ഡ്രോണുകള് ഉപയോഗിക്കുന്നതിനായി കേന്ദ്ര സര്ക്കാറിന്റെ പുതിയ നയം ഇന്ന് മുതല് പ്രാബല്യത്തില്
ഡ്രോണുകള് ഉപയോഗിക്കുന്നതിനായി കേന്ദ്രസര്ക്കാര് അവതരിപ്പിച്ച പുതിയ നയം ഇന്ന് മുതല് നിലവില് വന്നു. ഡിജിറ്റല് സ്കൈ എന്ന ഓണ്ലൈന് പ്ലാറ്റ്ഫോമായിരിക്കും ഇനി ഡ്രോണുകളെ നിയന്ത്രിക്കുക. ഡിജിറ്റല് സ്കൈയില് റജിസ്റ്റര് ചെയ്തവര്ക്ക് മാത്രമാകും ഡ്രോണുകള് പറപ്പിക്കാനുള്ള അവകാശം. റിമോട്ട് ഉപയോഗിച്ച് പ്രവര്ത്തിക്കുന്ന എയര്ക്രാഫ്റ്റുകള്, ഓട്ടോമാറ്റിക് എയര്ക്രാഫ്റ്റുകള് എന്നിവയുടെ പ്രവര്ത്തനത്തിനുള്ള നയമാണ് കേന്ദ്രസര്ക്കാര് രൂപീകരിച്ചത്. ഡ്രോണുകളെ റിമോട്ട് ഉപയോഗിച്ച് പ്രവര്ത്തിക്കുന്ന എയര്ക്രാഫ്റ്റുകളുടെ കൂട്ടത്തിലാണ് ഉള്പ്പെടുത്തിയിരിക്കുന്നത്.
പുതിയ നിയമനുസരിച്ച് ഡ്രോണുകളെ നാലായി തിരിച്ചിട്ടുണ്ട്. 250 ഗ്രാമില് താഴെ ഭാരമുള്ള നാനോ, 250 ഗ്രാം മുതല് 2 കിലോ ഗ്രാം വരെ മൈക്രോ, 2 കിലോ ഗ്രാം മുതല് 25 കിലോ ഗ്രാം വരെ സ്മാള്, 25 കിലോ ഗ്രാം മുതല് 150 കിലോ ഗ്രാം വരെ മീഡിയം, 150 കിലോ ഗ്രാമിന് മുകളില് ലാര്ജ് എന്നിങ്ങനെയാണ് വിവിധ കാറ്റഗറികള്. ഇതില് നാനോ, മൈക്രോ വിഭാഗങ്ങള്ക്ക് ലൈസന്സ് ആവശ്യമില്ല. മറ്റ് വിഭാഗങ്ങളിലുള്ള ഡ്രോണുകള് പറത്തണമെങ്കില് അവ രജിസ്റ്റര് ചെയ്ത് യുണിക് ഐഡന്റിഫിക്കേഷന് നമ്പര് കരസ്ഥമാക്കണം. അനുമതിയുണ്ടെങ്കിലും 400 അടി ഉയരത്തില് മാത്രമേ ഇവ പറത്താന് പാടുള്ളു.
രാത്രിയില് ഉപയോഗിക്കുന്നതിന് നിരോധനമുണ്ട്. 18 വയസ് പൂര്ത്തിയായവര്ക്ക് മാത്രമേ ഡ്രോണ് പറത്താനുള്ള ലൈസന്സ് നല്കു. ഇതിന് പുറമേ ഇംഗ്ലീഷ് പരിജ്ഞാനവും പത്താം ക്ലാസ് ജയവും ആവശ്യമാണ്. വിമാനത്താവളങ്ങളുടെ പരിസരം, രാജ്യാന്തര അതിര്ത്തി, ന്യൂഡല്ഹി വിജയ് ചൗക്ക്, സംസ്ഥാന സെക്രട്ടറിയേറ്റ് മന്ദിരങ്ങള്, സേന കേന്ദ്രങ്ങള് മറ്റ് സുരക്ഷാ സ്ഥാപനങ്ങള് എന്നിവിടങ്ങളില് ഡ്രോണ് പറത്താന് അനുമതി ഉണ്ടാവില്ല. ഡിജിററല് സ്കൈ വൈബ്സൈറ്റിലോ ആപ്പിലോ റജിസ്റ്റര് ചെയ്യാനുള്ള സൗകര്യം ഒരുക്കും. ഡ്രോണിന്റെ ഉടമസ്ഥന്, പറത്തുന്നയാളുടെ വിവരം, ഡ്രോണിനെ സംബന്ധിച്ചവിവരങ്ങള് എന്നിവ വൈബ്സൈറ്റില് ചേര്ക്കേണ്ടതുണ്ട്. ഡ്രോണ് നിയന്ത്രിക്കുന്നവര്ക്ക് പ്രത്യേക പരിശീലനം ലഭിച്ചിട്ടുണ്ടോയെന്ന് ഉറപ്പാക്കാനാണ് ഈ നടപടി.
https://www.facebook.com/Malayalivartha
