മിന്നലാക്രമണത്തെ രാഷ്ട്രീയവല്കരിച്ചുവെന്ന് മുന് സൈനിക മേധാവി ലഫ്. ജനറല് ഡി.എസ്. ഹൂഡ
മിന്നലാക്രമണത്തെ രാഷ്ട്രീയവല്കരിച്ചുവെന്ന് മുന് സൈനിക മേധാവി ലഫ്. ജനറല് ഡി.എസ്. ഹൂഡ. ഇത് സൈന്യത്തിന് ഗുണകരമല്ലെന്നും അദ്ദേഹം പറഞ്ഞു. മിന്നലാക്രമണം ആവശ്യമായിരുന്നു. അത് സൈന്യം നടത്തി.
എന്നാല് മിന്നലാക്രമണത്തെ രാഷ്ട്രീയവല്കരിച്ചു. അത് നല്ലതാണോ അല്ലയോ എന്ന് രാഷ്ട്രീയക്കാര് പറയേണ്ടിയിരിക്കുന്നുവെന്നും ഹൂഡ വ്യക്തമാക്കി. ചണ്ഡിഗഡില് സൈനിക ലിറ്ററേച്ചര് ഫെസ്റ്റിവലില് സംസാരിക്കുകയായിരുന്നു അദ്ദേഹം.
വിജയത്തെ കുറിച്ച് ആവേശമുണ്ടാവുക സ്വഭാവികമാണ്. മിന്നലാക്രമണത്തിന്റെ വിജയത്തിന് അമിത പ്രചാരണം കൊടുക്കുന്നതും രാഷ്ട്രീയവല്കരിക്കാന് ശ്രമിക്കുന്നതും ദോഷം മാത്രമേ ചെയ്യൂ. മിന്നലാക്രമണങ്ങള് രഹസ്യമായി നടത്തുന്നതാണ് നല്ലതെന്നും ഹൂഡ വ്യക്തമാക്കി. 2016 സെപ്റ്റംബര് 29ന് അതിര്ത്തി കടന്ന് ഇന്ത്യന് സൈന്യം മിന്നലാക്രമണം നടത്തിയപ്പോള് വടക്കന് സൈനിക കമാണ്ടറായിരുന്നു ഡി.എസ്. ഹൂഡ.
പാകിസ്താന് തീവ്രവാദികള് ഉറിയിലെ സൈനിക കേന്ദ്രത്തിന് നേര്ക്ക് നടത്തിയ ആക്രമണത്തില് 19 സൈനികര് കൊല്ലപ്പെട്ടിരുന്നു. ഇതിന് മറുപടിയായാണ് ഇന്ത്യ മിന്നലാക്രമണം നടത്തിയത്.
https://www.facebook.com/Malayalivartha