ദലിത് നേതാവിനെ 'വലിച്ചു പുറത്തിറക്കിയാണ്' സോണിയ ഗാന്ധി കോണ്ഗ്രസിന്റെ അധ്യക്ഷയായത് ;കോണ്ഗ്രസിനെതിരെ രൂക്ഷ വിമര്ശനവുമായി പ്രധാനമന്ത്രി നരേന്ദ്രമോദി
കോണ്ഗ്രസിനെതിരെ വീണ്ടും രൂക്ഷ വിമര്ശനവുമായി നരേന്ദ്രമോദി. ദലിത് നേതാവിനെ 'വലിച്ചു പുറത്തിറക്കിയാണ്' കോണ്ഗ്രസിന്റെ അധ്യക്ഷ സ്ഥാനത്തേക്ക് പാര്ട്ടി സോണിയ ഗാന്ധിയെ കൊണ്ടു വന്നതെന്ന് മോദി പറഞ്ഞു. പാര്ട്ടിയുടെ പുതിയ അധ്യക്ഷയായി സോണിയ ഗാന്ധിയെ കൊണ്ടുവരാന് അന്ന് ദലിത് നേതാവ് സീതാറാം കേസരിയെ പുറത്താക്കി. സീതാറാം കേസരിയെ കോണ്ഗ്രസ് അദ്ധ്യക്ഷനായി കാലാവധി പൂര്ത്തിയാക്കാന് പോലും അവര് സമ്മതിച്ചില്ല. ഛത്തീസ്ഗഢിലെ തിരഞ്ഞെടുപ്പ് റാലിയിന് സംസാരിക്കുകയായിരുന്നു നരേന്ദ്രമോദി.
'ഒരു കുടുംബത്തിന്റെ നാലു തലമുറ രാജ്യം ഭരിച്ചു. പക്ഷേ അധികാരത്തിലിരുന്നതിന്റെ ആനുകൂല്യം ആ കുടുംബത്തിന് മാത്രമാണ് ലഭിച്ചത്. രാജ്യത്തിന് വേണ്ടി ഒന്നും ചെയ്തില്ല.ഛത്തീസ്ഗഡിനും കോണ്ഗ്രസ് കാലത്തെ കേന്ദ്രഭരണത്തില് നിന്നും യാതൊന്നും ലഭിച്ചില്ലെന്നും മോദി കുറ്റപ്പെടുത്തി. പൊതുജനത്തിന് ഒരുപകാരവും ഇതുവരെ ചെയ്യാത്ത ഇവര് ജനങ്ങളുടെ ആവശ്യം നിറവേറ്റുമെന്നുപറയുന്നത് എങ്ങനെയാണ് വിശ്വസിക്കുക എന്നും മോദി പറഞ്ഞു.
കോണ്ഗ്രസിന്റെ 'ഫോണ് ബാങ്കിംഗ്' രീതിയാണ് രാജ്യത്തെ ബാങ്കുകളെ തകര്ത്തത്. പാര്ട്ടിയില് നിന്നുള്ള ഒരൊറ്റ ഫോണ്വിളി കൊണ്ട് വായ്പ ലഭിക്കുമായിരുന്നു. കോണ്ഗ്രസിന്റെ ആത്മമിത്രങ്ങള്ക്കായിരുന്നു ഈ ആനുകൂല്യം. പക്ഷേ അതിന്റെ പേരില് ദുരിതം സഹിക്കേണ്ടി വന്നത് രാജ്യത്തെ ജനങ്ങള്ക്കാണെന്നും മോദി കുറ്റപ്പെടുത്തി. നേരത്തേ കേന്ദ്രത്തില് റിമോട്ട് കണ്ട്രോള് കൊണ്ടു നിയന്ത്രിക്കപ്പെടുന്ന സര്ക്കാരായിരുന്നു. ബിജെപിയെ ഭയമുള്ള ഒരു കുടുംബത്തിന്റെ കൈകളിലായിരുന്നു പത്തു വര്ഷത്തോളം റിമോട്ടെന്നും മോദി പറഞ്ഞു. പ്രസ്തുത കുടുകുടുംബത്തില് നിന്നല്ലാതെ ഒരാളെ പാര്ട്ടി അധ്യക്ഷനാക്കാന് കോണ്ഗ്രസിനു ധൈര്യമുണ്ടോയെന്നും മോദി വെല്ലുവിളിച്ചു.
https://www.facebook.com/Malayalivartha