വാഹനങ്ങളും ഫാക്ടറികളും പുറന്തള്ളുന്ന പുകയും കാര്‍ഷിക വിള അവശിഷ്ടങ്ങള്‍ കത്തിക്കുന്നതും നിര്‍മാണ പ്രവര്‍ത്തനങ്ങളും കാരണം ഡല്‍ഹിയില്‍ പുകമഞ്ഞ് രൂക്ഷമായി തുടരുന്നു. സമുദ്ര സാമീപ്യമില്ലാത്ത ഡല്‍ഹിയില്‍ അന്തരീക്ഷത്തിലേക്ക് പ്രവഹിക്കുന്ന വിഷലിപ്തമായ പുകയെ മഞ്ഞ് ആഗിരണം ചെയ്താണ് അപകടകാരിയായ പുകമഞ്ഞ് രൂപപ്പെടുന്നത്. നഗരത്തിലെ അന്തരീക്ഷ വായു നിലവാര സൂചികയില്‍ ആപത്കരമായ 440 എന്ന നിലയിലാണ് രാജ്യ തലസ്ഥാനമിപ്പോള്‍. പൂജ്യം മുതല്‍ 50 വരെയുള്ള സൂചിക നല്ല വായു നിലവാരം സൂചിപ്പിക്കുമ്പോള്‍ 400 മുകളിലുള്ളത് അങ്ങേയറ്റം ആപത്കരമായ അവസ്ഥയെ ആണ് കാണിക്കുന്നത്.

അതേസമയം ലോകത്തിലെ തന്നെ അന്തരീക്ഷ വായു ഏറ്റവും മോശമായ നഗരമെന്ന കുപ്രസിദ്ധിയും ഇന്ത്യാ രാജ്യ തലസ്ഥാനത്തിന് കൈവന്നിരുന്നു. നിയന്ത്രണങ്ങളെ കാറ്റില്‍ പറത്തി ദീപാവലിക്ക് പടക്കം യഥേഷ്ടം പൊട്ടിച്ചതോടെയാണ് ധാക്കയെയും ലാഹോറിനെയും പിന്തള്ളി ഡല്‍ഹി ഒന്നാമതെത്തിയത്.

ഡല്‍ഹിക്കാര്‍ പൊട്ടിച്ചത് 50 ലക്ഷം കിലോ പടക്കമായിരുന്നു. പടക്കം പൊട്ടിക്കാന്‍ സുപ്രീം കോടതി ഏര്‍പ്പെടുത്തിയ നിയന്ത്രണങ്ങള്‍ പാലിക്കാതെയാണ് ഇതെന്നത് വലിയ പരിഭ്രാന്തിയുണ്ടാക്കുന്നതാണ്. എന്നാല്‍ ഇന്നലെ സ്ഥിതിക്ക് അല്‍പം ശമനം വരികയും വീണ്ടും സ്ഥാനങ്ങള്‍ മെച്ചപ്പെടുത്തി മൂന്നാമതാവുകയും ചെയ്തിരുന്നു.

നഗരത്തില്‍ വസിക്കുന്ന ജനങ്ങളില്‍ ശ്വസിക്കാന്‍ ബുദ്ധിമുട്ട് നേരിടുന്നവര്‍ പുറത്ത് പോയി ചെയ്യുന്ന കാര്യങ്ങള്‍ ഉപേക്ഷിക്കാന്‍ മെഡിക്കല്‍ ടീം നിര്‍ദേശിച്ചിട്ടുണ്ട്. എപ്പോള്‍ പുറത്തിറങ്ങുമ്പോഴും മാസ്‌ക് ധരിക്കണമെന്നും അവര്‍ ഉപദേശിച്ചു

ഡല്‍ഹിയിലെ വായു നിലവാരം നശിപ്പിക്കുന്നതില്‍ പ്രധാന പങ്ക് വഹിക്കുന്നത് അയല്‍ സംസ്ഥാനങ്ങളിലെ കര്‍ഷകരാണ്. വിള കത്തിക്കുന്നതു മൂലം ഉയരുന്ന പുക ഡല്‍ഹിയിലെ മഞ്ഞ് ആഗിരണം ചെയ്ത് കട്ടിയുള്ള പുകമഞ്ഞ് രൂപപ്പെടുന്നു. കാറ്റിന്റെ അസാന്നിധ്യം ഇത് നീക്കം ചെയ്യാനുള്ള സാധ്യതയും ഇല്ലാതാക്കുന്നു. വിളയും മറ്റും കത്തിക്കുന്നതില്‍ നിന്നും സര്‍ക്കാര്‍ കര്‍ഷകരെ വിലക്കിയിട്ടുണ്ടെങ്കിലും അത് നിര്‍ബാധം തുടരുകയാണ്.