ഓള് ഇന്ത്യ റേഡിയോയിലും മീ ടു; ലൈംഗികാതിക്രമങ്ങളെ കുറിച്ചുള്ള പരാതിയില് അന്വേഷണം ആവശ്യപ്പെട്ട് കേന്ദ്ര വനിതാ ശിശു ക്ഷേമ മന്ത്രാലയം
രാജ്യത്തെ ഓള് ഇന്ത്യ റേഡിയോ(എഐആര്) സ്റ്റേഷനുകളിലെ മീ ടു വെളിപ്പെടുത്തലുകളില് അന്വേഷണം ആവശ്യപ്പെട്ട് കേന്ദ്ര വനിതാ ശിശു ക്ഷേമ മന്ത്രാലയം. ലൈംഗികാതിക്രമങ്ങളെ കുറിച്ചുള്ള പരാതിയില് അന്വേഷണം നടത്തണമെന്ന് കേന്ദ്ര വനിത ശിശുക്ഷേമ വകുപ്പ് മന്ത്രി മേനക ഗാന്ധി വാര്ത്താ വിതരണ പ്രക്ഷേപണ മന്ത്രി രാജ്യവര്ധന്സിംഗ് റാത്തോഡിന് കത്തയച്ചു. ഓള് ഇന്ത്യ റേഡിയോ കാഷ്വല് അനൗണ്സര് ആന്ഡ് കോംപയേഴ്സ് യൂണിയന്റെ(എഐസിഎസിയു) പരാതിയുടെ അടിസ്ഥാനത്തിലാണ് ഇടപെടല്. നിരവധി ലൈംഗികാതിക്രമ പരാതികള് ഉണ്ടായിട്ടുണ്ടെന്നും എന്നാല് ഈ പരാതികളില് നടപടികള് സ്വീകരിക്കുന്നില്ലെന്നും എഐസിഎസിയു ജനറല് സെക്രട്ടറി ശബ്നം ഖനം കത്തില് പറഞ്ഞിരുന്നു. അനൗണ്സര് തസ്തികയിലുള്ള താത്കാലിക ജീവനക്കാരായ സ്ത്രീകളാണ് ലൈംഗികാതിക്രമത്തിന് ഇരകളാകുന്നത്. എന്നാല് പരാതിക്കാര്ക്ക് തൊഴില് നിഷേധിക്കപ്പെടുകയാണെന്നും കത്തില് ചൂണ്ടിക്കാണിക്കുന്നു.
ലൈംഗികാതിക്രമത്തിനും തൊഴില് നിഷേധത്തിനും ഇരകളായി തീരുകയാണ് എഐആറിലെ താത്കാലിക ജീവനക്കാര്. പ്രസാര് ഭാരതിക്കും വാര്ത്താവിതരണ പ്രക്ഷേപണ മന്ത്രാലയത്തിനും കത്തുകള് അയച്ചിട്ടും നടപടി എടുത്തില്ലെന്നും ശബ്നം മന്ത്രിക്കയച്ച കത്തില് പറഞ്ഞു.
https://www.facebook.com/Malayalivartha