മേഘാലയയില് ഖനിയില് കുടുങ്ങിയ തൊഴിലാളികളെ രക്ഷിക്കാനുള്ള ശ്രമം തുടരുന്നു
മേഘാലയയില് ഖനിയില് കുടുങ്ങിയ തൊഴിലാളികളെ രക്ഷിക്കാനുള്ള ശ്രമം തുടരുന്നു. വിദൂര ഗ്രാമത്തിലുള്ള കല്ക്കരി ഖനിയിലെ ഇടുങ്ങിയ ഗുഹയിലാണ് 13 തൊഴിലാളികള് കുടുങ്ങിയത്. സമീപത്തെ നദിയില് നിന്നുള്ള വെള്ളം ഖനിക്കുള്ളില് നിറഞ്ഞിട്ടുണ്ട്. നിലവില് 70 അടിയോളം വെള്ളമുണ്ട്. മണ്ണും ചളിയും നിറഞ്ഞവെള്ളവും ഖനിയിലെ പൊടിയും മൂലം കാഴ്ച വ്യക്തമാകാത്തതിനാല് രക്ഷാപ്രവര്ത്തനം തടസമാവുകയാണ്.
നിരവധി അറകളുള്ള ഖനിയുടെ പ്ലാനും ലഭ്യമല്ല. ദേശീയ ദുരന്ത പ്രതികരണ സേനയും സംസ്ഥാന ദുരന്ത നിവാരണ സേനയും പൊലീസും സംയുക്തമായി രക്ഷാപ്രവര്ത്തനത്തിനുണ്ട്. ബോട്ടുകളുപയോഗിച്ചാണ് തെരച്ചില് നടക്കുന്നത്. നിരവധി പേര് ചേര്ന്ന് ഖനിയില് നിന്ന് വെള്ളം വറ്റിക്കാനുള്ള ശ്രമം തുടരുകയാണ്.
അതേസമയം, ഖനി ഉപേക്ഷിക്കപ്പെട്ട നിലയില് കിടക്കുകയായിരുന്നുവെന്നും ഒരാഴ്ചയായി തുടങ്ങിയ ഖനനം അനധികൃതമായാണ് നടക്കുന്നതെന്നും പൊലീസ് പറഞ്ഞു. ഖനി ഉടമക്കെതിരെ കേസ് രജിസ്റ്റര് ചെയ്തിട്ടുണ്ട്. ഖനിയില് കാണാതായവരില് മൂന്നു പേര് മാത്രമാണ് മേഘാലയക്കാര്. 10പേര് അസം സ്വദേശികളാണ്. 2014ല് ദേശീയ ഹരിത ട്രൈബ്യൂണല് മേഘാലയയില് കല്ക്കരി ഖനനം നിരോധിച്ചിരുന്നു.
https://www.facebook.com/Malayalivartha