ട്രെയിന്‍ യാത്രയ്ക്കിടെ പുകവലി വിലക്കിയ ഗര്‍ഭിണിയെ സഹയാത്രികന്‍ ശ്വാസംമുട്ടിച്ചുകൊലപ്പെടുത്തി. കുടുംബത്തോടൊപ്പം പഞ്ചാബ് ബിഹാര്‍ ജാലിയന്‍വാലാ എക്‌സ്പ്രസില്‍ യാത്രചെയ്തിരുന്ന ചിനാത് ദേവിയാണ് (45) കൊല്ലപ്പെട്ടത്. വെള്ളിയാഴ്ച രാത്രിയായിരുന്നു സംഭവമെന്ന് റെയില്‍വേ പോലീസ് പറഞ്ഞു. പ്രതി സോനു യാദവിനെ അറസ്റ്റുചെയ്തതായി ഷാജഹാന്‍പുര്‍ റെയില്‍വേ പോലീസ് സ്‌റ്റേഷന്റെ ചുമതലയുള്ള എ.കെ. പാണ്ഡെ പറഞ്ഞു.
പുകവലിച്ചതിനെച്ചൊല്ലി ചിനാത് ദേവിയുമായി വാക് തര്‍ക്കത്തിലേര്‍പ്പെട്ട സോനു ഒടുവില്‍ ഇവരെ ശ്വാസംമുട്ടിക്കുകയായിരുന്നു. തീവണ്ടി നിര്‍ത്തി ചിനാത് ദേവിയെ ആശുപത്രിയില്‍ പ്രവേശിപ്പിച്ചെങ്കിലും മരിച്ചതായി ഡോക്ടര്‍മാര്‍ സ്ഥിരീകരിച്ചു. ഛഠ് പൂജാ ആഘോഷങ്ങളില്‍ പങ്കെടുക്കാന്‍ ബിഹാറിലേക്ക് പോവുകയായിരുന്നു ഇവരുടെ കുടുംബം.