മാളില് മുലയൂട്ടാന് സൗകര്യമുണ്ടാക്കണം എന്ന് അഭ്യര്ത്ഥിച്ചു , ഇതൊക്കെ വീട്ടില് ചെയ്തിട്ട് മാളില് വരണമെന്ന് ധിക്കാരം നിറഞ്ഞ മറുപടി
കൊല്ക്കത്തയിലെ സൗത്ത് സിറ്റി മാളില് മുലയൂട്ടാന് സ്ഥലം വേര്തിരിച്ചിട്ടില്ല എന്നു ചൂണ്ടിക്കാണിച്ച അമ്മയോട് മോശമായി മറുപടി നല്കിയതിനെ തുടര്ന്ന് വിവാദം പടരുന്നു. കുഞ്ഞിനെ മുലയൂട്ടാന് വൃത്തിയുള്ള സ്ഥലം ഒരുക്കണമെന്ന് സോഷ്യല് മീഡിയയിലൂടെ ആവശ്യപ്പെട്ട അമ്മയോട് മാളിലെത്തുന്ന മറ്റാളുകളുടെ സ്വകാര്യതയില് വിട്ടുവീഴ്ച ചെയ്യാന് കഴിയില്ലെന്ന ധിക്കാരപരമായ മറുപടിയാണ് മാള് നല്കിയത്. വിവാദമായതിനെത്തുടര്ന്ന് മാള് അധികൃതര് മാപ്പുപറഞ്ഞു.
നവജാതശിശുവിനൊപ്പം മാളിലെത്തിയ കൊല്ക്കത്ത സ്വദേശിയായ അമ്മയ്ക്കാണ് ദുരനുഭവം. മുലയൂട്ടാന് സ്ഥലമന്വേഷിച്ചപ്പോള് ടോയ്ലറ്റില് പോകാനാണ് സ്റ്റാഫ് നല്കിയ മറുപടി. തുടര്ന്ന് മാളിന്റെ ഔദ്യോഗിക ഫെയ്സ്ബുക്ക് പേജില് യുവതി മുലയൂട്ടാന് സ്ഥലമില്ലെന്ന് കാണിച്ച് മോശം റിവ്യൂ നല്കി.
ഇതിന് മാളിന്റെ ഔദ്യോഗിക പേജില് നിന്നെത്തിയ മറുപടി ഇങ്ങനെ:''മുലയൂട്ടാന് ഇടമില്ല എന്നതൊരു ബുദ്ധിമുട്ടായി തോന്നിയത് തന്നെ വലിയ തമാശ. മാളില് മുലയൂട്ടാന് അനുവാദമില്ലാത്തതിന് നിരവധി കാരണങ്ങളുണ്ട്. അടിയന്തരസാഹചര്യങ്ങളില് മാളിലെത്തുന്നവരെ സഹായിക്കേണ്ടത് ഞങ്ങളുടെ ഉത്തരവാദിത്തമാണ്. പക്ഷേ ഇതൊരു ഷോപ്പിങ് മാളാണ്. അതുകൊണ്ട് വീട്ടുകാര്യങ്ങള് വീട്ടില് തന്നെ ചെയ്യുക. അവ ഇതുപോലുള്ള സ്ഥലങ്ങളില് ചെയ്യാന് ശ്രമിക്കരുത്, അല്ലെങ്കില് അതനുസരിച്ച് കാര്യങ്ങള് പ്ലാന് ചെയ്യുക.നിങ്ങള്ക്ക് കുഞ്ഞിനെ മുലയൂട്ടണമെന്ന് തോന്നുമ്പോഴൊക്കെ പൊതുസ്ഥലങ്ങളില് അതിനുള്ള സൗകര്യങ്ങളൊരുക്കണമെന്നാണോ നിങ്ങള് പറയുന്നത്. പൊതുസ്ഥലങ്ങളിലെത്തുന്ന മറ്റുള്ളവരുടെ സ്വകാര്യതയില് ഞങ്ങള്ക്ക് വിട്ടുവീഴ്ച ചെയ്യാന് കഴിയില്ല..'
മുലയൂട്ടുന്നത് വീട്ടുകാര്യമാണെന്നും മറ്റുള്ളവരുടെ സ്വകാര്യതക്കാണ് പ്രാധാന്യമെന്നുമുള്ള മറുപടി സോഷ്യല് മീഡിയയില് വലിയ പ്രതിഷേധത്തിനിടയാക്കി. തുടര്ന്ന് യുവതി മറുപടിയായി കുറിച്ചു:''ഒരു ഷോപ്പിങ് മാളില് വേണ്ട അത്യാവശ്യ കാര്യങ്ങളായ ബേബി റൂം, ഫീഡിങ് സോണ് എന്നിവയെക്കുറിച്ചാണ് ഞാന് പരാതിയുയര്ത്തിയത്. മുലയൂട്ടാന് വൃത്തിഹീനമായ ടൊയ്ലറ്റുകള് ഉപയോഗിക്കാന് അവര് ആദ്യം പറഞ്ഞു.
അടിസ്ഥാനസൗകര്യം ആവശ്യപ്പെട്ടതിന് അവര് നല്കിയ മറുപടി നോക്കൂ. കുഞ്ഞുങ്ങളും അവരെ മുലയൂട്ടുന്നതും വീട്ടുകാര്യമല്ല. അവര്ക്ക് വേണ്ടപ്പോഴൊക്കെ മുലയൂട്ടേണ്ടത് ആവശ്യമാണ്. ഒരു സ്ത്രീക്കും അവരുടെ മാറിടം പൊതുസ്ഥലത്ത് പ്രദര്ശിപ്പിക്കാന് താത്പര്യമുണ്ടാകില്ല. വളരെ പ്രാഥമികമായ ഒരാവശ്യത്തെക്കുറിച്ചാണ് ഞാന് സംസാരിക്കുന്നത്.''യുവതിയുടെ കുറിപ്പ് ഏറ്റെടുത്ത് നിരവധിയാളുകള് മാളിനെതിരെ പരസ്യമായി രംഗത്തുവന്നു.
ഇതോടെ കമന്റ് ഡിലീറ്റ് ചെയ്ത് മാപ്പുപറഞ്ഞ് മാള് അധികൃതര് രംഗത്തെത്തി. ഏജന്സിയുടെ പരാമര്ശത്തില് മാപ്പുപറയുന്ന പോസ്റ്റില്, നവീകരണപ്രവര്ത്തനങ്ങള് നടന്നുവരികയാണെന്നും അവ പൂര്ത്തിയായാല് എല്ലാ ഫ്ലോറുകളിലും ഫീഡിങ് റൂമുകള് ഉണ്ടാകുമെന്നും വ്യക്തമാക്കി. അസൗകര്യം നേരിട്ട യുവതിയോട് മാപ്പുചോദിക്കുന്നതായും കുറിപ്പില് പറയുന്നു. ഈ പോസ്റ്റിനെതിരെയും വലിയ വിമര്ശനങ്ങളാണ് ഉയരുന്നത്.
https://www.facebook.com/Malayalivartha
