രാജസ്ഥാന്‍, തെലങ്കാന നിയമസഭ തെരഞ്ഞെടുപ്പിന്റെ പരസ്യപ്രചാരണം ബുധനാഴ്ച വൈകീട്ട് അവസാനിച്ചു. രണ്ടു സംസ്ഥാനങ്ങളിലും വിധിയെഴുത്ത് വെള്ളിയാഴ്ച. പ്രധാനമന്ത്രി നരേന്ദ്ര മോദിയും കോണ്‍ഗ്രസ് പ്രസിഡന്റ് രാഹുല്‍ ഗാന്ധിയും ഉള്‍പ്പെടെയുള്ള പ്രമുഖരാണ് രാജസ്ഥാനിലും തെലങ്കാനയിലും പ്രചാരണത്തിന് എത്തിയത്. ലോക്‌സഭ തെരഞ്ഞെടുപ്പിന്റെ സെമിഫൈനലെന്ന് വിശേഷിപ്പിക്കുന്ന അഞ്ചു നിയമസഭകളിലേക്കുള്ള തെരഞ്ഞെടുപ്പിന്റെ അവസാനഘട്ടമാണ് വെള്ളിയാഴ്ച നടക്കുക.

ഛത്തിസ്ഗഢ്, മിസോറം, മധ്യപ്രദേശ് സംസ്ഥാനങ്ങളിലെ തെരഞ്ഞെടുപ്പ് നേരത്തെ പൂര്‍ത്തിയായി. ഡിസംബര്‍ 11നാണ് വോട്ടെണ്ണല്‍. രാജസ്ഥാനില്‍ 200 മണ്ഡലങ്ങളിലേക്കാണ് തെരഞ്ഞെടുപ്പ്. തെലങ്കാനയില്‍ 119 മണ്ഡലങ്ങളിലേക്കാണ് വോട്ടെടുപ്പ്. രാജസ്ഥാനില്‍ മുഖ്യമന്ത്രി വസുന്ധര രാജെ സര്‍ക്കാറിനെതിരെ ഭരണവിരുദ്ധ വികാരമുള്ളതിനാല്‍ കോണ്‍ഗ്രസ് അധികാരത്തിലെത്തുമെന്നാണ് സര്‍വേ ഫലങ്ങള്‍ നല്‍കുന്ന സൂചന.
തെലങ്കാനയില്‍ കാലാവധി തികയും മുമ്പ് മുഖ്യമന്ത്രി കെ. ചന്ദ്രശേഖര റാവു നിയമസഭ പിരിച്ചുവിടാന്‍ ശിപാര്‍ശചെയ്ത് തെരഞ്ഞെടുപ്പിന് വഴിയൊഴുക്കുകയായിരുന്നു.