ദിവസങ്ങള്‍ നീണ്ടുനിന്ന അനിശ്ചിതത്വങ്ങള്‍ക്ക് ഒടുവില്‍ ഛത്തീസ്ഗഡ് മുഖ്യമന്ത്രിയായി പിസിസി അധ്യക്ഷന്‍ ഭൂപേഷ് ഭാഗേലിനെ തെരഞ്ഞെടുത്തു. റായ്പൂരില്‍ ചേര്‍ന്ന കോണ്‍ഗ്രസ് നിയമസഭാ കക്ഷി യോഗത്തിനുശേഷമാണ് ഭാഗേലിനെ തെരഞ്ഞെടുത്തത്.
ഇന്നലെ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ഭാഗേല്‍ ഉള്‍പ്പെടെയുള്ള നേതാക്കളുമായി ചര്‍ച്ച നടത്തിയിരുന്നു. ഭാഗേലിന്റെ പേര് നിയമസഭാ കക്ഷിയോഗം ഐക്യകണ്‌ഠ്യേന അംഗീകരിക്കുകയായിരുന്നു. തിങ്കളാഴ്ച ഭാഗേല്‍ സത്യപ്രതിജ്ഞ ചെയ്ത് അധികാരമേല്‍ക്കും. ഭാഗേലിനെ കൂടാതെ താമ്രദ്വാജ് സാഹു, ചരണ്‍ദാസ് മഹന്ത്, ടി.എസ് സിംഗ്‌ദോ എന്നിവരെയും മുഖ്യമന്ത്രി പദത്തിലേക്ക് പരിഗണിച്ചിരുന്നു. ഇവരുമായി രാഹുല്‍ ഗാന്ധി പലവട്ടം ശനിയാഴ്ച ചര്‍ച്ച നടത്തിയിരുന്നു.
90 അംഗ നിയമസഭയില്‍ 68 സീറ്റും വിജയിച്ചാണ് കോണ്‍ഗ്രസ് ഛത്തീസ്ഗഡില്‍ അധികാരമുറപ്പിച്ചത്. അഞ്ച് സംസ്ഥാനങ്ങളിലേക്ക് നടന്ന നിയമസഭാ തെരഞ്ഞെടുപ്പുകളില്‍ കോണ്‍ഗ്രസ് വിജയം നേടിയ മധ്യപ്രദേശ്, രാജസ്ഥാന്‍ എന്നിവിടങ്ങളിലെ മുഖ്യമന്ത്രിമാരെ നേരത്തെ പ്രഖ്യാപിച്ചിരുന്നു. മധ്യപ്രദേശില്‍ കമല്‍നാഥും രാജസ്ഥാനില്‍ അശോക് ഗെഹ്!ലോട്ടുമാണ് മുഖ്യമന്ത്രിമാര്‍. സച്ചിന്‍ പൈലറ്റിനെ രാജസ്ഥാനില്‍ ഉപമുഖ്യമന്ത്രിയായും തെരഞ്ഞെടുത്തിരുന്നു.