‍ ദാരുണമായി കൊല്ലപ്പെടുന്നുണ്ട്. ലോക രാജ്യങ്ങളില്‍ തന്നെ സ്ത്രീകള്‍ക്ക് പോഷകാഹാര കുറവുള്ള രാജ്യങ്ങളില്‍ ഇന്ത്യ മുന്‍പന്തിയില്‍ ആണ് നില്‍ക്കുന്നത്.

നിങ്ങള്‍ ഇപ്പോഴും രക്തം പുരണ്ട ആര്‍ത്തവ തുണിയും പൊക്കി പിടിച്ചു വിശ്വാസത്തിനു വേണ്ടി സംസാരിക്കുന്നത് കാണുമ്പോള്‍ നാണക്കേട് തോന്നുന്നു. നിങ്ങള്‍ക്കു നാപ്കിന്‍ മാത്രേ അറിയുള്ളൂ. ഇന്ത്യയില്‍ ഇപ്പോഴും സ്ത്രീകള്‍ ചകിരിയും അറപ്പൊടിയും വൃത്തിയില്ലാത്ത തുണിയും ഉപയോഗിക്കുന്നുണ്ട്. നിങ്ങള്‍ ചോദിച്ചില്ലേ സുഹൃത്തിന്റെ വീട്ടില്‍ പോകുമോ എന്ന്? സുഹൃത്തിന്റെ വീട്ടില്‍ മാത്രം അല്ല എല്ലായിടത്തും പോകും.

ഞാന്‍ ഒരു അദ്ധ്യാപിക ആയിരുന്നു. എന്റെ കുട്ടികള്‍ അവരുടെ ടീച്ചര്‍ രക്തം നിറഞ്ഞ നാപ്കിനുമായി ആണോ വരുന്നതെന്ന് നോക്കാറില്ലായിരുന്നു. ആര്‍ത്തവ സമയത്തു വിശ്രമം പോലും ഇല്ലാതെ ഞങ്ങള്‍ ജോലി ചെയ്യുന്നുണ്ട് ഓഫിസുകളില്‍, തുണിക്കടകളില്‍, സ്‌കൂളുകളില്‍, തൊഴില്‍ എടുക്കുന്നുണ്ട്. ആര്‍ത്തവം ഞങ്ങള്‍ക്ക് തടസ്സമേയല്ല. അശുദ്ധമായിരുന്നു എങ്കില്‍ ആ സമയത്തു ഞങ്ങള്‍ ഉണ്ടാക്കുന്ന ഭക്ഷണം നിങ്ങള്‍ വേണ്ടെന്നു വയ്ക്കണം ആയിരുന്നു. ഞങ്ങള്‍ നെയ്യുന്ന തുണികള്‍ വേണ്ടെന്നു വയ്ക്കണം ആയിരുന്നു. പാടത്തും പറമ്പിലും ഒക്കെ സ്ത്രീകള ജോലി ചെയ്യുന്നുണ്ട്. ആ മിന്നല്‍ സ്ത്രീകളുടെ ഉപ്പു മാത്രം അല്ല രക്തവും വീണു കിടപ്പുണ്ട്. നിങ്ങളുടെ പരിശുദ്ധി നിറഞ്ഞ ഇടങ്ങളിലെല്ലാം തന്നെ അവള്‍ തൊടാത്ത ഒരു പുരുഷനെ കാട്ടി തരാന്‍കഴിയുമോ?

നിങ്ങള്‍ ഏതു നൂറ്റാണ്ടില്‍ ആണ് ജീവിക്കുന്നത്? മറ്റുള്ള രാജ്യങ്ങള്‍ ചൊവ്വയിലേക്ക് സ്ത്രീകളെ പറഞ്ഞയക്കുമ്പോള്‍ നിങ്ങള്‍ ചോദിക്കുന്നു ആര്‍ത്തവം നിങ്ങള്‍ക്ക് ഒരു തടസമല്ലേയെന്നു? നിങ്ങളെ പോലെ ഉള്ളവര്‍ സാമൂഹ്യപരം ആയി ഒരു ഉന്നമനവും സൃഷ്ടിക്കാന്‍ പോകുന്നില്ല. നിങ്ങളെ കേള്‍ക്കുന്ന ഞങ്ങളുടെ പെണ്‍കുട്ടികള്‍ പുച്ഛത്തോടെയാവും ഭാവിയില്‍ നിങ്ങളെ വിലയിരുത്തുക.

ഞങ്ങള്‍ പോകും. സുഹൃത്തിന്റെ വീട്ടില്‍ എന്നല്ല എവിടെയും. ആര്‍ത്തവം എന്നത് ജൈവികമായ ഒരു പ്രക്രിയ ആണെന്നും ഭൂമിയിലെ എല്ലാ ജീവാ ജലങ്ങള്‍ക്കും അത് ബാധകം ആണെന്നും മനുഷ്യന്‍ എന്ന നിലയില്‍ അതിനെ വില കുറച്ചു കാണേണ്ടതില്ലെന്നും നിങ്ങളൊക്കെ ഭരിക്കുന്ന രാജ്യത്തു പറഞ്ഞു കൊടുക്കാന്‍ ഒരു സ്‌കൂള്‍ ഉണ്ടാകില്ല എന്നറിയാം. ഓരോ സ്ത്രീയും അവളുടെ ശരീരത്തിനെ അറിയുകയും സയന്റിഫിക് ബോധം ഉണ്ടാവുകയും ചെയ്യണം. അല്ലെങ്കില്‍ അടുത്ത തലമുറ നിങ്ങള്ക്ക് മാപ്പു തരില്ല. ഇത്രയും പ്രിമിറ്റീവ് ആയി അവരെ വളര്‍ത്തുന്നതിന്. ഇതുപോലെ ഉള്ള മന്ത്രിമാര്‍ വരാതിരിക്കാനാണ് എങ്കില്‍ പെണ്‍കുഞ്ഞുങ്ങള്‍ക്കു ബോധവും വിവരവും ഉണ്ടാക്കി എടുക്കുക. രാജ്യം അതിന്റെ പുരോഗതിയിലേക്കു എത്തുന്നതും അപ്പോഴാണ്.