ഛത്തിസ്ഗഢിലെ കാംകേര്‍ ജില്ലയില്‍ ആറിടത്ത് മാവോവോദികള്‍ നടത്തിയ ബോംബ് സ്‌ഫോടനത്തില്‍ ബി.എസ്.എഫ് സബ് ഇന്‍സ്‌പെക്ര്‍ കൊല്ലപ്പെട്ടു. ബിജാപുര്‍ ജില്ലയില്‍ സുരക്ഷ സേനയുമായുണ്ടായ ഏറ്റുമുട്ടലില്‍ രണ്ടു മാവോവാദികളും കൊല്ലപ്പെട്ടു.കട്ടക്കലിനും ഗോമെ ഗ്രാമത്തിനുമിടയില്‍ വനമേഖലയില്‍ ബി.എസ്.എഫ് സംഘം മാവോവാദികള്‍ക്കായി തിരച്ചില്‍ നടത്തുന്നതിനിടെയാണ് സ്‌ഫോടന പരമ്പരയുണ്ടായതെന്ന് റായ്പുര്‍ റേഞ്ച് ഐ.ജി ദീപാന്‍ശു കാബ്‌റ പറഞ്ഞു. ഉഗ്രശേഷിയുള്ള നാടന്‍ ബോംബാണ് പൊട്ടിത്തെറിച്ചത്. ഗുരുതര പരിക്കേറ്റ ബി.എസ്.എഫ് സബ് ഇന്‍സ്‌പെക്ടര്‍ മഹേന്ദ്ര സിങ് ആശുപത്രിയിലേക്കുള്ള വഴിയിലാണ് മരിച്ചത്.
തെരഞ്ഞെടുപ്പ് പ്രചാരണം തുടങ്ങിയ ശേഷം കഴിഞ്ഞ 15 ദിവസത്തിനിടെ സംസ്ഥാനത്ത് മാവോവാദികള്‍ നടത്തിയ നാലാമത്തെ ആക്രമണമാണിത്. ബിജാപുര്‍ ജില്ലയില്‍ ബേദ്‌രെ വനത്തില്‍ നക്‌സല്‍ വിരുദ്ധസേന നടത്തിയ വെടിവെപ്പിലാണ് രണ്ട് മാവോവാദികള്‍ കൊല്ലപ്പെട്ടത്. ആയുധങ്ങളും വെടിക്കോപ്പുകളും പിടിച്ചെടുത്തു. ഒരു സംഘം മാവോവാദികള്‍ സുരക്ഷസേനയുമായി ഏറ്റുമുട്ടുകയായിരുന്നു. ഒരാളെ പിടികൂടിയതായും റിപ്പോര്‍ട്ടുണ്ട്.
കഴിഞ്ഞ രണ്ടാഴ്ചക്കിടെ നടന്ന മൂന്ന് ആക്രമണങ്ങളില്‍ എട്ടു ജവാന്മാരടക്കം 13 പേരാണ് കൊല്ലപ്പെട്ടത്. 10 ദിവസത്തിനിടെ ബസ്തര്‍ മേഖലയില്‍നിന്നും രാജനന്ദഗാവ് ജില്ലയില്‍നിന്നുമായി 300ലേറെ നാടന്‍ ബോംബുകള്‍ സുരക്ഷസേന കണ്ടെത്തി നിര്‍വീര്യമാക്കിയതായി നക്‌സല്‍ വിരുദ്ധ നീക്കങ്ങളുടെ ചുമതലയുള്ള സ്‌പെഷല്‍ ഡയറക്ടര്‍ ജനറല്‍ ഡി.എം. അവാസ്തി പറഞ്ഞു. ഒന്നാംഘട്ടത്തില്‍ 18 മണ്ഡലങ്ങളിലാണ് വോട്ടെടുപ്പ്.
രണ്ടുഘട്ടമായി നടക്കുന്ന തെരഞ്ഞെടുപ്പിന് സുരക്ഷയൊരുക്കാന്‍ സംസ്ഥാനത്തേക്ക് സി.ആര്‍.പി.എഫ്, ബി.എസ്.എഫ്, ഐ.ടി.ബി.പി വിഭാഗങ്ങളിലായി 65,000 സേനാംഗങ്ങളെയാണ് കേന്ദ്ര സര്‍ക്കാര്‍ അയച്ചിട്ടുള്ളത്. സംസ്ഥാനം പൂര്‍ണമായും പൊലിസ് വലയത്തിലാണ്. ഹെലികോപ്ടറുകളിലാണ് വോട്ടിങ് യന്ത്രങ്ങളും മറ്റും എത്തിച്ചത്.